കൊച്ചി: ജോസ് കെ.മാണിക്കെതിരെ താന്‍ കത്തില്‍ ഉന്നയിച്ച ലൈംഗികാരോപണം പിന്നീട് നിഷേധിച്ചത് ഉമ്മന്‍ചാണ്ടിക്കുവേണ്ടി മധ്യസ്ഥരായി നിന്നിരുന്നവര്‍ നിര്‍ദ്ദേശിച്ചിട്ടായിരുന്നുവെന്ന് സരിത. ജസ്റ്റിസ് ജി. ശിവരാജന്‍ കമ്മീഷനില്‍ ഇന്നലെ നടന്ന രഹസ്യ വിസ്താരങ്ങള്‍ക്കുശേഷം പുറത്ത് മാധ്യമങ്ങളോട് സംസാരിക്കുകയായിരുന്നു സരിത.
2013 ജൂലൈ 19ന് പെരുമ്പാവൂര്‍ പൊലീസിന്റെ കസ്റ്റഡിയില്‍വച്ച് താനെഴുതിയ കത്തുമായി ബന്ധപ്പെട്ട് പിന്നീട് വിവാദങ്ങളുയര്‍ന്ന സാഹചര്യത്തില്‍ അതിന്റെ നിജസ്ഥിതി വ്യക്തമാക്കാന്‍ താന്‍ 2015 ഡിസംബര്‍ 15ന് തിരുവനന്തപുരം പ്രസ്‌ക്ലബ്ബില്‍ വാര്‍ത്താസമ്മേളനം നടത്തി. കത്തില്‍ ജോസ് കെ. മാണി എംപിയ്‌ക്കെതിരെ പരാമര്‍ശമുണ്ടായിരുന്നു. എന്നാല്‍ ആ കത്ത് പിന്നീട് റിപ്പോര്‍ട്ടര്‍ ചാനല്‍ പ്രക്ഷേപണം ചെയ്തപ്പോള്‍ ജോസ് കെ. മാണിക്കെതിരായ ആരോപണം താന്‍ നിഷേധിച്ചിരുന്നു.
കേരള കോണ്‍ഗ്രസ് മാണിഗ്രൂപ്പ് നേതാവായ കൊട്ടാരക്കര പൊന്നച്ചന്‍, ഉമ്മന്‍ചാണ്ടിയ്‌ക്കുവേണ്ടി മധ്യസ്ഥതയ്‌ക്കെത്തിയ തമ്പാനൂര്‍ രവി ഉള്‍പ്പെടെയുള്ള നേതാക്കള്‍ എന്നിവര്‍ നിര്‍ദ്ദേശിച്ചതനുസരിച്ചാണത്. കത്തിലെ ആരോപണം പിന്നീട് നിഷേധിച്ചത് ശരിയായിരുന്നില്ലെന്ന് താന്‍ സമ്മതിക്കുന്നു. രഹസ്യവിസ്താരത്തിനിടെ ജോസ് കെ. മാണിയുടെ അഭിഭാഷകന്‍ ഇതെക്കുറിച്ചുചോദിച്ചപ്പോള്‍ തനിക്കുപറ്റിയ തെറ്റ് തിരുത്തി കമ്മീഷനില്‍ മൊഴി നല്‍കിയെന്നും സരിത പറഞ്ഞു.
താന്‍ കത്തില്‍ ആരോപണമുന്നയിച്ച മുന്‍മുഖ്യമന്ത്രി ഉമ്മന്‍ചാണ്ടി, മുന്‍കേന്ദ്രമന്ത്രി കെ സി വേണുഗോപാല്‍, മുന്‍മന്ത്രിമാരായ ആര്യാടന്‍ മുഹമ്മദ്, എ.പി. അനില്‍കുമാര്‍, ജോസ് കെ. മാണി, ഹൈബിഈഡന്‍ എംഎല്‍എ എന്നിവരുടെ അഭിഭാഷകര്‍ ആരോപണവുമായി ബന്ധപ്പെട്ട കാര്യങ്ങളുടെ നിജസ്ഥിതിയിലേക്ക് ആഴത്തില്‍ ഇറങ്ങി ചോദ്യങ്ങള്‍ ചോദിച്ചില്ലെന്ന് സരിത മാധ്യമങ്ങളോട് പറഞ്ഞു. എസിജെഎം എം വി രാജുവിനു മമ്പില്‍ മൊഴി നല്‍കവേ തന്നെ ചിലര്‍ മാനഭംഗപ്പെടുത്തിയതായി സരിത പറഞ്ഞിരുന്നു. സോളാര്‍ പദ്ധതിയുമായി താന്‍ സമീപിച്ച രാഷ്‌ട്രീയ നേതാക്കളില്‍ ചിലര്‍ അവരുടെ സ്വാര്‍ത്ഥ താല്‍പരയത്തിനും ഇംഗിതത്തിനുമായി ചൂഷണം ചെയ്തതായി ഇന്നലെ സരിതയെ രഹസ്യമായി വിസ്തരിച്ചത്.
ഉമ്മന്‍ചാണ്ടി, കെ.സി. വേണുഗോപാല്‍, ആര്യാടന്‍ മുഹമ്മദ്, എ.പി. അനില്‍കുമാര്‍, ജോസ് കെ മാണി, ഹൈബി ഈഡന്‍ എന്നിവര്‍ക്കു പുറമേ ഉമ്മന്‍ചാണ്ടി പേഴ്‌സണല്‍ സ്റ്റാഫംഗങ്ങളായിരുന്ന ടെന്നി ജോപ്പന്‍, ജിക്കുമോന്‍ ജേക്കബ് എന്നിവരുടെ അഭിഭാഷകരും സരിതയെ രഹസ്യ വിസ്താരം നടത്തി. കത്തിന്റെ പകര്‍പ്പ് മെയ് 11നാണ് കമ്മീഷനില്‍ സരിത ഹസ്യരേഖയായി സമര്‍പ്പിച്ചത്.
തിങ്കളാഴ്ച രാവിലെ സിറ്റിങ് ആരംഭിച്ചപ്പോള്‍ത്തന്നെ ഉമ്മന്‍ചാണ്ടി, കെ.സി. വേണുഗോപാല്‍, ആര്യാടന്‍ മുഹമ്മദ്, ഹൈബി ഈഡന്‍ എന്നിവരുടെ അഭിഭാഷകര്‍ കമ്മീഷനോട് രഹസ്യ വിസ്താരം മതിയെന്നാവശ്യപ്പെടുകയായിരുന്നു. എ.പി. അനില്‍കുമാര്‍, ജോസ് കെ.മാണി, ടെന്നി ജോപ്പന്‍, ജിക്കുമോന്‍ ജേക്കബ് എന്നിവരുടെ അഭിഭാഷകരും പിന്നീട് ഇക്കാര്യം ആവശ്യപ്പെട്ടു. വിസ്താരം രാത്രി എട്ടര വരെ നീണ്ടു.
