കൊച്ചി: പ്രകൃതി സംരക്ഷണത്തെ കുറിച്ച് ജനങ്ങള്ക്ക് അവബോധമുണ്ടാക്കുവാന് ഹരിത ട്രൈബ്യൂണലിന് സാധിക്കുമെന്ന് ട്രൈബ്യൂണല് സ്പെഷ്യല് സര്ക്ക്യൂട്ട് ബെഞ്ച് അധ്യക്ഷന് ജസ്റ്റീസ് സ്വതന്തര് കുമാര് അഭിപ്രായപ്പെട്ടു. കൊച്ചിയിലെ ഹരിത ട്രൈബ്യൂണലിന്റെ സ്പെഷ്യല് സര്ക്യൂട്ട് ബെഞ്ച് ഉദ്ഘാടനത്തോടനുബന്ധിച്ച് സംസാരിക്കുകയായിരുന്നു അദ്ദേഹം. പ്രകൃതിക്ക് നമ്മുടെ ആവശ്യമില്ല മറിച്ച് നമുക്ക് ആണ് പ്രകൃതിയെ വേണ്ടത്. ഈ തിരിച്ചറിവ് ജനങ്ങള്ക്കുണ്ടെങ്കില് ഇത്തരത്തിലൊരു ട്രൈബ്യൂണലിന്റെ ആവശ്യം വരുന്നില്ലയെന്നും അദ്ദേഹം പറഞ്ഞു. 2014ല് ആറുമാസം കൊണ്ട് ബെഞ്ച് 82 കേസുകള്ക്ക് തീര്പ്പ് കല്പ്പിച്ചതും അദ്ദേഹം ചൂണ്ടിക്കാട്ടി.
ഹരിത ട്രൈബ്യൂണിലിന്റെ കൊച്ചിയിലെ സ്പെഷ്യല് സര്ക്ക്യൂട്ട് ബെഞ്ചിന്റെ ഉദ്ഘാടനം ജസ്റ്റീസ് തോട്ടത്തില് ബി.രാധാകൃഷ്ണന് നിര്വഹിച്ചു. ഓരോ വ്യക്തിയും സ്വയം വിലയിരുത്തുന്നതിനുള്ള സമയമാണിത്. നിലവിലെ സാഹചര്യങ്ങളെക്കാളേറെ വരാനിരിക്കുന്ന തലമുറയ്ക്ക് നല്ലൊരു പ്രകൃതിയെ സമ്മാനിക്കേണ്ടത് നമ്മുടെ ഉത്തരവാദിത്വമാണെന്ന് അദ്ദേഹം ഓര്മ്മിപ്പിച്ചു.
കേരള ഹൈക്കോടതി അഡ്വക്കേറ്റ്സ് അസോസിയേഷന് ഹാളില് നടന്ന ചടങ്ങില് കേരള ഹൈക്കോര്ട്ട് അഡ്വക്കേറ്റ് അസോസിയേഷന് പ്രസിഡന്റ് എസ്.യു നാസര് അധ്യക്ഷത വഹിച്ചു. അസോസിയേഷന് സെക്രട്ടറി ജഗന് എബ്രഹാം, എം.ജോര്ജ്, അഡ്വക്കേറ്റ് ജനറല് കെ.പി.ദണ്ഡപാണി, അസിസ്റ്റന്റ് സോളിസിറ്റര് ജനറല് എന് നാഗരേഷ്, അസോസിയേഷന് വൈസ് പ്രസിഡന്റ് കൃഷ്ണദാസ് പി.നായര് തുടങ്ങിയവര് സംസാരിച്ചു.
