കോഴിക്കോട്: ഗുണ്ടാപ്പിരിവ് നടത്തിയ ഹനുമാന് സേന പ്രവര്ത്തകരെ പൊലീസ് അറസ്റ്റ് ചെയ്തു. കെട്ടിട നിര്മാണ കരാറുകാരനെ ഭീഷണിപ്പെടുത്തിയ ഹനുമാന്സേന ജില്ലാ സെക്രട്ടറിയടക്കം നാല് പ്രവര്ത്തകരെയാണ് നല്ലളം പൊലീസ് പിടികൂടിയത്. ജില്ലാ സെക്രട്ടറി ബേപ്പൂര് കരുവന്തറ ദിജില്ദാസ്(27), നോര്ത്ത ബേപ്പൂര് കച്ചാട്ട് വീട്ടില് വിബീഷ്(27), ബേപ്പൂര് നടുവട്ടം സ്വദേശി തേറമ്പാട്ടില് അനൂപ്(24), ഗുരുവായൂരപ്പന് കോളജിനു സമീപത്തുള്ള നരീക്കര വീട്ടില് ബൈജു(36) എന്നിവരാണ് അറസ്റ്റിലായത്. വന് നഗരങ്ങളില് കണ്ടു വരുന്ന രീതിയില് കെട്ടിട നിര്മാതാക്കളെയും കരാറുകാരെയും ഭീഷണിപ്പെടുത്തി പണം പിരിക്കുന്ന രീതിയാണ് ഇവര് സ്വീകരിച്ചത്.
മുംബൈ പോലുള്ള നഗരങ്ങളില് ഫഌറ്റ് നിര്മ്മാതാക്കളെ ഭീഷണിപ്പെടുത്തി പണം തട്ടുന്ന രീതിയിലാണ് പ്രതികള് നാലു പേരും പാലാഴി ഹൈലൈറ്റ് മാളിനോടനുബന്ധമായി നിര്മ്മാണ പ്രവൃത്തി നടത്തുന്ന കരാറുകാരനെ സമീപിച്ചത്.
കഴിഞ്ഞ 24നും 26നുമായിരുന്നു സംഭവം. 24ന് നിര്മ്മാണ സ്ഥലത്തെത്തുകയും 50000 രൂപ കരാറുകാരനില് നിന്ന് ആവശ്യപ്പെടുകയായിരുന്നു. ഇതിന് ശേഷം 26ന് ഇവര് വീണ്ടുമെത്തി ഒരു ലക്ഷം രൂപ കൂടി ആവശ്യപ്പെട്ടു. പണം നല്കിയില്ലെങ്കില് നിര്മ്മാണ പ്രവര്ത്തനം തടസപ്പെടുത്തുമെന്ന് ഭീഷണിപ്പെടുത്തകയും ചെയ്തു. ഇതേ തുടര്ന്ന് കരാറുകാരനായ ചാലിയം സ്വദേശി അബ്ദുള്നാസര് നല്ലളം പൊാലീസില് പരാതി നല്കുകയായിരുന്നു. പ്രതികളെ ജുഡീഷ്യല് മജിസ്ട്രേറ്റ് കോടതി റിമാന്ഡ് ചെയ്തു.
