തിരുവനന്തപുരം: മന്ത്രിയുടെ കഴിവുകേടിനെച്ചൊല്ലിയുള്ള വാക്‌പോരില്‍ നിയമസഭ സമ്മേളനം ഇന്നലെ പ്രക്ഷുബ്ധമായി. മത്സ്യത്തൊഴിലാളികളുടെ ആനുകൂല്യം സംബന്ധിച്ച അടിയന്തര പ്രമേയ നോട്ടിസുമായി ബന്ധപ്പെട്ട് ഫിഷറീസ് വകുപ്പ് മന്ത്രി വി.ഇ. അബ്ദുല്‍ ഗഫൂര്‍ മറുപടി പറയവെ മന്ത്രി ഷിബു ബേബി ജോണ്‍ ഇടപെട്ടതിനെക്കുറിച്ചുള്ള പ്രതിപക്ഷ നേതാവ് പിണറായി വിജയന്റെ പരാമര്‍ശമാണ് ബഹളത്തിന് കാരണമായത്. ഉടന്‍തന്നെ സ്പീക്കര്‍ ഇടപെട്ട് അത് പറയരുതെന്ന് ആവശ്യപ്പെട്ടു.
മന്ത്രി ഷിബു ബേബി ജോണ്‍ ഇടപെട്ടതാണ് പിണറായി വിജയന്‍ ആയുധമാക്കിയത്. എന്നാല്‍ ഷിബുബേബി ജോണ്‍ സംസാരിക്കാന്‍ എഴുന്നേറ്റപ്പോള്‍ത്തന്നെ സ്പീക്കര്‍ ഇടപെട്ടിരുന്നു. അങ്ങ് ഒരു സീനിയര്‍ അംഗമല്ലേ ഇങ്ങനെയൊരു കീഴ്‌വഴക്കമുണ്ടോ എന്നും ചോദിച്ചിരുന്നു. എന്നാല്‍ ഫിഷറീസ് മന്ത്രി വഴങ്ങിയതിനാലാണ് താന്‍ സംസാരിക്കുന്നതെന്ന് പറഞ്ഞ് ഷിബു ബേബിജോണ്‍ സംസാരിക്കുകയായിരുന്നു.
അടിയന്തര പ്രമേയാവതരണത്തിന് അനുമതി നിഷേധിച്ചതോടെ വാക്കൗട്ട് പ്രസംഗം നടത്തവേയായിരുന്നു ഇതേച്ചൊല്ലി പിണറായി വിജയന്റെ വിവാദ പരാമര്‍ശം. മറ്റൊരു മന്ത്രി ഇടപെട്ടത് ഫിഷറീസ് മന്ത്രിക്ക് കഴിവുകേടെന്ന് തോന്നിക്കുന്ന വിധത്തിലുള്ള ഇടപെടല്‍ എന്നാണ് പിണറായി വിജയന്‍ പറഞ്ഞത്.
എന്നാല്‍ പിണറായി മുഖ്യമന്ത്രിയായിരിക്കെ അടിയന്തര പ്രമേയ നോട്ടീസ് പരിഗണിക്കുമ്പോള്‍ മന്ത്രിമാര്‍ മറുപടി പറയുന്നതിനിടെ നിയമ, പാര്‍ലമെന്ററി കാര്യ മന്ത്രിമാര്‍ ഇടപെട്ട് സംസാരിച്ചതിന്റെ സഭാരേഖയുണ്ടെന്ന് പറഞ്ഞ് മുഖ്യമന്ത്രി വി.ഡി. സതീശന്‍, ഷിബു ബേബിജോണിന്റെ നടപടിയെ ന്യായീകരിച്ചു. ഫിഷറീസ് മന്ത്രിയെ അപകീര്‍ത്തിപ്പെടുത്തുന്ന പരാമര്‍ശം പിന്‍വലിക്കണം, അല്ലെങ്കില്‍ സഭാരേഖയില്‍ നിന്ന് സ്പീക്കര്‍ നീക്കണം എന്നും മുഖ്യമന്ത്രി ആവശ്യപ്പെട്ടു. തുടര്‍ന്ന് അടിയന്തര പ്രമേയാവതരണത്തിന് അനുമതി ലഭിക്കാത്തതില്‍ പ്രതിഷേധിച്ച് പ്രതിപക്ഷം വാക്കൗട്ട് നടത്തി.
