അമ്പലപ്പുഴ: ഭരണത്തിന്റെ മറവില് സിപിഎം ലോക്കല് കമ്മിറ്റി നേതാവും യൂണിയന് നേതാവും ചേര്ന്ന് വനിതാ ഓവര്സിയറെ ഭീഷണിപ്പെടുത്തി സര്ട്ടിഫിക്കറ്റ് ഒപ്പിട്ടു വാങ്ങിയത് വിവാദമാകുന്നു. സിപിഎം ഭരിക്കുന്ന അമ്പലപ്പുഴ തെക്ക് പഞ്ചായത്തിലാണ് സംഭവം. പ്രദേശത്തെ ഗ്യാസ് തൊഴിലാളി യൂണിയന് നേതാവ് നിര്മ്മിച്ച വീടിന് മഴവെള്ള സംഭരണി സ്ഥാപിച്ചിരുന്നില്ല. 1,500 സ്ക്വയര് ഫീറ്റിന് മുകളിലുള്ള വീടുകള്ക്ക് ചട്ടപ്രകാരം മഴവെള്ള സംഭരണി നിര്ബന്ധമാണ്.
യൂണിയന് നേതാവ് നിര്മ്മിച്ച വീടിന് 87.45 മീറ്റര് സ്ക്വയര് ഉണ്ട്. ഈ സാഹചര്യത്തില് മഴവെളള സംഭരണി സ്ഥാപിക്കാതെ കഴിഞ്ഞ ദിവസം യൂണിയന് നേതാവ് കെട്ടിട നമ്പര് അവശ്യപ്പെട്ട് പഞ്ചായത്തില് ചെന്നു. എന്നാല് മഴവെള്ള സംഭരണി സ്ഥാപിക്കാത്തതിനാല് കംപ്ലീഷന് സര്ട്ടിഫിക്കറ്റ് നല്കാന് കഴിയില്ലന്ന് വനിതാ ഓവര്സിയര് വ്യക്തമാക്കി. ഇതേത്തുടര്ന്ന് യൂണിയന് നേതാവ് ലോക്കല് കമ്മറ്റി നേതാവിനെ ഫോണില് വിളിച്ചു വരുത്തി. പിന്നീട് ഇരുവരും ചേര്ന്ന് വനിതാ ഓഫീസറെ അസഭ്യം പറയുകയും ഭീഷണിപ്പെടുത്തുകയും ചെയ്തു. ഒടുവില് ഗത്യന്തരമില്ലാതെ ഇവര് മഴവെള്ള സംഭരണി സ്ഥാപിച്ചു എന്നുകാട്ടി ഒപ്പിട്ടു നല്കി.
ഓവര്സിയറെ സ്ഥലം മാറ്റുമെന്നും നേതാക്കള് ഭീഷണിപ്പെടുത്തി. യൂണിയന് നേതാവ് മദ്യപിച്ചിരുന്നുവെന്ന് ഓവര്സിയര് പറഞ്ഞു. ഇതുസംബന്ധിച്ച് പരാതി നല്കുമെന്നും അവര് അറിയിച്ചു.
