അമ്പലപ്പുഴ: മന്ത്രിയുടെ ഉത്തരവ് കാറ്റില്‍ പറന്നു. അടച്ചവ വീണ്ടും കുഴികളായി. പൊതുമരാമത്ത് മന്ത്രി ജി. സുധാകരന്റെ നിര്‍ദേശപ്രകാരമാണ് രണ്ടാം തീയതിക്കു മുന്‍പായി ദേശീയപാതയില്‍ പലയിടത്തും കുഴികള്‍ അടച്ചത്.
അറ്റകുറ്റപണിയില്‍ കൃത്രിമം കാണിക്കരുതെന്നും അനുവദിക്കുന്ന പണം കൃത്യമായി ചെലവഴിക്കണമെന്നും മന്ത്രി പ്രത്യേകം നിര്‍ദ്ദേശം നല്‍കിയിരുന്നു. എന്നാല്‍ രണ്ടാം തീയതി അടച്ച കുഴികള്‍ എല്ലാം ശക്തമായ മഴയത്ത് വീണ്ടും ഇതിനേക്കാള്‍ വലിയ കുഴിയായി. അറ്റകുറ്റപ്പണികള്‍ നടത്തിയ സ്ഥലങ്ങളില്‍ എല്ലാം ടാറും മെറ്റലുമെല്ലാം ഇളകി വലിയ കുഴികള്‍ രൂപപ്പെട്ടു കഴിഞ്ഞു.
ഇത് ദേശീയ പാതയില്‍ അപകടത്തിനും രൂക്ഷമായ ഗതാഗത കുരുക്കിനും കാരണമായിട്ടുണ്ട്. മന്ത്രിയുടെ ഉത്തരവു കാറ്റില്‍ പറത്തിയാണ് കരാറുകാര്‍ അറ്റകുറ്റപണി നടത്തിയതെന്ന് ഇതിലൂടെ തെളിഞ്ഞിരിക്കുകയാണ്. റോഡു നിര്‍മ്മാണത്തില്‍ കാട്ടിയ കൃത്രിമമാണ് റോഡ് തകരാന്‍ കാരണമായിരിക്കുന്നത്.
ഇതിനു കാരണക്കാരായ ഉദ്യോഗസ്ഥര്‍ക്കും കരാറുകാര്‍ക്കുമെതിരെ നടപടി വേണമെന്ന ആവശ്യം ശക്തമായിരിക്കുകയാണ്.
