കണ്ണൂര്: കണ്ണൂര് സര്വ്വകലാശാലയിലെ അസിസ്റ്റന്റുമാരുടെ താല്കാലിക നിയമനവുമായി ബന്ധപ്പെട്ട് ഉയര്ന്ന വിവാദങ്ങള് അനാവശ്യമാണെന്നും നടപടിക്രമമനുസരിച്ചാണ് അസിസ്റ്റന്റ് മാരെ നിയമിച്ചതെന്നും സര്വ്വകലാശാല പത്രക്കുറിപ്പില് അറിയിച്ചു.
താല്കാലിക നിയമനത്തിനായി നിലവില് എംപ്ലോയ്മെന്റ് എക്സ്ചേഞ്ച് രജിസ്ട്രേഷനുള്ള ഉദ്യോഗാര്ത്ഥികള് ഓണ്ലൈനായി അപേക്ഷിക്കണമെന്ന അറിയിപ്പ് കഴിഞ്ഞ നവമ്പര് ഒടുവിലാണ് നല്കിയത്. നവംബര് 30, ഡിസംബര് 1 തിയ്യതികളിലായി 1100ഓളം പേര് അപേക്ഷിക്കുകയും ചെയ്തു. ഇവര്ക്കായി ഡിസംബര് 4മുതല് ഇന്റര്വ്യൂ നടത്തുകയും തുടര്ന്ന് തയ്യാറാക്കിയ റാങ്ക് ലിസ്റ്റില് നിന്നും ഫെബ്രുവരി 29 മുതല് സംവരണ തത്വങ്ങള് പൂര്ണ്ണമായും പാലിച്ചുകൊണ്ട് നിയമന ഉത്തരവുകള് അയച്ചുതുടങ്ങി. തുടര്ന്നുള്ള ഓരോ ദിവസവും നിശ്ചിത നിയമന ഉത്തരവുകള് തപാല് മാര്ഗ്ഗം അയക്കുകയും ചെയ്തു. ചില സാങ്കേതിക കാരണങ്ങളാല് 4ന് അയക്കേണ്ട ഉത്തരവുകള് തൊട്ടടുത്ത ദിവസമാണ് വിതരണം ചെയ്തത്. തെരഞ്ഞെടുപ്പ് വിജ്ഞാപനം പുറത്തുവന്നതോടെ നിയമനഉത്തരവ് അയക്കുന്നത് നിര്ത്തിവെക്കുകയും ചെയ്തു. 179 ദിവസം പൂര്ത്തിയാക്കിയ താല്കാലിക ജീവനക്കാരെ നിലനിര്ത്തുന്നത് ചട്ടവിരുദ്ധമായതിനാലും നേരത്തെയെടുത്ത നടപടിക്രമങ്ങളുടെ തുടര്ച്ചയായതിനാലുമാണ് ഇപ്രകാരം നിയമന ഉത്തരവുകള് അയച്ചത്. അല്ലാതെ ആരോപിക്കപ്പെടുന്നതുപോലെ തെരഞ്ഞെടുപ്പ് വിജ്ഞാപനം വന്നശേഷം ധൃതിപിടിച്ച് നിയമന ഉത്തരവുകള് നല്കുകയാണ് ഉണ്ടായത് എന്ന തിരത്തിലുള്ള പ്രചരണം ശരിയല്ലെന്നും അധികൃതര് അറിയിച്ചു. ഹൈക്കോടതിയില് നിന്നും ഇടക്കാല ഉത്തരവിലൂടെയുള്ള നിര്ദ്ദേശം പാലിച്ചുകൊണ്ടാണ് താല്കാലിക നിയമനങ്ങള് നിര്ത്തിവെച്ചിരിക്കുന്നതെന്നും ഇനിയൊരറിയിപ്പ് ഉണ്ടാകുന്നതുവരെ നിയമനോപദേശങ്ങള്ലഭിച്ചവര് ഹാജരാകേണ്ടതില്ലെന്നും അധികൃതര് അറിയിച്ചു.
