ചെന്നീര്‍ക്കര: ചെന്നീര്‍ക്കര പഞ്ചായത്തിലെ 4,5 വാര്‍ഡുകളിലെ ഉയര്‍ന്ന പ്രദേശമായ മലങ്കാവ് -തോട്ടത്തില്‍ മേഖലില്‍ കുടിവെള്ള ക്ഷാമം രൂക്ഷമാകുന്നു.
കൈപ്പട്ടൂരില്‍ആറ്റില്‍ നിന്നും പുത്തന്‍ പീടിക ഊട്ടുപാറ മലയില്‍ വെള്ളമെത്തിച്ചാണ് ഈ പ്രദേശങ്ങളില്‍ ജലവിതരണം നടത്തുന്നത്. ശനിയാഴ്ച രാത്രിമുതല്‍ ഞായറാഴ്ച രാത്രിവരെയാണ് ഈ ഭാഗത്തെ പമ്പിംഗ്. ഉയര്‍ന്ന പ്രദേശവും കൂടുതല്‍ കണക്ഷനുകള്‍ ഉള്ളതിനാലും നിലവിലുള്ള സംവിധാനങ്ങള്‍ അപര്യാപ്തമാണ്.
മോട്ടോര്‍ തകരാറുകളും പൈപ്പ് പൊട്ടുന്നതും പതിവായിരിക്കുകയാണ്. പത്തുവര്‍ഷത്തിലധികം പഴക്കമുള്ള മോട്ടോറാണ് പമ്പിംഗിനായി ഉപയോഗിക്കുന്നത്. കഴിഞ്ഞ ശനിയാഴ്ച മുതല്‍ ഈ മോട്ടോര്‍ തകരാറിലായിരിക്കുകയാണ്.
ജല വിതരണം പുനരാരംഭിക്കാന്‍ ഉടന്‍ നടപടി സ്വീകരിക്കണമെന്ന് മലങ്കാവ് പൗരസമിതി വൈസ് പ്രസിഡന്റ് ജോണ്‍സി മാത്യു ആവശ്യപ്പെട്ടു.
