തലശ്ശേരി: പരസ്യബോര്ഡിന്റെ കാഴ്ചക്ക് തടസ്സമെന്ന കാരണത്താല് ആല്മരത്തിന്റെ തല മുറിച്ചുമാറ്റി. തലശ്ശേരി പഴയ ബസ്സ്റാന്റിനടുത്ത് ജൂബിലി ഷോപ്പിംഗ് കോംപ്ലക്സില് ഫ്രൂട്ട് കട നടത്തിവരുന്ന ബാബു 2004 ഡിസംബര് 31ന് തന്റെ കടയുടെ മുന്നില് നട്ടുവളര്ത്തിയ ആല്മരത്തിന്റെ തലയാണ് ഞായറാഴ്ച പരസ്യ ദാതാക്കള് മുറിച്ച് നശിപ്പിച്ചത്.
പഴയ ബസ്സ്റാന്റിലെത്തി ച്ചേരുന്നവര്ക്ക് നഗരത്തിന്റെ ഹൃദയഭാഗത്ത് തണലേകിയിരുന്ന ഈ ആല്മരം വെട്ടിനശിപ്പിച്ചവര്ക്കെതിരെ പരിസ്ഥിതി പ്രവര്ത്തകര് ശക്തിയായി പ്രതിഷേധിച്ചു. തറകെട്ടി സംരക്ഷിച്ചുവരുന്ന അരയാല് നശിപ്പിച്ചവര്ക്കെതിരെ ശക്തമായ നടപടി സ്വീകരിക്കണമെന്ന് പ്രകൃതി സ്നേഹികള് ആവശ്യമുന്നയിച്ചിട്ടുണ്ട്.
നഗരസഭയുടെ കെട്ടിടമായ ജൂബിലി കോംപ്ലക്സിന്റെ മുകളില് സ്ഥാപിച്ച സ്വകാര്യവ്യക്തിതിയുടെ കൂറ്റന് പരസ്യ ബോര്ഡുമായി ബന്ധപ്പെട്ടവരാണ് മരത്തോട് ക്രൂരതകാട്ടിയതെന്നാണ് അറിയുന്നത്. ആയിരക്കണക്കിന് ജനങ്ങള്ക്കും സമീപത്തെ വ്യാപാരികള്ക്കും കൊടുവെയിലത്ത് തണലേകിയ ആല്മരം നശിപ്പിച്ചവര് സാമൂഹ്യ വിരുദ്ധ പ്രവര്ത്തനമാണ് നടത്തിയതെന്നാണ് നാട്ടുകാര് ആരോപിക്കുന്നത്.
