ആലപ്പുഴ: നഗരസഭയുടെ പരിധിയില് പെടുന്ന കൊറ്റംകുളങ്ങര കരളകം പാടശേഖരത്ത് അടിയന്തരമായി കൃഷി ഇറക്കണമെന്ന് ബിജെപി ആലപ്പുഴ നിയോജക മണ്ഡലം പ്രസിഡന്റ് ജി. വിനോദ് കുമാര് ആവശ്യപ്പെട്ടു. കൃഷി ഇറക്കാത്തതിനാല് പാടത്ത് വെള്ളം കേറി കിടക്കുന്നതിനാല് സമീപവാസികള് വെള്ളകെട്ടിലാണ് ജീവിക്കുന്നത്.
പല വീടുകളുടെയും മുറ്റത്ത് വെള്ളം കെട്ടികിടക്കുകയാണ്. ഇത് സാംക്രമിക രോഗങ്ങള് പടരുന്നതിനും കാരണമാകുന്നു. നല്ല രീതിയില് കൃഷി നടന്ന പാടത്ത് കഴിഞ്ഞ രണ്ടു വര്ഷമായി കൃഷി മുടക്കിയിരിക്കുകയാണ്. പാടശേഖര സമിതിയിലുള്ള ചില ഭൂമാഫിയകള് ആണ് ഇതിന് പിന്നിലെന്ന് പരിസരവാസികള് ആരോപിക്കുന്നു. പാടശേഖരത്തിന്റെ ഭൂരിഭാഗവും ചില ഭൂമാഫിയകളുടെ കയ്യിലാണ്.
കൃഷി നഷ്ട്മെന്നു കാണിച്ച് നിലം നികത്താനാണ് ഇവരുടെ ഉദ്ദേശമെന്ന് ആരോപണമുണ്ട്. കഴിഞ്ഞ ദിവസം പാടത്ത് നിലം നികത്തിയത് സമീപത്തെ ബിജെപി പ്രവര്ത്തകര് ചേര്ന്ന് തടഞ്ഞിരുന്നു. കുട്ടനാട് പാക്കേജില് പെടുത്തി പാടത്ത് നടന്ന കോടികളുടെ നിര്മാണപ്രവര്ത്തനങ്ങളിലും അഴിമതിയുണ്ടെന്ന് പരിസരവാസികള് ആരോപിക്കുന്നു. പാടശേഖരത്ത് എത്രയും പെട്ടന്ന് കൃഷി ഇറക്കണമെന്നും ഇല്ലെങ്കില് ബിജെപി പ്രദേശ വാസികളുമായി ചേര്ന്ന് ശക്തമായ പ്രക്ഷോഭം ആരംഭിക്കുവാനും തീരുമാനമായി.
യോഗത്തില് മണ്ഡലം ജനറല് സെക്രട്ടറി റെജികുമാര്, വൈസ് പ്രസിഡന്റുമാരായ മോഹനന്, കെ.ജി.പ്രകാശന്, മണ്ഡലം സെക്രട്ടറിയും വാര്ഡു കൗണ്സിലറുമായ പാര്വതി സംഗീത്, സൗമ്യാ പൊടിയന്, ട്രഷറര് വാസുദേവ കുറുപ്പ് എന്നിവര് സംസാരിച്ചു.
