ആലുവ: ഇടവേളക്ക് ശേഷം പെരിയാറില് അനധികൃതമായ മണല് വാരല് വ്യാപകമാകുന്നു. പെരുമ്പാവൂര് മേഖലയിലെ ചില മണല് മാഫിയയുടെ നേതൃത്വത്തിലാണ് പെരിയാറില് മണല് വാരുന്നതെന്നാണ് ആക്ഷേപം.
മണല് വാരല് വ്യാപകമായതോടെ റൂറല് എസ്പി യതീഷ് ചന്ദ്രയുടെ നിര്ദ്ദേശപ്രകാരം സ്പെഷ്യല് ഷാഡോ പോലീസ് നടത്തിയ റെയ്ഡില് ഒരാള് അറസ്റ്റിലായി. മണല് നിറച്ച ലോറിയും കസ്റ്റഡിയിലെടുത്തു. ഇതോടെ വിവിധ കോണുകളില് നിന്നും ഉയര്ന്ന ആക്ഷേപങ്ങള് ശരിയാണെന്ന് ജില്ലാ പോലീസ് മേധാവിക്കും ബോധ്യമായിട്ടുണ്ട്. ഇന്നലെ പുലര്ച്ചെ നാലിന് ആലുവ മംഗലപ്പുഴ പാലംകടവില് നിന്നുമാണ് മണല് നിറക്കുന്നതിനിടെ കെ.എല് 3 എം 618 നമ്പര് മിനിലോറി ഷാഡോ പോലീസ് കസ്റ്റഡിയിലെടുത്തത്. ലോറി ഡ്രൈവര് ഇടപ്പള്ളി സ്വദേശി തപ്പുകുളം വീട്ടില് റബീഷ് ബഷീര് അറസ്റ്റിലായെങ്കിലും ലോറിയില് മണല് നിറച്ചിരുന്നവര് നീന്തി രക്ഷപ്പെട്ടു. അന്യസംസ്ഥാനക്കാരാണ് മണല് വാരിയതെന്ന് ഡ്രൈവറില് നിന്നും പോലീസിന് ലഭിച്ച വിവരം.
ഊമകത്തുകള്ക്ക് പുറമെ ഇന്നലെ പുലര്ച്ചെ ഫോണ് മുഖേന രഹസ്യവിവരവും കിട്ടയതിനെ തുടര്ന്നാണ് എസ്പി ഷാഡോ പോലീസിന് മിന്നല് റെയ്ഡിന് നിര്ദ്ദേശം നല്കിയത്. ലോക്കല് പോലീസും രാത്രി പട്രോളിംഗ് സംഘവും മണല് വാരല് തടയുന്നതിന് നടപടിയെടുക്കുന്നില്ല. മണല് ലോബിക്ക് ഒത്താശ ചെയ്ത് കൊടുക്കുന്നതായും ആക്ഷേപമുണ്ട്. ഈ സാഹചര്യത്തിലാണ് ഷാഡോ പോലീസ് മിന്നല് റെയ്ഡുമായി പുഴയോരത്ത് സജീവമാകുന്നത്.
സ്പെഷ്യല് ഷാഡോ പോലീസ് ടീമില് എഎസ്ഐ ജോയി, പൊലീസുകാരായ സജീവ് ചന്ദ്രന്, രാജേഷ് എന്നിവരും റെയ്ഡിനുണ്ടായിരുന്നു. ലോറിയും മണലും പ്രതിയേയും ആലുവ പോലീസിന്കൈമാറി.
