ആലുവ: ഒന്നര മാസത്തിലേറെ നീണ്ടുനിന്ന തിരഞ്ഞെടുപ്പ് പ്രചരണത്തിന്റെ കൊട്ടിക്കലാശം ഇന്ന് നടക്കും. ഇതോടനുബന്ധിച്ച് ആലുവയില്‍ മൂന്ന് മുന്നണി സ്ഥാനാര്‍ത്ഥികളുടെയും റോഡ്‌ഷോയും ഉണ്ടാകും. പതിവില്‍ നിന്നും വ്യത്യസ്തമായി ഇക്കുറി വൈകിട്ട് ആറിനാണ് പരസ്യ പ്രചരണം അവസാനിക്കുന്നത്.
കൊട്ടിക്കലാശത്തിനിടെ പ്രവര്‍ത്തകര്‍ തമ്മില്‍ സംഘര്‍ഷം ഉണ്ടാവാതിരിക്കാന്‍ ആലുവയില്‍ പോലീസ് നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. റെയില്‍വേ സ്‌റ്റേഷന്‍ സ്‌ക്വയറിലെ മൈക്ക് അനൗണ്‍സ്‌മെന്റ് പ്രചരണ വാഹനങ്ങള്‍ക്കാണ് നിയന്ത്രണമുള്ളത്. പമ്പ് കവലയില്‍ നിന്നും റെയില്‍വേ സ്‌റ്റേഷന്‍, കെഎസ്ആര്‍ടിസി കവല വഴി ഗവ ആശുപത്രി കവലയിലെത്തി ‘യു’ ടേണ്‍ ചെയ്ത് തിരികെ പമ്പ് കവലയിലേക്കെത്തുന്ന നിലയിലായിരിക്കണം പ്രചരണ വാഹനങ്ങള്‍ പോകേണ്ടത്. ഇതിനിടയില്‍ പ്രചരണ വാഹനങ്ങള്‍ ഒരു കാരണവശാലും തിരിയാന്‍ അനുവദിക്കില്ല. മാത്രമല്ല, ഇത്തരത്തില്‍ ഈ ഭാഗം മാത്രം കേന്ദ്രീകരിച്ചുള്ള പ്രചരണം അവസാന ഒരു മണിക്കൂര്‍ മാത്രമാണ് അനുവദിക്കുക. നിശ്ചിത സമയത്തിന് മുമ്പ് നഗരത്തിലേക്ക് പ്രചരണത്തിനെത്തുന്ന വാഹനങ്ങള്‍ നഗരം പൂര്‍ണമായി വലയം ചെയ്യണം.
ആലുവ സിഐ ടി.ബി. വിജയന്‍ വിവിധ രാഷ്‌ട്രീയ പാര്‍ട്ടി പ്രതിനിധികളുടെ യോഗം വിളിച്ചുചേര്‍ത്താണ് തീരുമാനമെടുത്തത്. കൊട്ടിക്കലാശം ഒഴിവാക്കണമെന്ന് പോലീസിന്റെ ഭാഗത്ത് നിന്നും നിര്‍ദ്ദേശമുണ്ടായെങ്കിലും മുന്നണികളുടെ പ്രതിനിധികള്‍ സമ്മതിച്ചില്ല. തുടര്‍ന്നാണ് നിയന്ത്രണം ഏര്‍പ്പെടുത്താന്‍ ധാരണയായത്. മുന്‍ കാലങ്ങളില്‍ കൊട്ടിക്കലാശത്തിനിടെ മുന്നണി പ്രവര്‍ത്തകര്‍ തമ്മില്‍ സംഘര്‍ഷവും തര്‍ക്കവും പതിവാണ്. മാത്രമല്ല, നഗരം ഗതാഗതക്കുരുക്കിലാവുകയും ചെയ്യുമായിരുന്നു. ഈ സാഹചര്യം ഒഴിവാക്കാനായിരുന്നു പോലീസിന്റെ ശ്രമം.
യുഡിഎഫ് സ്ഥാനാര്‍ത്ഥി അന്‍വര്‍ സാദത്തും എല്‍ഡിഎഫ് സ്ഥാനാര്‍ത്ഥി വി. സലീമും എന്‍.ഡി.എ സ്ഥാനാര്‍ത്ഥി ലതാ ഗംഗാധരനും തുറന്ന വാഹനത്തില്‍ റെയില്‍വേ സ്‌റ്റേഷന്‍ ഭാഗത്ത് കലാശക്കൊട്ടിനുണ്ടാകും. കൂടാതെ വെല്‍ഫെയര്‍പാര്‍ട്ടി, എസ്ഡിപിഐ, പിഡിപി, ജനസേവ കോണ്‍ഗ്രസ് പാര്‍ട്ടി സ്ഥാനാര്‍ത്ഥിയും കളത്തിലുണ്ടാവും.
പോളിംഗ് സ്‌റ്റേഷനില്‍ നിന്നും 200 മീറ്റര്‍ അകലത്തിലെ സ്ഥാനാര്‍ത്ഥികളുടെ സഌപ്പ് വിതരണ കേന്ദ്രം പാടുള്ളുവെന്നും ഇതിനിടയില്‍ പ്രചരണം പാടില്ലെന്നും പോലീസ് നിര്‍ദ്ദേശിച്ചിട്ടുണ്ട്.
ബാബു പുത്തനങ്ങാടി, ലത്തീഫ് പൂഴിത്തറ (യുഡിഎഫ്), രാജീവ് സക്കറിയ, കെ.ഐ. കുഞ്ഞുമോന്‍ (എല്‍ഡിഎഫ്), ശ്രീകാന്ത് നായിക്ക് (എന്‍ഡിഎ) എന്നിവരാണ് യോഗത്തില്‍ പങ്കെടുത്തത്.
