തിരുവനന്തപുരം: നിയമസഭാ തെരഞ്ഞെടുപ്പിനുള്ള ക്രമീകരണങ്ങള് പൂര്ത്തിയായി. ജില്ലയിലെ ബൂത്തുകള് നൂറു ശതമാനവും വോട്ടെടുപ്പിനു സജ്ജമായിക്കഴിഞ്ഞെന്ന് ജില്ലാ വരണാധികാരിയായ കളക്ടര് ബിജു പ്രഭാകര് അറിയിച്ചു.
ഇന്നലെ ഉച്ചയോടെ ബന്ധപ്പെട്ട വിതരണ കേന്ദ്രങ്ങളില് നിന്ന്് പോളിംഗ് സാമഗ്രികളേറ്റുവാങ്ങി പോലീസ് അകമ്പടിയോടെ പോളിംഗ് ഉദ്യോഗസ്ഥര് അതത് പോളിംഗ് സ്റ്റേഷനുകളിലെത്തി. പോളിങ്ങിനാവശ്യമായ അനുബന്ധ സാമഗ്രികളടങ്ങിയ കിറ്റ് ബന്ധപ്പെട്ട സെക്ടറല് ഓഫീസര്മാര് പോളിംഗ് ബൂത്തുകളിലെത്തിച്ചതോടെ വോട്ടെടുപ്പിനുള്ള സാങ്കേതിക ഒരുക്കങ്ങള് പൂര്ണമായി.
പോളിങ് ജോലികള്ക്ക് നിയുക്തരായ പ്രിസൈഡിംഗ് ഓഫീസര്മാര്ക്കും ബന്ധപ്പെട്ട ഉദ്യോഗസ്ഥര്മാര്ക്കും വിതരണകേന്ദ്രങ്ങളിലെ നടപടിക്രമങ്ങള് ഇക്കുറി അനായാസമായിരുന്നു. പോളിംഗ് സാമഗ്രികള് ഏറ്റുവാങ്ങാന് എത്തുന്നവര്ക്ക് ആശയക്കുഴപ്പമില്ലാതെ നടപടികള് പൂര്ത്തിയാക്കാനാവശ്യമായ മുന്നൊരുക്കങ്ങള് നടത്തിയിരുന്നു. പല സ്ഥലങ്ങളില് നിന്നെത്തുന്ന പോളിംഗ് ഉദ്യോഗസ്ഥര്ക്ക് പരസ്പരം ബന്ധപ്പെടാനും നിയമന ഉത്തരവു മുതല് ബസ് റൂട്ട് നമ്പര് വരെയുള്ള നടപടിക്രമങ്ങള് പൂര്ത്തിയാക്കാനുമുള്ള മാര്ഗരേഖ എല്ലാ വിതരണകേന്ദ്രങ്ങളിലും വിതരണം ചെയ്തിരുന്നു.
പോളിംഗ് സാമഗ്രികള് കൈപ്പറ്റിയ ശേഷം ഉദ്യോഗസ്ഥര്ക്ക് അവയുടെ കൃത്യത ഉറപ്പുവരുത്താനും വിശ്രമിക്കാനും സമയം കിട്ടി. ആവശ്യക്കാര്ക്ക് ഹെല്പ് ഡെസ്കുകളുടെ സേവനവും ലഭ്യമായിരുന്നു. കുടുംബശ്രീ ക്യാന്റീനുകളില് നിന്ന് ഭക്ഷണ പാര്സലുകളും ജയില് വകുപ്പിന്റെ ജയില് ചപ്പാത്തി, ചിക്കന്കറി, ബിരിയാണി പാഴ്സലുകളും വിതരണകേന്ദ്രങ്ങളില് ലഭ്യമായതിനാല് ഭക്ഷണം തേടി ഉദ്യോഗസ്ഥര്ക്ക് മറ്റിടങ്ങളില് അലയേണ്ടി വന്നില്ല. ഉദ്യോഗസ്ഥര്ക്ക് ശാരീരിക അസ്വസ്ഥതകളുണ്ടായാല് പ്രഥമശുശ്രൂഷ നല്കുന്നതിനും ആശുപത്രിയിലെത്തിക്കുന്നതിനും ആരോഗ്യ വകുപ്പിന്റെ ആംബുലന്സുകളും സജ്ജമായിരുന്നു.
എസ്.എന്. കോളേജ് വര്ക്കല (വര്ക്കല), ഗവ. ബോയ്സ് ഹയര് സെക്കന്ഡറി സ്കൂള് ആറ്റിങ്ങല് (ആറ്റിങ്ങല്, ചിറയിന്കീഴ്), ടെക്നിക്കല് ഹൈസ്കൂള്, മഞ്ച (നെടുമങ്ങാട്), ഗവ.ഗേള്സ്് ഹയര് സെക്കന്ഡറി സ്കൂള്, നെടുമങ്ങാട്് (വാമനപുരം), ഗവ.വിഎച്ച്എസ്എസ്,് കഴക്കൂട്ടം (കഴക്കൂട്ടം), പിഎഎന്എം എച്ച്എസ്എസ്്, പേരൂര്ക്കട (വട്ടിയൂര്ക്കാവ്), ടീച്ചേഴ്സ് ട്രെയിനിങ് ഇന്സ്റ്റിറ്റിയൂട്ട്, മണക്കാട് (തിരുവനന്തപുരം), ശ്രീ സ്വാതിതിരുനാള് സംഗീത കോളേജ്, തിരുവനന്തപുരം (നേമം), ഗവ. വിഎച്ച്എസ്എസ്് (ബിഎച്ച്എസ്) മഞ്ച, നെടുമങ്ങാട്് (അരുവിക്കര), ഗവ. വിഎച്ച്എസ്എസ്, പാറശ്ശാല (പാറശ്ശാല), ക്രിസ്ത്യന് കോളേജ,് കാട്ടാക്കട (കാട്ടാക്കട), ഗവ. ഗേള്സ്് ഹയര് സെക്കന്ഡറി സ്കൂള്, നെയ്യാറ്റിന്കര (കോവളം), ഗവ. ബോയ്സ്് ഹയര് സെക്കന്ഡറി സ്കൂള്, നെയ്യാറ്റിന്കര (നെയ്യാറ്റിന്കര) എന്നിവിടങ്ങളിലാണ്് വിതരണകേന്ദ്രങ്ങള് സജ്ജമാക്കിയിരുന്നത്്.
