ആലപ്പുഴ: മഴക്കാലത്ത് ഉണ്ടാകുന്ന വാഹനാപകടങ്ങള്‍ കുറയ്ക്കാന് ഡ്രൈവര്‍മാര്‍ പ്രത്യേക ശ്രദ്ധയും മുന്‍കരുതലും എടുക്കണമെന്ന് റീജിയണല്‍ ട്രാന്‍സ്‌പോര്‍ട്ട് ഓഫീസര്‍ എബി ജോണ്‍ അറിയിച്ചു. നല്ല ടയറുകള്‍ ഉറപ്പ് വരുത്തുകയും ആവശ്യത്തിന് എയര്‍ ഉണ്ടെന്ന് ഉറപ്പാക്കുകയും വേണം. വൈപ്പര്‍ ബ്ലേഡ് പ്രവര്‍ത്തനക്ഷമവും കൃത്യമായി മഴവെള്ളം തുടച്ചുനീക്കുന്നുവെന്നും ഉറപ്പാക്കുക. ഹെഡ്‌ലൈറ്റ്, പാര്‍ക്ക് ലൈറ്റ്, ഇന്‍ഡിക്കേറ്റര്‍ ലൈറ്റ്, ബ്രേക്ക്‌ലൈറ്റ് എന്നിവയുടെ പ്രവര്‍ത്തനക്ഷമത പരിശോധിക്കുക. പെട്ടെന്നുള്ള ബ്രേക്കിങ് ഒഴിവാക്കുക.
മറ്റു വാഹനങ്ങളുമായി സുരക്ഷിത ദൂരം പാലിച്ച് വാഹനമോടിക്കുക. അമിത വേഗം ഒഴിവാക്കുക. ശക്തമായ മഴസമയത്ത് കാഴ്ച പൂര്‍ണ്ണമല്ലാത്ത അവസ്ഥയില്‍ റോഡിന്റെ പരമാവധി ഇടതുവശം ചേര്‍ന്ന് ഇന്‍ഡിക്കേറ്റര്‍ ലൈറ്റ് പ്രകാശിപ്പിച്ച് വാഹനം നിര്‍ത്തിയിടുക. മരങ്ങളുടെ ചുവട്ടില്‍ പാര്‍ക്കിങ് ഒഴിവാക്കുക. സ്‌കൂള്‍ ബസ്, സ്വകാര്യബസ് എന്നിവകളില്‍ വിന്‍ഡോ ഷട്ടറുകള്‍ സുരക്ഷിതമാണോ എന്ന് ഉറപ്പ് വരുത്തുക. ടൂവീലറുകളിലുള്ള യാത്ര മഴസമയത്ത് കഴിവതും ഒഴിവാക്കുക. മഴക്കാലത്ത് റോഡില്‍ രൂപപ്പെടുന്ന കുഴികള്‍, അപകടം ഉണ്ടാകുമെന്ന മുന്‍കരുതലോടെ വാഹനം ശ്രദ്ധാപൂര്‍വ്വം ഓടിക്കുക.
