നിരവില്പ്പുഴ : അന്യജില്ലകളില്നിന്നും വ്യാപകമായ രീതിയില് വയനാട്ടിലേക്ക് മാലിന്യംകൊണ്ടുവന്ന് തള്ളുന്ന ഏഴോളം വാഹനങ്ങള് നിരവില്പ്പുഴയില് യുവമോര്ച്ച പ്രവര് ത്തകര് തടഞ്ഞു.
ഒരു ജില്ലയില്നിന്നും മറ്റ് ജില്ലകളിലേക്ക് മാലിന്യം കൊണ്ടുപോകാന് നിയമമില്ലെന്നിരിക്കെയാണ് വ്യാപകമായി വാഹനങ്ങളില് മാലിന്യം കയറ്റി വയനാട്ടിലെ സ്ഥലങ്ങളില് തള്ളുന്നത്. കല്ലാച്ചി, കുറ്റിയാടി മേഖലകളിലെ ഇറച്ചിക്കടകളില്നിന്നും മറ്റും കിലോക്ക് 14 രൂപ തോതില് വാങ്ങിയാണ് മാലിന്യമാഫിയ വയനാട്ടിലേക്ക് വാഹനങ്ങളില് മാലിന്യം കൊണ്ടുവന്നുതള്ളുന്നത്.
ജില്ലയിലെ പന്നിഫാമുകളുടെ പേരില് കൊണ്ടുവരുന്ന മാലിന്യം ചുരത്തിലും വനപ്രദേശങ്ങളിലും പുഴയിലും തോടുകളിലും കുടിവെള്ള സ്രോതസ്സുകളിലും നിക്ഷേപിക്കുമ്പോള് അധികൃതര് നോക്കുകുത്തിയായിരിക്കുകയാണ്. മഴക്കാലമായതോടെ ഇത്തരത്തിലുള്ള മാലിന്യനിക്ഷേപം വലിയതോതിലുള്ള സാംക്രമികരോഗങ്ങള് പടര്ന്നുപിടിക്കാന് ഇടയാക്കും. അനധികൃതമായി പ്രവര്ത്തിക്കുന്ന പന്നിഫാമുകളുടെ മറവിലും മറ്റുമാണ് മാലിന്യവാഹനങ്ങള് ജില്ലയിലേക്കെത്തുന്നത്. മാനന്തവാടി നഗരസഭയിലെ ഭൂരിപക്ഷം പന്നിഫാമുകളും ലൈസന്സില്ലാതെയാണ് പ്രവര്ത്തിക്കുന്നത്. പല സ്ഥലങ്ങളിലും ഇതിനെതിരെ നാട്ടുകാര്തന്നെ രംഗത്തെത്തിയിരുന്നു. പ്രദേശവാസികള് കളക്ടറടക്കമുള്ളവര്ക്ക് പരാതി നല്കിയിട്ടും ഒരു നടപടിയും സ്വീകരിക്കാന് തയ്യാറായിട്ടില്ല. ഈ സാഹചര്യത്തിലാണ് യുവമോര്ച്ചയുടെ നേതൃത്വത്തില് മാലിന്യവാഹനങ്ങള് തടയാന് തീരുമാനിച്ചത്.
യുവമോര്ച്ച ജില്ലാപ്രസിഡണ്ട് അഖില്പ്രേം സി, സംസഥാന സമിതിയംഗം ടി.എം.സുബീഷ്, ജില്ലാ ജനറല്സെക്രട്ടറി ജിതിന്ഭാനു, എം.ആര്.അജീഷ്, ശ്യാംകുമാര്, രാമന് തുടങ്ങിയവര് നേതൃത്വം നല്കി.
