രാവണന്റെ പ്രഥമ പുത്രനായ മേഘനാദന് കാനീനന്, രാവണി, മായാവി, ഇന്ദ്രജിത്ത് എന്നിങ്ങനെ പല പേരുകളുമുണ്ട്. മണ്ഡോദരിയുടെ ഉദരത്തില് ഉണ്ടായിരുന്ന ശിവബീജത്തെപ്പറ്റി മുമ്പ് പറഞ്ഞിരുന്നു. രാവണന് മയനില്നിന്ന് മണ്ഡോദരിയെ വിവാഹം കഴിച്ചുകൊണ്ടുവന്നശേഷം ആ ശിവബീജം ഗര്ഭത്തില് വളര്ന്നു. അവനാണ് മേഘനാഥനായി ജനിച്ചത്. ജനിച്ച നിമിഷം തന്നെ ഇടിമുഴക്കംപോലെ കരഞ്ഞതുകൊണ്ടാണ് മേഘനാദന് എന്നുപേരിട്ടത്.
ശിവനാണ് മേഘനാദന്റെ ഗുരു. ശിവന് മേഘനാഥനോട് പുത്രവാത്സല്യവും ശിഷ്യവാത്സല്യവുമുണ്ടായിരുന്നു. അതിനാല് ഇന്ദ്രജാലം, മഹേന്ദ്രജാലം, ഖഗേന്ദ്രജാലം, നരേന്ദ്രജാലം, സുരേന്ദ്രജാലം, അഗ്നിസ്തംഭം, ജീവസ്തംഭം, ആകാശസഞ്ചാരം, പരകായപ്രവേശം, തിരോധാനം, രൂപമാറ്റം, തുടങ്ങിയ വിദ്യകളെല്ലാം അഭ്യസിപ്പിച്ചു. അതിനാല് മായാവിയെന്നും അറിയപ്പെടുന്നു.
ദേവേന്ദ്രനെ യുദ്ധത്തില് ജയിച്ചതുകൊണ്ട് ഇന്ദ്രജിത്ത് എന്നും അറിയപ്പെടുന്നു. അതുകഴിഞ്ഞ് ഇന്ദ്രജിത്ത് ബ്രഹ്മാവിനെ തപസ്സുചെയ്തു പ്രസാദിപ്പിച്ചു. അനേകം വരങ്ങളും സമ്പാദിച്ചു. അവ ദാനവര്ക്കോ, മാനവര്ക്കോ, രാക്ഷസര്ക്കോ, മറ്റാര്ക്കെങ്കിലുമോ ഇതുവരെ സമ്പാദിക്കാന് കഴിയാത്ത സിദ്ധികളാണ്. മുന്നോട്ടും പിന്നോട്ടും ഇടത്തോട്ടും വലത്തോട്ടും മുകളിലേക്കും താഴേക്കും കാട്ടിലും ജലത്തിലുമൊക്കെ സഞ്ചരിക്കാന് കഴിയുന്ന ഒരു വിമാനം ആയുധമേല്ക്കാത്ത ഒരു കഞ്ചുകം, അത്ഭുതകരമായ ചില ആയുധങ്ങള് എന്നിവ സമ്പാദിച്ചു.
മാത്രമല്ല പതിന്നാലു വര്ഷം ഉറങ്ങാതെയും ഭക്ഷണം കഴിക്കാതെയും ഇരിക്കുന്ന ഒരാള്ക്കു മാത്രമേ തന്നെ വധിക്കാന് കഴിയാവൂ എന്നു വരം വാങ്ങിയിട്ടുണ്ട്. ശ്രീരാമന്റെ കൂടെ വനവാസത്തിനു പുറപ്പെട്ടതു മുതല് ലക്ഷ്മണന് ഉറങ്ങുകയോ ഭക്ഷണം കഴിക്കുകയോ ചെയ്തിട്ടില്ല. അനന്തന് വായുമാത്രം കഴിച്ചും ഉറക്കംകൂടാതെയും കഴിയാന് സാധിക്കുമല്ലോ.
പ്രതികരിക്കാൻ ഇവിടെ എഴുതുക: