കണ്ണൂര്: ജില്ലയില് അനധികൃതമായി പ്രവര്ത്തിക്കുന്ന ഇറച്ചി കടകളുടെ എണ്ണം നാള്ക്കുനാള് കൂടുമ്പോഴും നടപടിയെടുക്കാന് തയ്യാറാവാതെ അധികൃതര്. ജില്ലയിലെ പല ടൗണുകളിലും നിരവധി ഇറച്ചിവില്പ്പന ശാലകള് പ്രവര്ത്തിക്കുന്നുണ്ടെങ്കിലും മൂന്നിലൊന്നിനു മാത്രമാണ് പ്രവര്ത്തിക്കാന് ലൈസന്സുളളത്. വൃത്തിഹീനമായ ചുറ്റുപാടില് പ്രവര്ത്തിക്കുന്ന പല അനധികൃത ഇറച്ചിവില്പ്പനശാലകളും ഗുരുതരമായ ആരോഗ്യപ്രശ്നങ്ങളാണ് ജനങ്ങളില് ഉണ്ടാക്കുന്നത്. മഴക്കാലംകൂടി ആരംഭിച്ചതോടെ പൊതുസ്ഥലങ്ങളില് യാതൊരു നിബന്ധനകളും പാലിക്കാതെ കെട്ടിപൊക്കിയിരിക്കുന്ന ഷെഡുകളിലും കെട്ടിടങ്ങളിലും പ്രവര്ത്തിക്കുന്ന ഇത്തരം സ്ഥാപനങ്ങള് സാമൂഹ്യവിപത്തായി മാറിയിരിക്കുന്ന സാഹചര്യമാണ് സംജാതമായിരിക്കുന്നത്. തദ്ദേശ സ്വയംഭരണ സ്ഥാപനങ്ങളുടെ ലൈസന്സോടു കൂടി പ്രവര്ത്തിക്കേണ്ട സ്ഥാപനങ്ങള് യാതൊരു ലൈസന്സുമില്ലാതെ പ്രവര്ത്തിക്കുമ്പോഴും നടപടിയെടുക്കാന് ഒട്ടുമിക്ക തദ്ദേശ സ്ഥാപനാധികാരികളും മടിക്കുകയാണ്.
ഇടത്-വലത് മുന്നണികള് ഭരണം നടത്തുന്ന മിക്ക തദ്ദേശ സ്ഥാപനങ്ങളുടെ പരിധിയിലും ഭരണസമിതികളുടെ മൗനാനുവാദത്തോടെയാണ് ഇത്തരം സ്ഥാപനങ്ങള് പ്രവര്ത്തിക്കുന്നത്. കോഴിയിറച്ചി മാത്രം വില്ക്കാന് മാത്രമുളള ലൈസന്സ് ഉപയോഗിച്ച് പല ഇറച്ചിക്കടകളും ആട്, പന്നി, പോത്തിറച്ചികള് വില്പ്പന നടത്തി വരുന്നുണ്ട്. ചില കടകളില് പരസ്യമായി തന്നെ പോത്തിനെ ഉള്പ്പെടെ അറുക്കുന്ന സ്ഥിതിയും നിലവിലുണ്ട്. എന്നാല് ഇതൊന്നും തദ്ദേശ സ്വയംഭരണ വകുപ്പോ ആരോഗ്യവകുപ്പോ കണ്ടില്ലെന്ന് നടിക്കുകയാണ്. ഇത്തരത്തില് അനധികൃതമായി പ്രവര്ത്തിക്കുന്ന ചില ഇറച്ചിശാലകള് അധികൃതര് നോട്ടീസ് നല്കിയിട്ടും ഭീഷണിയുടേയും മറ്റും സ്വരത്തില് പൂട്ടാന് തയ്യാറാവുന്നില്ലെന്ന് അധികൃതര്തന്നെ സാക്ഷ്യപ്പെടുത്തുന്നു. വൃത്തിഹീനമായ ചുറ്റുപാടില് തൂക്കിയിട്ട് വില്പ്പന നടത്തുന്ന മാംസം വഴി സാംക്രമിക രോഗങ്ങളുള്പ്പെടെ പിടികൂടാനുളള സാധ്യത വളരെയേറെയാണ്. കൃത്യമായി മൂടിവെയ്ക്കാതെയും സുരക്ഷിതമായി സൂക്ഷിക്കാത്തതും കാരണം തൂക്കിയിട്ടിരിക്കുന്ന ഇറച്ചിയുടെ മേല് ഈച്ചകളുള്പ്പെടെ പാറിപറന്ന് കളിക്കുന്നത് പല കടകളിലും പതിവു കാഴ്ചയാണ്. മാത്രമല്ല പല കടകളിലേയും ഇറച്ചിമാലിന്യങ്ങള് പൊതുസ്ഥലങ്ങളില് അശ്രദ്ധമായി നിക്ഷേപിക്കുകയാണ് പതിവ്. ഇത് സമീപ പ്രദേശങ്ങളിലെ കിണറുകളിലും ജലാശയങ്ങളിലും പക്ഷി മൃഗാദികള് വലിച്ചിഴച്ച് കൊണ്ടുപോയി ഇടുന്നത് നാട്ടുകാര്ക്ക് ദുരിതം സമ്മാനിക്കുകയാണ്. കൂടാതെ മാലിന്യ നിര്മ്മാര്ജ്ജന സൗകര്യങ്ങളുടെ അഭാവം കാരണം പല പ്രദേശങ്ങളിലെ ഇറച്ചി കടകളില് നിന്നുളള മാലിന്യ പാതിരാത്രികളിലും മറ്റും റോഡരികിലും പൊതുസ്ഥലങ്ങളിലും പുഴകളിലും തോടിലും നിക്ഷേപിക്കുന്ന പ്രവണതയും വര്ദ്ധിച്ചു വരുന്നുണ്ട്. കാലവര്ഷം ശക്തിപ്രാപിച്ചതോടെ ഇത്തരത്തില് നിക്ഷേപിച്ച മാലിന്യങ്ങള് ജനവാസ കേന്ദ്രങ്ങളിലും മറ്റും എത്തിച്ചേരുന്നതും ജനങ്ങള്ക്ക് ദുരിതമായിരിക്കുകയാണ്. ഇത്തരം മാലിന്യങ്ങളില് നിന്നുമുളള രൂക്ഷമായ ദുര്ഗന്ധം കാരണം ചില ടൗണുകളില് പോലും മൂക്കുപൊത്താതെ യാത്ര ചെയ്യാന് കഴിയാത്ത അവസ്ഥയും നിലവിലുണ്ട്.
