കണ്ണൂര്: തളാപ്പ് അമ്പാടിമുക്ക് കേന്ദ്രീകരിച്ച് പ്രവര്ത്തിക്കുന്ന സിപിഎം ക്രിമിനല് സംഘത്തെ വെള്ളപൂശാന് പാര്ട്ടി നേതൃത്വത്തിന്റെ വ്യാജപ്രചാരണം. ഒരു കോണ്ഗ്രസ്സ് നേതാവിന്റെ വീടാക്രമിക്കാന് അമ്പാടി മുക്കിലെ ആര്എസ്എസ് പ്രവര്ത്തകര് പദ്ധതിയിട്ടുവെന്ന വ്യാജ പ്രചാരണമാണ് സിപിഎം നേതാവ് പി.ജയരാജനും പാര്ട്ടി പത്രവും പടച്ചുവിട്ടത്. അമ്പാടിമുക്കിലെ ആര്എസ്എസ് പ്രവര്ത്തകനായ രജീഷിനെ കഴിഞ്ഞ ദിവസം പോലീസ് അറസ്റ്റ് ചെയ്തിരുന്നു. എന്നാല് അറസ്റ്റ് കഴിഞ്ഞ് മണിക്കൂറുകള്ക്കകം കെ.സുധാകരന്റെ വീടാക്രമിക്കാനെത്തിയവരെയാണ് പോലീസ് അറസ്റ്റ് ചെയ്തതെന്ന ജയരാജന്റെ പ്രസ്താവനയാണ് ഇപ്പോള് സംശയാസ്പദമായി നിലനില്ക്കുന്നത്. രജീഷിനെ പോലീസ് ചോദ്യം ചെയ്യുന്നതിന് മുന്പായിരുന്നു ജയരാജന്റെ വിവാദമായ പ്രസ്താവന. കതിരൂര് മനോജ് വധക്കേസില് പ്രതിയായി നാടുകടത്തപ്പെട്ട സിപിഎം ജില്ലാ സെക്രട്ടറി പി.ജയരാജന് കണ്ണൂര് ജില്ലയില് പ്രവേശിച്ച ദിവസം തന്നെയാണ് ഇത്തരം നുണപ്രചാരണത്തിന് തുടക്കം കുറിച്ചതെന്നതും ശ്രദ്ധേയമാണ്.
സമീപകാലത്തായി കണ്ണൂര് തളാപ്പ് അമ്പാടിമുക്ക് കേന്ദ്രീകരിച്ച് നിരവധി അക്രമസംഭവങ്ങളാണ് അരങ്ങേറുന്നത്. നിരവധി ക്രിമിനല്ക്കേസുകളില് പ്രതിയായ ജയരാജന്റെ സന്തതസഹചാരി ധീരജ് കുമാര് എന്നയാളാണ് അക്രമങ്ങള്ക്ക് നേതൃത്വം നല്കുന്നത്. ബ്ലേഡ് മാഫിയാ തലവനായ ഇയാള് പോലീസിനെ അക്രമിച്ചതുള്പ്പടെ നിരവധി ക്രിമിനല് കേസുകളില് പ്രതിയാണ്. സിപിഎം അധികാരത്തില് വന്നാല് ടൗണ് സ്റ്റേഷന് തങ്ങള് ഭരിക്കുമെന്നും ഇവിടെ നിരവധി തലകളുരുളുമെന്നും കഴിഞ്ഞ ദിവസം ധീരജ് പരസ്യമായി വെല്ലുവിളി നടത്തിയിരുന്നു. പണം പലിശക്ക് നല്കി ബ്ലേഡ് മാഫിയാ തലവനായി വളര്ന്ന ധീരജിനെയും, തനു എന്നയാളെയും ബിജെപിയില് നിന്ന് നേരത്തെ പുറത്താക്കിയിരുന്നു. എന്നാല് ബിജെപിയില് നിന്ന് പുറത്താക്കിയ ഉടന് തന്നെ എല്ലാ വാഗ്ദാനങ്ങളും നല്കി ജയരാജന് ഇവരെസിപിഎമ്മിലേക്ക് ആനയിക്കുകയായിരുന്നു. പതിമൂന്നോളം ക്രിമിനല് കേസില് പ്രതിയായ ധീരജ് കുമാര് സിപിഎം നേതൃത്വത്തിന്റെ ഒത്താശയോടെയാണ് ഇപ്പോള് പണം കൊള്ളപ്പലിശക്ക് നല്കുന്നത്. അമ്പാടി മുക്കില് പോലീസിനെ ബോംബെറിഞ്ഞ കേസിലും, ഫൈനാന്സ് റെയ്ഡിന് വന്ന പോലീസുകാരെ ആക്രമിച്ച കേസിലും ധീരജ് പ്രതിയാണ്. 2011 തളാപ്പ് അമ്പലത്തിലെ തെരഞ്ഞെടുപ്പ് ദിവസം ഭക്തി സംവര്ദ്ധിനി യോഗത്തില് ബൂത്ത് കത്തിച്ചതിലും, തളാപ്പ് അമ്പലത്തിലെ സെക്രട്ടറി പവിത്രനെ ഓഫീസില് കയറി അക്രമിച്ച കേസിലുമുള്പ്പടെ ഇയാള് പ്രതിയാണ്.
പി.ജയരാജന് സിപിഎം ജില്ലാ സെക്രട്ടറിയായതിന് ശേഷമാണ് കണ്ണൂര് ജില്ലയില് രാഷ്ട്രീയ അക്രമങ്ങള് വര്ധിച്ചത്. നേരത്തെ കൂത്തുപറമ്പില് ആര്എസ്എസ് പ്രവര്ത്തകന് പി.പി.മോഹനനെയും, തളിപ്പറമ്പ് അരിയിലെ ഷുക്കൂറിനെയും മൃഗീയമായി കൊലപ്പെടുത്തിയ കേസില് ജയരാജന് പ്രതി ചേര്ക്കപ്പെട്ടിരുന്നു. ഷുക്കൂര് കേസിന്റെ അന്വേഷണത്തെ സിപിഎമ്മിലെ ചില നാട്ടുരാജക്കന്മാര് ചേര്ന്ന് അട്ടിമറിച്ചു എന്ന ആരോപണത്തിന്റെ അടിസ്ഥാനത്തില് ഇപ്പോള് സിബിഐ അന്വേഷണം നടക്കുകയാണ്. നിലവില് രണ്ട് കൊലക്കേസുകളില് പ്രതിയായ പി.ജയരാജന് തന്നെയാണ് നുണപ്രചാരണത്തിന് പിന്നില്. അമ്പാടിമുക്കിലെ സിപിഎം ക്രിമിനല് സംഘങ്ങള്ക്ക് എല്ലാ ഒത്താശയും ചെയ്ത് കൊടുക്കുന്ന ജയരാജന്റെ കണ്ണൂരിലേക്കുള്ള തിരിച്ചുവരവിനെ ഭയപ്പാടോടെയാണ് സമാധാന കാംക്ഷികള് കാണുന്നത്.
