ആലപ്പുഴ: ജനറല് ആശുപത്രി ജങ്ഷനില് ടൈല് വിരിക്കുന്നതിന്റെ ഭാഗമായി നടത്തിയ ഗതാഗത പരിഷ്കാരം യാത്രക്കാരെ വലയ്ക്കുന്നു. മണിക്കൂറുകളോളം നീളുന്ന ഗതാഗതക്കുരുക്കിനു പരിഹാരം കാണാതെ വാഹന പരിശോധനയടക്കമുള്ള പ്രവര്ത്തനങ്ങള്ക്കാണ് ട്രാഫിക് പോലീസിന് താല്പ്പര്യം.
കഴിഞ്ഞ ദിവസം ജനറല് ആശുപത്രി ജംഗ്ഷന്, കല്ലൂപാലം, ഇരുമ്പുപാലം, തുടങ്ങിയയിടങ്ങളില് രാവിലെ ഒമ്പതോടെ അനുഭവപ്പെട്ട ഗതാഗതക്കുരുക്ക് മണിക്കൂറുകള്ക്ക് ശേഷമാണ് പരിഹരിക്കാനായത്. കല്ലുപാലത്തിനു സമീപം ട്രാഫിക് പോലീസിനു നഗരത്തില് നേതൃത്വം നല്കുന്ന ഉയര്ന്ന ഉദ്യോഗസ്ഥന് തന്നെയെത്തിയാണ് ഗതാഗതം നിയന്ത്രിച്ചത്.
സര്ക്കാര് ഓഫീസുകളിലും സ്വകാര്യ സ്ഥാപനങ്ങളിലും ജോലിക്കായി പോയ നിരവധിപ്പേര്ക്ക് ട്രാഫിക് ബ്ലോക്ക് ദുരിതമാണ് വിതച്ചത്.
കൃത്യമായ സംവിധാനങ്ങളേര്പ്പെടുത്താതെ നടത്തിയ ഗതഗത പരിഷ്കാരം രാവിലെയും വൈകുന്നേരവും നഗരത്തിലൂടെ കടന്നുപോകുന്ന യാത്രക്കാര്ക്കു മണിക്കൂറുകളുടെ ഗതാഗതക്കുരുക്കാണ് സമ്മാനിക്കുന്നത്. ഗതഗത കുരുക്കുണ്ടായാല് അതു പരിഹരിക്കുന്നതിനു വേണ്ട അത്യാവശ്യ ഉദ്യോഗസ്ഥര് ട്രാഫിക് പോലീസിലുണ്ടെങ്കിലും ഗതാഗതം നിയന്ത്രിക്കുന്നതിനേക്കാള് വാഹന പരിശോധന നടത്തുന്നതിനാണ് ഇവര്ക്കു താത്പര്യമെന്നാണ് യാത്രക്കാരുടെ ആക്ഷേപം. പാലത്തിലും വളവുകളിലും തിരക്കേറിയ സ്ഥലങ്ങളിലും വാഹന പരിശോധന പാടില്ലായെന്ന് ഡിജിപിയുടെ സര്ക്കുലര് ഉണ്ടെങ്കിലും ഇതെല്ലാം കാറ്റില്പറത്തിയാണ് നഗരത്തിന്റെ വിവിധ ഭാഗങ്ങളില് വാഹന പരിശോധനകള് തകര്ക്കുന്നത്. തിരക്കേറിയ മുല്ലയ്ക്കല് തെരുവിന്റെ കവാടമായ ജില്ലാ കോടതി പാലത്തിനു തെക്കുവശം കണ്ണില് ഇരുട്ടുകയറുന്ന സമയത്തുപോലും ജീപ്പുമായി വാഹനപരിശോധനയ്ക്കു പോലീസ് സമയം കണ്ടെത്തുന്നുണ്ട്.
ട്രാഫിക് പോലീസിനെക്കൂടാതെ നഗരപരിധിയിലെ പോലീസ് സ്റ്റേഷനുകളുടെ വാഹന പരിശോധന കൂടിയാകുന്നതോടെ ഗതാഗതക്കുരുക്കില്പ്പെട്ട് സമയം നഷ്ടമാകുന്ന യാത്രക്കാരുടെ വിലപ്പെട്ട കുറച്ചുസമയംകൂടി നഷ്ടപ്പെടുത്താന് ഇടയാക്കുന്നു.
