കോലഞ്ചേരി: കുന്നത്തുനാട്ടിലെ ഇടത് വലത് രാഷ്‌ട്രീയ ശക്തികള്‍ക്കെതിരെയുള്ള ശക്തമായ മുന്നറിയിപ്പായാണ് ഇക്കുറി എന്‍ഡിഎ മത്സരരംഗത്തുള്ളത്. കാര്‍ഷിക മേഖലയായിരുന്ന കുന്നത്തുനാട്ടിലെ ജനങ്ങളുടെ ജീവനും സ്വത്തും ഇന്ന് മാഫിയകള്‍ക്ക് തീറെഴുതി നല്‍കിയിരിക്കുകയാണ്. വികസനത്തിന്റെ പേര് പറഞ്ഞ് കുന്നുകള്‍ ഇടിച്ച് നിരത്തി, പാറകള്‍ പൊട്ടിച്ചും പ്രദേശത്തിന്റെ ഭൂപ്രകൃതിയെ തന്നെ മാറ്റിമറിച്ചു. അടിസ്ഥാന ജനവിഭാഗങ്ങളാണ് കുന്നത്തുനാട്ടില്‍ ഭൂരിപക്ഷവും.
240 ല്‍ അധികം വരുന്ന പട്ടികജാതി-വര്‍ഗ്ഗ കോളനികളുള്ള ഇവിടെ ജനങ്ങളുടെ അടിസ്ഥാന വികസനം നടപ്പിലാക്കാനുള്ള ഉത്തരവാദിത്തംപോലും മുന്നണികള്‍ മറന്നിരിക്കുന്നു. ഇടതു വലതു മുന്നണികള്‍ മാറി ഭരിച്ചിരുന്ന മണ്ഡലത്തിലെ കോളനികളില്‍ കുടിവെള്ളംപോലും ലഭ്യമല്ല. വീട്, കക്കൂസ്, റോഡ്, വെള്ളം, വെളിച്ചം ഇവയെല്ലാം ഏറക്കുറേ ഇവിടുത്തുകാര്‍ക്ക് അന്യമാണ്. നിരവധി പേര് ഭൂരഹിതരും വീടില്ലാത്തവരുമാണ്. ഇത്തരിത്തിലുള്ള പ്രശ്‌നങ്ങള്‍ക്ക് പരിഹാരവുമായാണ് തുറവൂര്‍ സുരേഷ് ജനങ്ങളിലേയ്‌ക്ക് ഇറങ്ങിച്ചെല്ലുന്നത്.
ഭൂമി, വെള്ളം, തൊഴിലവസരങ്ങള്‍, കര്‍ഷകരുടെ പരാതികള്‍ക്കുള്ള ശാശ്വത പരിഹാരം തുടങ്ങിയ ഉറപ്പുകള്‍ ഇതിനോടകം പ്രഖ്യാപിച്ചു കഴിഞ്ഞു. കുടിവെള്ള ക്ഷാമം നേരിടുന്ന എട്ടു പഞ്ചായത്തുകളിലും കുടിവെള്ളമെത്തിക്കുക, പൊതുശ്മശാനം യാഥാര്‍ത്ഥ്യമാക്കുക. നൂതന സാങ്കേതിക വിദ്യയിലൂന്നിയ വികസനം എന്നിവ എന്‍ഡിഎയുടെ മുഖ്യ പ്രചരണ വിഷയമാണ്.
കെപിഎംഎസ് യൂത്ത് മൂവ്‌മെന്റ് പ്രവര്‍ത്തകനായി പൊതുപ്രവര്‍ത്തനം ആരംഭിച്ച തുറവൂര്‍ സുരേഷ് ബിഡിജെഎസ് സംസ്ഥാന നേതാവും കേരള പുലയര്‍ മഹാസഭ സംസ്ഥാന ട്രഷററാണ്. ചേര്‍ത്തല എസ്എന്‍ കോളേജില്‍ വിദ്യാര്‍ത്ഥി സംഘടന പ്രവര്‍ത്തനായിരുന്നു. പുലയര്‍ യൂത്ത് മൂവ്‌മെന്റ് സംസ്ഥാന പ്രസിഡന്റ്, സെക്രട്ടറി, കെപിഎംഎസ് സംഘടനാ സെക്രട്ടറി എന്നീ പദവികള്‍ വഹിച്ച സുരേഷ് തിരുവനന്തപുരം വെങ്ങാനൂര്‍ മഹാത്മാ അയ്യങ്കാളി യുപി സ്‌കൂള്‍ മാനേജരാണ്. ഹിന്ദു ഐക്യവേദി സാമൂഹ്യനീതി കര്‍മ്മസമിതിയുടെ കോര്‍കമ്മറ്റി അംഗവുമാണ്.
സിറ്റിംഗ് എംഎല്‍എയായ വി.പി.സജീന്ദ്രനാണ് യുഡിഎഫ് സ്ഥാനാര്‍ത്ഥി. നിയമസഭയിലേക്ക് നാലാം അങ്കം. വൈക്കത്തെ തുടര്‍ച്ചയായ രണ്ട് തോല്‍വികള്‍ക്ക്‌ശേഷം കുന്നത്തുനാട്ടിലേക്ക് രാഷ്‌ട്രീയചുവട് മാറ്റിയപ്പോള്‍ വിജയം വരിച്ചത് 2011ലാണ്. എല്‍ഡിഎഫിലെ എം.എ.സുരേന്ദ്രനെ 8732 വോട്ടുകള്‍ക്കാണ് കീഴടക്കിയത്. 1998, 2006 എന്നീ കാലയളവിലും ആയിരത്തിലധികം വോട്ടുകളുടെ പരാജയമാണ് നേരിട്ടത്.
ത്രിതല പഞ്ചായത്ത് തെരഞ്ഞെടുപ്പില്‍ വടവുകോട് ബ്ലോക്ക് പഞ്ചായത്ത് കടയിരുപ്പ് ഡിവിഷനില്‍ നിന്നും തെരഞ്ഞെടുക്കപ്പെട്ട അഡ്വ:ഷിജി ശിവജിയാണ് എല്‍ഡിഎഫ് സ്ഥാനാര്‍ത്ഥി. എറണാകുളം ലോ കോളേജില്‍ വിദ്യാര്‍ത്ഥി രാഷ്‌ട്രീയത്തിലൂടെ ചുവടുവയ്‌പ്പ്. ജനാധിപത്യ മഹിള അസോസിയേഷന്‍ പൂതൃക്ക പഞ്ചായത്ത് കമ്മറ്റി വൈസ് പ്രസിഡന്റാണ്. നിയമസഭയിലേക്ക് കന്നി മത്സരം.
