കോഴിക്കോട്: നിയമസഭാ തെരഞ്ഞെടുപ്പിന്റെ തിരക്കുകള് കഴിഞ്ഞെങ്കിലും സ്ഥാനാര്ത്ഥികള് വിശ്രമത്തിലൊന്നുമല്ല. മുതിര്ന്ന രാഷ്ട്രീയ പ്രവര്ത്തകരെന്ന നിലയില് അവരുടെ പ്രവര്ത്തനങ്ങള് തുടര്ന്നുകൊണ്ടിരിക്കുകയാണ്. പതിവുകള്ക്ക് മാറ്റമില്ല.
ബേപ്പൂര് നിയോജകമണ്ഡലം എന്ഡിഎ സ്ഥാനാര്ത്ഥി അഡ്വ. കെ.പി.പ്രകാശ് ബാബു കേരളത്തിലെ ജനങ്ങളെ ദുഃഖത്തിലാഴ്ത്തിയ ജിഷയുടെ മരണവുമായി ബന്ധപ്പെട്ട് സംസ്ഥാന സര്ക്കാരിന്റെയും പോലീസിന്റെയും അനാസ്ഥക്കെതിരെ സമരപരിപാടികള് ആവിഷ്കരിക്കാന് പെരുമ്പാവൂരിലേക്കുള്ള യാത്രയിലാണ്.
കോഴിക്കോട് നോര്ത്ത് മണ്ഡലം സ്ഥാനാര്ത്ഥി കെ.പി. ശ്രീശനാവട്ടെ മാധ്യപ്രവര്ത്തകരുമായുള്ള സംവാദം ഇനിയും കഴിഞ്ഞിട്ടില്ല. കൂടാതെ ജില്ലയിലെയും മറ്റു മണ്ഡലങ്ങളിലെയും പ്രവര്ത്തനങ്ങള് വിലയിരുത്തുന്നതിന്റെ യോഗങ്ങളുടെ തിരക്കിലുമാണ്.
കുറ്റിയാടി നിയോജകമണ്ഡലം സ്ഥാനാര്ത്ഥി രാമദാസ് മണലേരി ഏറെ തിരക്കിലാണ്. തെരഞ്ഞെടുപ്പിനോടനുബന്ധിച്ച് വിവിധ സ്ഥലങ്ങളില് സിപിഎം അക്രമത്തില് പരിക്കേറ്റ പ്രവര്ത്തകരെ സന്ദര്ശിക്കുന്നു. അവരുടെ വീടുകളില് ബന്ധുക്കളെ നേരില് കണ്ട് ആശ്വസിപ്പിക്കുന്നു. പ്രവര്ത്തക യോഗങ്ങള് നടന്നുവരുന്നു. നാദാപും നിയോജകമണ്ഡലം സ്ഥാനാര്ത്ഥി എം.പി. രാജന് എടച്ചേരി പഞ്ചായത്തിലെ സംഘര്ഷബാധിത പ്രദേശങ്ങള് സന്ദര്ശിച്ചു. കുമ്പളച്ചോലയില് കാറ്റില് തകര്ന്ന വീടുകളും സന്ദര്ശിച്ചു.
വടകര നിയോജകമണ്ഡലം സ്ഥാനാര്ത്ഥി എം. രാജേഷ്കുമാര് കോടതിയില് പോയിത്തുടങ്ങിയിട്ടില്ല. പ്രവര്ത്തകരെ നേരില് കാണുകയും അവലോകന യോഗങ്ങളില് പങ്കെടുക്കുകയും ചെയ്യുന്നു. പ്രവര്ത്തകരോടൊപ്പം അവലോകന യോഗവും നടത്തി.
കൊയിലാണ്ടി നിയോജകമണ്ഡലം സ്ഥാനാര്ത്ഥി രജിനേഷ് ബാബു ഒരു സിനിമയുടെ പൂജയില് പങ്കെടുത്ത ശേഷം കൊയിലാണ്ടിയിലുള്ള മരണ വീട് സന്ദര്ശിച്ചു. വൈകുന്നേരം പാര്ട്ടി അവലോകന യോഗവുമുണ്ട്.
തിരുവമ്പാടി മണ്ഡലം സ്ഥാനാര്ത്ഥി ഗിരി പാമ്പനാല് രാവിലെ ക്ഷേത്ര ദര്ശനം നടത്തി. കൂടാതെ കൂടരഞ്ഞിയില് നടന്ന സിപിഎം അക്രമത്തില് പരിക്കേറ്റ് ശാന്തി ഹോസ്പിറ്റലില് കഴിയുന്ന പ്രവര്ത്തകരെയും കണ്ടു. വൈകുന്നേരം പാര്ട്ടി അവലോകന യോഗവുമുണ്ട്.
കൊടുവള്ളി സ്ഥാനാര്ത്ഥി അലി അക്ബറിനാവട്ടെ ഇന്ന് തിരക്കൊഴിഞ്ഞ ദിവസമായിരുന്നു. മണ്ഡലത്തില് തനിക്കനുകൂലമായ വോട്ടുകള് അവലോകനം ചെയ്യുകയും പ്രവര്ത്തകരെ കാണുകയും ചെയ്തു.
എലത്തൂര് നിയോജകമണ്ഡലം സ്ഥാനാര്ത്ഥി വി.വി. രാജന് സംഘര്ഷത്തില് പരിക്കേറ്റ പ്രവര്ത്തകര്ക്കൊപ്പമാണ് ഇന്നലെ ചെലവഴിച്ചത്. വൈകിട്ട് പ്രവര്ത്തന അവലോകന യോഗം ഉണ്ട്.
ബാലുശ്ശേരി നിയോജകമണ്ഡലം സ്ഥാനാര്ത്ഥി പി.കെ. സുപ്രന് തിരക്കൊഴിഞ്ഞ ഈ ദിവസം തന്റെ കുടുംബാംഗങ്ങളോടൊപ്പം ചെലവഴിക്കുകയായിരുന്നു.
പേരാമ്പ്ര നിയോജകമണ്ഡലത്തിലെ സ്ഥാനാര്ത്ഥി സുകുമാരന് നായര് പ്രവര്ത്തകരോടൊപ്പം ചര്ച്ചയിലാണ്. 3 മണിമുതല് 4 മണിവരെ അവലോകനയോഗവും ഉണ്ട്.
