അപൂര്വ്വരോഗം ബാധിച്ച കാലുകളുമായി വീട്ടമ്മ
പൂച്ചാക്കല്: അപൂര്വ്വ രോഗം ബാധിച്ച വിധവയായ വീട്ടമ്മ ചികിത്സക്കും നിത്യ വൃത്തിക്കും പ്രയാസപ്പെടുന്നു. തൈക്കാട്ടുശ്ശേരി പഞ്ചായത്ത് രണ്ടാം വാര്ഡ് ഉളവെയ്പ് മൂത്തേടത്ത് വീട്ടില് പരേതനായ സന്തോഷിന്റെ ഭാര്യ ശശികലയാണ്(42) രണ്ട് മക്കള് അടങ്ങുന്ന തന്റെ കുടുംബത്തിന്റെ പ്രാരാബ്ധങ്ങളില് നട്ടം തിരിയുന്നത്.
ഉത്തരേന്ത്യയിലെ കാണ്പൂരില് നഴ്സായി ജോലി ചെയ്തിരുന്ന ശശികലയെ പെട്ടെന്നാണ് ക്രോണിക് ലിംഫഡിമ എന്ന അപൂര്വ്വ രോഗം കീഴ്പെടുത്തിയത്. രണ്ട് കാലുകളിലും അമിതമായ അളവില് നീര് വന്ന് വീര്ക്കുക. തുടര്ന്ന് ഇത് പൊട്ടി വെള്ളം ഒലിക്കുക എന്നതാണ് ഈ രോഗം. നടക്കുവാനോ കാലുകള് മടക്കുവാനോ സാധിക്കാത്ത അവസ്ഥയിലാണ് ശശികല. ജീവിതകാലം മുഴുവനും ഇതിന് മരുന്നുകള് കഴിച്ചു കൊണ്ടിരുന്നാലും രോഗം പൂര്ണ്ണമായി ഭേദമാകില്ലെന്നാണ് ഡോക്ടര്മാരുടെ വിധി. നിലവില് ചേര്ത്തല താലൂക്ക് ആശുപത്രയിലെ ചികിത്സയിലാണ്.
അസുഖം ബാധിച്ചപ്പോള് ചികിത്സക്കിടയില് ബാക്കിഉണ്ടായിരുന്ന സമ്പാദ്യം കൊടുത്ത് ഉളവെയ്പില് മൂന്ന് സെന്റ് ഭൂമി വാങ്ങി. നാട്ടുകാരുടെ സഹായത്തോടെ ഇതില് നിര്മിച്ച പണിതീരാത്ത ഷെഡിലാണ് പത്താം ക്ലാസ് കഴിഞ്ഞ മകള് അഞ്ജനയും ആറാംക്ലാസുകാരന് ആദിത്യനും അടങ്ങുന്ന മൂന്നംഗ കുടുംബം കഴിയുന്നത്.നാട്ടുകാരുടെ സഹായത്തോടെയാണ് ഇടക്കെങ്കിലും അടുപ്പില് തീ പുകക്കാനാകുന്നതെന്ന് പറയുമ്പോള് ശശികലയുടെ കണ്ണുകള് ഈറനണിഞ്ഞു.. ചികിത്സക്ക് മരുന്ന് വാങ്ങാന് മാസം 2,000 രൂപയോളം വേണ്ടിവരും.
കാലുകള് മടക്കാന് പറ്റാത്തതിനാന് വാടകക്ക് വണ്ടി വിളിച്ച് വേണം ആശുപത്രിയില് പോകാന്. പത്തനംതിട്ട സ്വദേശിനിയായ ശശികലയെ ഏറ്റെടുക്കാന് ബന്ധുകള് തയാറാകുന്നില്ല. ഭര്ത്താവിന്റെ മരണത്തോടെ ആ ബന്ധുക്കള് കൈയ്യൊഴിഞ്ഞിരുന്നു..
കാണ്പൂരില് വെച്ച് അസുഖം ബാധിച്ച ശശികലയെ സംരക്ഷിക്കാന് ആരുമില്ലാതായതോടെ കൂടെ ജോലി ചെയ്തിരുന്ന ഉളവെയ്പ് സ്വദേശിനി ഷൈനിയാണ് ഇവരെ ഇവിടേക്ക് കൂട്ടിക്കൊണ്ടു വന്നത്.
മരുന്നിനും നിത്യ ചെലവിനും മക്കളുടെ വിദ്യാഭ്യാസത്തിനുമൊന്നും പണമില്ലാതെ പ്രയാസപ്പെടുന്ന ഈ കുടുംബത്തിന് സഹായമെത്തിക്കാന് ശികലയുടെയും മകള് അഞ്ജനയുടെയും പേരില് എസ്ബിടി തൈക്കാട്ടുശ്ശേരി ശാഖയില് ജോയന്റ് അക്കൗണ്ട് ചേര്ന്നിട്ടുണ്ട്. അക്കൗണ്ട് നമ്പര്: 67303 154701, ഐഎഫ്എസ്ഇ കോഡ്: എസ്ബിടിആര്0000536
