അമ്പലപ്പുഴ: അമ്പലപ്പുഴയിലും പുറക്കാടും സാമൂഹ്യ വിരുദ്ധരുടെ അഴിഞ്ഞാട്ടം നാട്ടുകാരുടെ ഉറക്കം കെടുത്തുന്നു. ഏതാനും ദിവസങ്ങള്ക്കുള്ളില് നടന്നത് നിരവധി അക്രമങ്ങള്. കഴിഞ്ഞ ദിവസം പുറക്കാട് പഴയങ്ങാടിയില് നടന്ന അക്രമത്തില് നിരവധി കേസിലെ പ്രതിയായ യുവാവിന് കുത്തേറ്റിരുന്നു.
അമ്പലപ്പുഴയില് ഇരുപതു രൂപയെ ചൊല്ലി ഉണ്ടായ സംഘട്ടനത്തില് യുവാവിന് അടിയേല്ക്കുകയും ഇതേ തുടര്ന്ന് പരാതി നല്കി മടങ്ങിയ പിതാവ് കുഴഞ്ഞു വീണു മരിക്കുകയും ചെയ്തിരുന്നു. പായല് കുളങ്ങര ഭാഗത്ത് ഒരു സംഘം ആളുകള് തമ്മില് തല്ലിയതിനെ തുടര്ന്ന് ഒരാള്ക്ക് വെട്ടേല്ക്കുകയും വെട്ടിയ പ്രതിയുടെ പിതാവിനെ പോലീസ് പിടികൂടുകയും ചെയ്തിരുന്നു.
സംഘര്ഷങ്ങള്ക്ക് വഴി ഒരുക്കിയതിനാണ് അച്ചനെ പോലീസ് പിടികൂടിയത്. ഇത്തരത്തില് നടന്ന സംഘര്ഷങ്ങള് എല്ലാം തന്നെ തീരദേശ മേഖലയില് ആയതോടെ സന്ധ്യ കഴിഞ്ഞാല് സ്ത്രീകള്ക്കും കുട്ടികള്ക്കും പുറത്തിറങ്ങാന് കഴിയാത്ത അവസ്ഥയിലാണ്. സംഘര്ഷത്തെ തുടര്ന്ന് അക്രമത്തിനിരയായവരും അക്രമിച്ചവരും പ്രദേശത്തെ ഗുണ്ടാസംഘങ്ങളാണ്.
കഴിഞ്ഞ കുറെ മാസങ്ങളായി തീരദേശം കേന്ദ്രീകരിച്ച് വില്പ്പനയ്ക്കെത്തുന്ന മയക്കുമരുന്നുകളുടെ ഉപയോഗം കൂടിയതാണ് ഇത്തരത്തിലുള്ള അക്രമങ്ങള് അരങ്ങേറാന് വഴിയൊരുങ്ങുന്നത്. പുറക്കാട് പ്രദേശത്ത് പുലിമുട്ടുകള് കേന്ദ്രീകരിച്ചും, വാടക വീടുകളില് താമസിച്ചും മദ്യവും മയക്കുമരുന്നും വില്പ്പന തുടങ്ങിയിട്ട് മാസങ്ങളായി എന്ന് നാട്ടുകാര് പറയുന്നു.
അമ്പലപ്പുഴ തെക്ക് പഞ്ചായത്തില് നടക്കുന്ന അക്രമങ്ങളിലെ പ്രതികളെ രക്ഷിക്കാന് പ്രദേശത്തെ സിപിഎം നേതാവ് രംഗത്ത് എത്തുന്നത് പോലീസിനും തലവേദന ആയികഴിഞ്ഞു. ദിവസങ്ങളായി തുടരുന്ന അക്രമ മേഖലയില് എത്തി വേണ്ട നടപടി സ്വീകരിക്കാന് പോലീസ് തയാറാവുന്നില്ല എന്ന പരാതിയും ഉയരുന്നു.
