നമ്മുടെ നാട്ടില് ഓരോ അഞ്ചുവര്ഷം കഴിയുമ്പോഴും ഇടതുവലതു മുന്നണികളെ മാറി മാറി വിജയിപ്പിക്കുന്നത് ഒരിക്കലും അവരോടുള്ള സ്നേഹംകൊണ്ടൊന്നുമല്ല, മറിച്ച് നിലവിലെ ഭരണമുന്നണിയോടുള്ള വെറുപ്പ് കൊണ്ടാണ്. ഈ സത്യം ആര്ക്കാണ് അറിഞ്ഞുകൂടാത്തത്? ഏതുമുന്നണി ഭരിച്ചാലും അതിന്റെ ഗുണം ജനങ്ങള്ക്കാണോ അതോ രാഷ്ട്രീയ നേതാക്കള്ക്കാണോ എന്ന് ഇതിനകം നമ്മള് മനസിലാക്കിക്കഴിഞ്ഞു. ഒരുകാര്യം വളരെ വ്യക്തമായി മനസ്സിലായി. ഓരോ തെരഞ്ഞെടുപ്പ് വരുമ്പോഴും രാഷ്ട്രീയ നേതാക്കള് അവരുടെ സ്വത്തുവിവരം വെളിപ്പെടുത്തുമ്പോള്, വെളിപ്പെടുത്തിയ കണക്കനുസരിച്ച് (വെളിപ്പെടുത്താത്തത് വേറെ) അവരുടെ സമ്പാദ്യം കോടികള് കൂടിക്കൂടി വരുന്നു, ജനങ്ങളുടെ കഷ്ടപ്പാടും അതുപോലെത്തന്നെ കൂടിക്കൂടി വരുന്നു. ഇതാണല്ലോ നമ്മുടെ നാട്ടിലെ രാഷ്ട്രീയ വ്യവസായം. അതുകൊണ്ട് ആരെങ്കിലും ഭരിച്ചോട്ടെ എന്ന മാനസികാവസ്ഥയിലാണ് പൊതുജനങ്ങള്. പ്രതിപക്ഷത്ത് ഇരിക്കുമ്പോള് കാണിക്കുന്ന വീറും വാശിയും ആത്മാര്ഥതയും ഒന്നും ഭരണത്തില് കയറുമ്പോള് കാണിക്കാത്ത ‘ആദര്ശ ധീരന്മാരായ’ നേതാക്കളെ നമ്മള് ഇതിനകം കണ്ടുകഴിഞ്ഞതാണ്. അതില് നിന്നുതന്നെ മനസ്സിലാക്കാം ഇതെല്ലാം പൊതുജനങ്ങളെ കഴുതകളാക്കാന് വേണ്ടി കാണിക്കുന്ന വേലകളാണ് എന്ന്. എല്ലാം എല്ലാവര്ക്കും അറിയാം. എന്നാല് ഒന്നുമറിയാത്ത ഒരു കൂട്ടം അണികളുണ്ട്. നേതാക്കള് എന്ത് തോന്നിവാസം കാണിച്ചാലും വീണ്ടും വീണ്ടും അവര്ക്ക് ‘കീ ജയ്’ വിളിക്കാനും തല്ലുകൊള്ളാനും ചാവാനും തയ്യാറായി നില്ക്കുന്ന ചിലര്. ഇവര് എന്നാണ് പഠിക്കുക എന്നുമാത്രം മനസ്സിലാവുന്നില്ല.
ഷഫീക്ക് കോട്ടോള്
