കണ്ണൂര്: വായന മനസ്സിന് പ്രധാനപ്പെട്ടതാണെന്നും അത് ജീവിതത്തിന്റെ ഭാഗമാക്കി സമ്പൂര്ണ്ണ വ്യക്തിത്വത്തിന് ഉടമകളാകണമെന്നും ജില്ലാ പഞ്ചായത്ത് പ്രസിഡണ്ട് കെ.വി.സുമേഷ് പറഞ്ഞു. വായനാദിന വാരാചരണത്തിന്റെ ജില്ലാതല ഉദ്ഘാടനം കണ്ണൂര് ഗവ.വിഎച്ച്എസ്എസില് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
മേയര് ഇ.പി.ലത അധ്യക്ഷത വഹിച്ചു. ജില്ലാ പഞ്ചായത്ത് ആരോഗ്യ-വിദ്യാഭ്യാസ സ്ഥിരം സമിതി അധ്യക്ഷന് കെ.പി.ജയബാലന് മാസ്റ്റര് വായനാദിന പ്രതിജ്ഞ ചൊല്ലി നല്കി. നാടകകൃത്തും സംവിധായകനുമായ ഇബ്രാഹിം വെങ്ങര മുഖ്യപ്രഭാഷണം നടത്തി കുട്ടികളുമായി സംവദിച്ചു. പുസ്തകങ്ങളില് ഇല്ലാത്തത് ജീവിതത്തിലും ജീവിതത്തില് ഇല്ലാത്തത് പുസ്തകങ്ങളിലും കാണാമെന്ന് അദ്ദേഹം പറഞ്ഞു. വായനയിലൂടെ നമ്മുടെ സ്വഭാവത്തെയും ജീവിതത്തെത്തന്നെയും നിയന്ത്രിക്കാനാവുമെന്നും ഇബ്രാഹിം വെങ്ങര പറഞ്ഞു. ആര്.പ്രഭാകരന് പി.എന്.പണിക്കര് അനുസ്മരണം നടത്തി.
അധ്യാപകരായിരുന്ന ആര് പ്രഭാകരന്, സാമുവല് ആമോസ് മാസ്റ്റര് എന്നിവരെ ചടങ്ങില് ആദരിച്ചു. കോര്പ്പറേഷന് കൗണ്സിലര് അഡ്വ. ലിഷ ദീപക്, വിദ്യാഭ്യാസ ഡെപ്യൂട്ടി ഡയറക്ടര് വി.എം.തങ്കമണി, ജില്ലാ ലൈബ്രറി കൗണ്സില് സെക്രട്ടറി പി.കെ.ബൈജു, സാക്ഷരതാ മിഷന് ജില്ലാ കോ ഓര്ഡിനേറ്റര് പി.എന് ബാബു, ഹെഡ്മാസ്റ്റര് പി.പ്രസൂനന്, പി.ടി.എ പ്രസിഡണ്ട് പി.സാജിദ് എന്നിവര് സംസാരിച്ചു. ജില്ലാ ഇന്ഫര്മേഷന് ഓഫീസര് ഇ.വി.സുഗതന് സ്വാഗതവും അസി.ഇന്ഫര്മേഷന് ഓഫീസര് എ സി അഭിലാഷ് നന്ദിയും പറഞ്ഞു.
വായനാദിന വാരാചരണത്തിന്റെ ഭാഗമായി ചെറുമാവിലായി യുപി സ്കൂളില് നടന്ന പരിപാടിയില് പ്രസ്ക്ലബ് പ്രസിഡണ്ട് കെ.ടി.ശശി ലൈബ്രറി പുസ്തക വിതരണവും ഉദ്ഘാടനവും നിര്വഹിച്ചു. സ്കൂള് വിദ്യാരംഗം കലാസാഹിത്യവേദി ഉദ്ഘാടനം ജില്ലാ ഇന്ഫര്മേഷന് ഓഫീസര് ഇ വി സുഗതന് നിര്വഹിച്ചു.
