പള്ളുരുത്തി: ചലനശേഷി നഷ്ടപ്പെട്ടവരുടെ കുടുംബകൂട്ടായ്മയും കലാപരിപാടികളും ഹൃദ്യമായി. എറണാകുളം ജെഎന്ബി ഫൗണ്ടേഷന്റെ നേതൃത്വത്തിലാണ് തോപ്പുംപടി ബീയെം സെന്ററില് അപൂര്വ്വസംഗമം നടന്നത്.
വിവിധ അപകടങ്ങളില്പ്പെട്ട് ചലനശേഷി നഷ്ടപ്പെട്ടവരാണ് ഒത്തുകൂടിയത്. വാഹനാപകടത്തില്പ്പെട്ടവര്, മരത്തില്നിന്ന് വീണവര്, കെട്ടിടംനിര്മാണജോലിക്കിടെ പരിക്കേറ്റ് ചലനമറ്റവര് ഇവരെല്ലാം ഒരുദിവസം അവര്ക്കുവേണ്ടി നീക്കിവെക്കുകയായിരുന്നു.
എറണാകുളം ജില്ലയുടെ വിവിധ ഭാഗങ്ങളില്നിന്നും നാല്പതോളം കുടുംബങ്ങളാണ് തോപ്പുംപടിയില് സംഗമിച്ചത്. കൊച്ചൗസേഫ് ചിറ്റിലപ്പള്ളി സംഗമം ഉദ്ഘാടനം ചെയ്തു. ജെഎന്ബി ഫൗണ്ടേഷന് മാനേജിംഗ് ട്രസ്റ്റി നിമ്മി ദീപക് അധ്യക്ഷത വഹിച്ചു.
പരിപാടിയുടെ കോര്ഡിനേറ്റര് കൂടിയായ രാജീവ് പള്ളുരുത്തി സ്വാഗതം ആശംസിച്ചു. കൊച്ചി നഗരസഭാ പ്രതിപക്ഷനേതാവ് കെ.ജെ. ആന്റണി, നഗരസഭാംഗം കെ.കെ. കുഞ്ഞപ്പന്, സിനിമാതാരങ്ങളായ സാജന് പള്ളുരുത്തി, സീമാ ജി. നായര് എന്നിവര് ചടങ്ങില് പങ്കെടുത്ത് ആശംസകള് നേര്ന്നു. ഷാജി, ശരത്, അരുണ്, ശശികുമാര്, ബൈജു എന്നിവര് പാടിയ പഴയ പാട്ടുകള് സദസില് കയ്യടി ഉയര്ത്തി. സംഘടനയുടെ നേതൃത്വത്തില് നടന്ന പത്താമത് കുടുംബസംഗമമായിരുന്നു. ബെന്നി പുത്തന്പുരയ്ക്കല് നന്ദി പറഞ്ഞു.
