പാലാ: കെഎസ്ഇബിയുടെ അറ്റകുറ്റപണികള് യഥാസമയം പൂര്ത്തിയാക്കാത്തത് അപകടഭീഷണി ഉയര്ത്തുന്നു. ടച്ചിംഗ് വെട്ടും, മരത്തിലും മറ്റും മുട്ടിനില്ക്കുന്ന വൈദ്യുതി ലൈനുകള് മാറ്റി സ്ഥാപിക്കാത്തതുമാണ് മഴക്കാലമെത്തിയതോടെ അപകടഭീഷണിയായി മാറിയിരിക്കുന്നത്. വൈദ്യുതി ലൈനുകള് മരങ്ങളില് ഉരഞ്ഞ് ദ്രവിച്ച് പൊട്ടിവീഴാവുന്ന അവസ്ഥയാണ്.
വലവൂര് – മരങ്ങാട്ടുപള്ളി പ്രധാന റൂട്ടിലൂടെ കടന്നുപോകുന്ന പല ഭാഗങ്ങളിലും ഇത്തരത്തലാണ് ലൈനുകള് കടന്നുപോകുന്നത്. ഇതുമൂലം തദ്ദേശവാസികള്ക്ക് സുരക്ഷിതമായി റോഡിലൂടെ സഞ്ചരിക്കാന് കഴിയാത്ത അവസ്ഥയാണ്. വൈദ്യുതി ലൈനുകള്ക്കിടയിലൂടെ വന്മരങ്ങളും ശിഖരങ്ങളും എങ്ങനെ വളര്ത്താം എന്നറിയാനും കാണുവാനും ഈ റോഡില് വന്നാല് മതി. കാറ്റും മഴയും ഇല്ലാതെ തന്നെ വൈദ്യുതി ലൈനുകള് പൊട്ടിവീണ് രണ്ടുപേര് മരിച്ച സംഭവം അടുത്തിടെ ഉണ്ടായിരുന്നു.
നഗരസഭയ്ക്കുള്ളില് ടച്ചിംഗ് വെട്ടുകള് നടക്കുന്നുണ്ടെങ്കിലും നാട്ടിന്പുറങ്ങളില് വൈദ്യുത കമ്പിയില് മുട്ടിനില്ക്കുന്നവ ഇനിയും നീക്കം ചെയ്തിട്ടില്ല. മഴക്കാലമായതോടെ പലപ്രദേശങ്ങളിലും വൈദ്യുതി തടസ്സപ്പെടുന്നതും വോള്ട്ടേജ് ക്ഷാമം ഉണ്ടാകുന്നതിനും ഇത് കാരണമാകുന്നുണ്ട്. കുടക്കച്ചിറ, അമനകര, കൂടപ്പുലം, പാലാക്കാട്ടുമല, ഇല്ലിക്കല് ഭാഗങ്ങളില് വോള്ട്ടേജ് ക്ഷാമം പ്രതിസന്ധി സൃഷ്ടിക്കുന്നുണ്ട്. വൈദ്യുതി ഉപകരണങ്ങള് പ്രവര്ത്തിക്കുവനോ, കുട്ടികള്ക്ക് പഠിക്കുവാനോ കഴിയാത്ത സ്ഥിതിയാണ്.
ഇത്തരം സംഭവങ്ങള് ആവര്ത്തിക്കാതിരിക്കുവാനും ഈ വരുന്ന വര്ഷകാലത്തെ ശക്തമായ കാറ്റിലും മഴയിലും, മരങ്ങളില് തട്ടി ഉരഞ്ഞ് തേഞ്ഞുനില്ക്കുന്ന ലൈനുകള് പൊട്ടി വീഴാതിരിക്കാനും, ഗ്രാമപ്രദേശങ്ങളില് ഉള്ളവര്ക്ക് സുരക്ഷിതമായി ജീവിക്കുവാനും, മരങ്ങളില് തട്ടി ഉരഞ്ഞ് നില്ക്കുന്ന ലൈനുകള് മാറ്റി സ്ഥാപിക്കണമെന്ന് ആവശ്യപ്പെട്ട് കെ.എസ്.ഇ.ബി. എക്സി. എഞ്ചിനീയര്ക്ക് പാലാ പൗരാവകാശ സമിതി പരാതി നല്കിയിട്ടുണ്ട്. പ്രസിഡന്റ് ജോയി കളരിക്കലിന്റെ അദ്ധ്യക്ഷതയില് കൂടിയ യോഗം അഡ്വ. സിറിയക് ജയിംസ് ഉദ്ഘാടനം ചെയ്തു. തോമസ് ഗുരുക്കള്, എ.സി. മനോജ്, റ്റി.കെ. ശശിധരന് എന്നിവര് പ്രസംഗിച്ചു.
