കുറ്റിക്കോല്: അക്ഷരക്കണിയും അത്ഭുത മരവുമൊരുക്കി കുറ്റിക്കോല് എയുപി സ്കൂളില് പ്രവേശനോത്സവം ശ്രദ്ധേയമായി. വിവിധതരം ഫലങ്ങള് കായ്ച്ചു കിടക്കുന്ന അത്ഭുത മരമാണ് കുറ്റിക്കോല് എയുപി സ്കൂളില് കുരുന്നുകളെ വരവേറ്റത്. കുട്ടികള് അക്ഷരദീപം തെളിക്കുകയും അത്ഭുത മരത്തിന് സമീപമൊരുക്കിയ അക്ഷരക്കണി കണ്കുളിര്ക്കെ കണ്ടുകൊണ്ട് അക്ഷരങ്ങളുടെ ലോകത്തേക്ക് പ്രവേശിക്കുകയും ചെയ്തു. വിവിധതരം ഫലങ്ങള് ഉത്പാദിപ്പിക്കുന്ന അത്ഭുത വൃക്ഷം വിദ്യാലയം തന്നെയാണെന്ന തിരിച്ചറിവോടെയാണ് വിദ്യാര്ത്ഥികള് വീടുകളിലേക്ക് മടങ്ങിയത്. സ്കൂള് ജീവനക്കാരന് പി.എം.രാമചന്ദ്രന്റെ നേതൃത്വത്തില് അധ്യാപകരായ കെ.ആര്.സാനു, ഹരി നാരായണന്, രാജേന്ദ്രന് എന്നിവര് ചേര്ന്നായിരുന്നു അക്ഷരക്കണിയൊരുക്കിയത്.
പ്ലസ്ടു പരീക്ഷയില് മുഴുവന്മാര്ക്കും കരസ്ഥമാക്കിയ പൂര്വ്വ വിദ്യാര്ത്ഥി ബി.ആര്.ആദിത്യയെ യോഗം അനുമോദിച്ചു. പ്രവേശനോത്സവം പഞ്ചായത്ത് അംഗം പി.ദിവാകരന് ഉദ്ഘാടനം ചെയ്തു. പിടിഎ പ്രസിഡന്റ് കെ.സി. ബാലകൃഷ്ണന് അധ്യക്ഷത വഹിച്ചു. പ്രധാനാധ്യാപിക ലിസി അഗസ്റ്റിന്, മാനേജര് ഡോ.എം.നാരായണന് നായര്, മുന് പ്രധാനാധ്യാപകന് കെ.രാഘവന്, ബി.ആര്. ആദിത്യ സംസാരിച്ചു.
