ന്യൂദല്‍ഹി: നടി നവ്യനായര്‍ ദല്‍ഹിയിലെ സിജെപി സമരത്തെ അനുകൂലിച്ച് പൊലീസ് വാഹനത്തെ തടഞ്ഞുനിര്‍ത്തുന്ന ചിത്രം പങ്കുവെച്ചതിനെതിരെ വ്യാപകപ്രതിഷേധം. മിനിറ്റുകള്‍ക്കകം ലക്ഷക്കണക്കിന് ട്രോളുകളും വിമര്‍ശനങ്ങളും എത്തിയതോടെ നവ്യനായര്‍ തന്നെ ഈ ചിത്രം ഇന്‍സ്റ്റഗ്രാം അക്കൗണ്ടില്‍ നിന്നും പിന്‍വലിച്ചു.
മുംബൈയിൽ നീറ്റ് പരീക്ഷാ ക്രമക്കേടുകൾക്കെതിരായ പ്രതിഷേധത്തിനിടയിൽ പൊലീസ് വാഹനം തടഞ്ഞ റിയ ആഹിർ എന്ന യുവതിയുടെ ദൃശ്യങ്ങൾ സമൂഹമാധ്യമങ്ങളിൽ തരംഗമായിരുന്നു. ഈ വൈറൽ ചിത്രം അതേപടി പുനരാവിഷ്കരിച്ചാണ് നവ്യാ നായർ ഇൻസ്റ്റാഗ്രാമിൽ ചിത്രം പങ്കുവെച്ചത്. ഈ ചിത്രത്തിന് പശ്ചാത്തലമായി ‘വന്ദേമാതരം’ എന്ന ഗാനവും ഉൾപ്പെടുത്തിയിരുന്നു.
എന്നാൽ ഇതിനെതിരെ വ്യാപകമായ വിമർശനങ്ങൾ ഉയർന്നതോടെ താരം പോസ്റ്റ് ഉടൻ തന്നെ പിന്‍വലിക്കുകയായിരുന്നു. കഴിഞ്ഞ ദിവസങ്ങളില്‍ വിദ്യാര്‍ത്ഥി സമരത്തിന് അനുകൂലമായ നിലപാടെടുത്ത മഞ്ജു വാര്യര്‍, രഞ്ജിനി ഹരിദാസ് എന്നിവര്‍ക്കെതിരെയും കടുത്ത വിമര്‍ശനങ്ങള്‍ ഉയര്‍ന്നിരുന്നു. എന്നിട്ടും എന്തിനാണ് നവ്യനായര്‍ ഇങ്ങിനെ ഒരു സാഹസത്തിന് മുതിര്‍ന്നത് എന്നറിയുന്നില്ല.
സിനിമയില്‍ രണ്ടാം തിരിച്ചുവരവ് നടത്തി മുന്നേറുകയാണ് നടി. ബിജെപി വേദികളില്‍ പലതിലും പങ്കെടുത്തിട്ടുള്ള നവ്യനായര്‍ ഈയിടെ കോണ്‍ഗ്രസ് വേദികളിലും പങ്കെടുക്കുന്നുണ്ട്.
