തിരുവനന്തപുരം: എനിക്കറിയാം കുമ്മനത്തിനെ. ബിജെപിയുടെ പ്രസിഡന്റ് അല്ലെ, ഇത്തവണ വട്ടിയൂര്ക്കാവില് വിജയിക്കും. പ്രചാരണത്തിനിടെ ചെഷയര്ഹോം സന്ദര്ശിച്ച കുമ്മനത്തോട് ഇങ്ങനെ പറഞ്ഞത് അന്തേവാസി വസന്തകുമാരി. തുടര്ന്ന് ബിജെപിയുടെ ചരിത്രം മുഴുവനും പറഞ്ഞ് വസന്തകുമാരി കുമ്മനത്തിനെ പോലും ഞെട്ടിച്ചു. അന്ധയാണെങ്കിലും ശബ്ദം കേട്ട് ആളെ തിരിച്ചറിയാനുള്ള കഴിവ് വസന്തകുമാരിക്കുണ്ട്. ടിവിയില് കുമ്മനത്തിന്റെ ശബ്ദം കേട്ടുള്ള പരിചയമാണ് തിരിച്ചറിയാന് കാരണം.
പ്രവര്ത്തകരോടൊപ്പം ചെഷയര് ഹോം സന്ദര്ശിക്കാനെത്തിയ കുമ്മനം രാജശേഖരനെ ചെഷയര് ഹോം ഭാരവാഹികളും അന്തേവാസികളും അയല്വാസികളും ചേര്ന്ന് ഷാള് അണിയിച്ചാണ് സ്വീകരിച്ചത്. ഇത്തവണ ഒരു മാറ്റം വേണമെന്നുപറഞ്ഞാണ് ചെഷയര്ഹോമിലെ ഏറ്റവും പ്രായംകൂടിയ അന്തേവാസിയായ ചന്ദ്രന് കുമ്മനം രാജശേഖരനെ സ്വീകരിച്ചത്. തന്റെ അവസ്ഥയെക്കുറിച്ചും വേദനയെക്കുറിച്ചും കുമ്മനത്തിനോട് പറഞ്ഞു. ആലുവ സ്വദേശി ബേബി ജോണിനെയും അദ്ദേഹം കുമ്മനത്തെ പരിചയപ്പെടുത്തി.
ചെയര് ഹോമിലെ മുഴുവന് അന്തേവാസികളേയും നേരില് കണ്ട് കുശലാന്വേഷണം നടത്താനും കുമ്മനം സമയം കണ്ടെത്തി. വികലാംഗരായ തങ്ങള്ക്ക് വോട്ടുചെയ്യാന് പ്രത്യേകം സംവിധാനം ഒരുക്കണമെന്ന് കുമ്മനം രാജശേഖരനോട് അന്തേവാസികളില് പ്രായകൂടിയ ബാലകൃഷ്ണന് ആവശ്യപ്പെട്ടു. എല്ലാത്തിനും വഴികാട്ടാമെന്ന മട്ടില് കുമ്മനത്തിന്റെ ചിരി. സമൂഹത്തില് വേദനയനുഭവിക്കുന്നവര്ക്കും പീഡിതര്ക്കും വേണ്ടി താന് എന്നും നിലകൊള്ളുമെന്ന് സന്ദര്ശനത്തിന് ശേഷം കുമ്മനം പറഞ്ഞു.
ചെഷയര് ഹോമില് നിന്ന് ഇന്ഫന്റ് ജീസസ് കോണ്വെന്റിലേക്കാണ് കുമ്മനം പോയത്. മഠത്തിലെ മദര് സുപ്പീരിയറിനോട് അനുഗ്രഹം തേടിയാണ് കുമ്മനം യാത്ര തുടരുന്നത്. പ്രാര്ത്ഥനകളില് തന്നെക്കൂടി ഉള്ക്കൊള്ളിക്കണമെന്ന കുമ്മനത്തിന്റെ ആവശ്യത്തിന് തെളിഞ്ഞ പുഞ്ചിരിയായിരുന്നു സിസ്റ്ററിന്റെ മറുപടി.
ഇന്ന് രാവിലെ ക്ഷേത്രദര്ശനത്തോടെയായിരുന്നു പ്രചാരണത്തിന് തുടക്കം കുറിച്ചത്. തുടര്ന്ന് കല്യാണത്തിന് പങ്കെടുക്കാന് കോട്ടയ്ക്കകത്ത് പോയി. അതിനുശേഷം തിരിച്ച് മുട്ടട കിണവൂരില് എത്തിയ കുമ്മനത്തെ പ്രവര്ത്തകര് സ്വീകരിച്ചു. കിണവൂര് ബുത്ത് കമ്മിറ്റി ഓഫീസ് ഉദ്ഘാടനം ചെയ്തു. കിണവൂരില് നടന്ന കുടുംബയോഗത്തില് പങ്കെടുത്ത മണ്ഡലത്തിലെ വിജയത്തിന്റെ ആവശ്യകതയേക്കുറിച്ചും മണ്ഡലത്തിന്റെ പിന്നോക്കാവസ്ഥയെക്കുറിച്ചും സംസാരിച്ചു. മുട്ടടയില് പ്രവര്ത്തകരോടൊപ്പം ഉച്ചയൂണ്. തന്നോടൊപ്പമുള്ളവര്ക്ക് ഭക്ഷണം കിട്ടിയോയെന്ന് സ്നേഹപൂര്വ്വമായ അന്വേഷണ സമയത്ത് കുമ്മനത്തിന്റെ മുഖത്ത് വിരിയുന്നത് സ്നേഹനിധിയായ ഒരു കുടുംബനാഥന്റെ ഭാവം.
ചെറിയ ഒരു ഇടവേളയ്ക്കുശേഷം അദ്ദേഹം വീണ്ടും കര്മ്മഭൂമിയിലേക്കിറങ്ങി. ശാസ്തമംഗലത്തെ ഒരു മരണവീട്ടിലേക്കാണ് നേരെ പോയത്. പിന്നീട് നര്മ്മദാ ജംഗ്ഷനിലേക്ക്. അവിടെ കാത്തുനിന്ന പ്രവര്ത്തകരോടൊപ്പം ഗൃഹസമ്പര്ക്കത്തില്. അവിടുത്തെ എസ്എന്ഡിപി നേതാക്കന്മാരെ സന്ദര്ശിച്ച് വോട്ടുകള് ഉറപ്പാക്കിയ അദ്ദേഹം വീണ്ടും ഗൃഹസമ്പര്ക്കം തുടരുന്നു. കുറവന്കോണം ജംഗ്ഷനില് പര്യടനം ഇന്ന് അവസാനിച്ചു. ബിജെപി ആര്എസ്എസ് നേതാക്കളായ മഹേശ്വരന്, മധുക്കുട്ടന്, നന്ദകുമാര്, മനുസുന്ദര്.ആര്, അനിക്കുട്ടന്, രാജന് എന്നിവര് അദ്ദേഹത്തെ അനുഗമിച്ചു.
