എരുമേലി: ശബരിമല തീര്‍ത്ഥാടകര്‍ക്കായി എരുമേലിയില്‍ ദേവസ്വം ബോര്‍ഡും, സ്വകാര്യ വ്യക്തികളും സ്ഥാപിച്ചിരിക്കുന്ന ശൗചാലയ സമുച്ചയങ്ങളിലെ മാലിന്യങ്ങള്‍ വ്യാപിക്കുന്നതായി പരാതി.
വലിയ അമ്പലത്തിന്റെ പരിസരത്ത് ചെറുതും വലുതുമായി ദേവസ്വം ബോര്‍ഡിന്റേതു തന്നെ 200 ലധികം കക്കൂസുകളാണ് മൂന്ന് സമുച്ചയങ്ങളിലായി പ്രവര്‍ത്തിക്കുന്നത്. എന്നാല്‍ ദേവസ്വം ബോര്‍ഡിന്റേതു പോലെ സ്വകാര്യ വ്യക്തികളും നിരവധി കക്കൂസുകളാണ് ഉപയോഗിച്ച് വരുന്നത്. രണ്ട് മാസത്തെ തീര്‍ത്ഥാടന കാലത്ത് ലക്ഷക്കണക്കിന് തീര്‍ത്ഥാടകര്‍ ഉപയോഗിക്കുന്ന ഇത്തരം കക്കൂസുകള്‍ വഴി എരുമേലി ടൗണിലും പരിസര പ്രദേശത്തും മാലിന്യങ്ങള്‍ ഒഴുകുന്നതും വ്യാപകമാണ്. ഒരു കക്കൂസ് സമുച്ചയത്തില്‍ നൂറിലധികം കക്കൂസുകളാണുളളത്. ഇതില്‍ നിന്ന് പുറം തളളുന്ന മാലിന്യങ്ങള്‍ സമീപത്തെ തോടുകളിലും കിണറുകളിലും വ്യാപിക്കുന്നതായി നാട്ടുകാര്‍ പരാതി ഉന്നയിക്കുവാന്‍ തുടങ്ങിയിട്ട് നാളുകളായെങ്കിലും അധികൃതര്‍ നടപടിയെടുക്കാന്‍ കഴിയാതെ ഇരുട്ടില്‍ തപ്പുകയാണന്നും നാട്ടുകാര്‍ പറഞ്ഞു.
ജലസ്രോതസും, പ്രദേശങ്ങളും മലിനമാകുന്നതിനെതിരെ വ്യാപകമായി പ്രതിഷേധം ഉയരുമ്പോള്‍ ചില സ്വകാര്യ കക്കൂസ് ഉടമകള്‍ക്ക് കാരണം കാണിക്കല്‍ നോട്ടീസ് നല്കി ആരോഗ്യ വകുപ്പ് അധികൃതര്‍ തലയൂരുകയാണ് പതിവ്. ഇതിനിടെ മഴക്കാലംകൂടി ആരംഭിക്കുന്നതോടെ കക്കൂസ് മാലിന്യം മൂലം ഉണ്ടാകുന്ന മലിനീകരണത്തിന്റെ തോത് വര്‍ദ്ധിക്കുന്നതായും നാട്ടുകാര്‍ പറയുന്നു. ഈ കക്കൂസ് സമുച്ചയങ്ങളിലെ മലിനീകരണം തടയുന്നതിനായി പത്തില്‍ കൂടുതല്‍ കക്കൂസുകള്‍ ഉളളവര്‍ സീവേജ് ട്രീറ്റ്‌മെന്റ്പ്ലാന്റ് സ്ഥാപിക്കണമെന്ന് ആറ് വര്‍ഷം മുമ്പ് ഹൈക്കോടതി നിര്‍ദേശം നല്‍കിയതിനെ തുടര്‍ന്ന് ദേവസ്വം ബോര്‍ഡ് മാത്രമാണ് പ്ലാന്റുകള്‍ സ്ഥാപിച്ചിരുന്നു. എന്നാല്‍ ഈ സീവേജ് ട്രീറ്റ്‌മെന്റ് പ്ലാന്റുകള്‍ പോലും അപര്യാപ്ത മാണന്നാണ് നാട്ടുകാര്‍ പറയുന്നത്.
ശബരിമല തീര്‍ത്ഥാടകര്‍ക്കായി എരുമേലിയിലെ സ്വകാര്യ വ്യക്തികള്‍ നടത്തുന്ന കക്കൂസ് സമുച്ചയങ്ങള്‍ക്ക് സീവേജ് ട്രീറ്റ്‌മെന്റ് സ്ഥാപിക്കണമെന്ന കോടതി നിര്‍ദേശവും പാലിക്കപ്പെട്ടില്ല. കോടതിയുടേയും , ആരോഗ്യ വകുപ്പിന്റേയും ഈ നിര്‍ദേശം ചില രാഷ്‌ട്രീയ ഇടപെടലുകളെ തുടര്‍ന്ന് അട്ടിമറിക്കപ്പെടുകയായിരുന്നുവെന്നും നാട്ടുകാര്‍ പറഞ്ഞു. തീര്‍ത്ഥാടന അവലോകനങ്ങളില്‍ സീവേജ് ട്രീറ്റ്‌േെമാന്റ് പ്ലാന്റ് സ്ഥാപിക്കാത്ത കക്കൂസ് സമുച്ചയങ്ങള്‍ക്ക് പഞ്ചായത്ത് ലൈസന്‍സ് നല്‍കരുതെന്ന നിര്‍ദേശവും ഉയര്‍ന്നു വന്നിട്ടുണ്ടങ്കിലും പാലിക്കപ്പെട്ടിട്ടില്ല. മലയോര മേഖലയിലെ ജനങ്ങളുടെ ആരോഗ്യം സംരക്ഷിക്കാന്‍ എരുമേലിയിലെ കക്കൂസ് സമുച്ചയങ്ങളിലെ മാലിന്യ പ്രശ്‌നം അടിയന്തിരമായി പരിഹരിക്കുന്നതിന് ശക്തമായ നടപടിയെടുക്കണമെന്ന് നാട്ടുകാര്‍ ആവശ്യപ്പെട്ടു.
