കൊല്ലം: ആധുനിക ജീവിതശൈലിയില് വന്ന മാറ്റങ്ങള്ക്കൊപ്പം ഫാസ്റ്റ് ഫുഡും കുപ്പിയിലടച്ച ശീതളപാനീയങ്ങളും ഉള്പ്പെട്ട ന്യൂ ജനറേഷന് ഭക്ഷണശീലങ്ങള് വ്യാപകമായതാണ് കേരളത്തില് വൃക്കരോഗങ്ങളുടെ വ്യാപനത്തിന് കാരണമെന്ന് മെഡിസിറ്റി സംഘടിപ്പിച്ച മെഡിക്കല് തുടര്വിദ്യാഭ്യാസ സെമിനാറില് വിദഗ്ദ്ധരുടെ വിലയിരുത്തല്.
മാതാപിതാക്കള് തന്നെ ഇത്തരം ഭക്ഷണശീലങ്ങള് കുട്ടികള്ക്ക് പകര്ന്നുനല്കി അവരെ വൃക്കരോഗികളാക്കുന്നു എന്നതാണ് ഏറ്റവും ദു:ഖകരമെന്ന് പ്രമുഖ വൃക്കരോഗ വിദഗ്ദ്ധനും തിരുവനന്തപുരം ഗവ.മെഡിക്കല് കോളേജ് മുന് പ്രിന്സിപ്പലുമായ ഡോ.രാംദാസ് പിഷാരടി പറഞ്ഞു. ലോക വൃക്കദിനത്തിനു മുന്നോടിയായി ജില്ലയിലെ ഡോക്ടര്മാര്ക്കായി കൊല്ലം ഐഎംഎയുടെ സഹകരണത്തോടെ മെഡിസിറ്റി സംഘടിപ്പിച്ച തുടര്വിദ്യാഭ്യാസ സെമിനാറില് വൃക്കരോഗങ്ങളുടെ പ്രതിരോധത്തെക്കുറിച്ച് പ്രബന്ധം അവതരിപ്പിക്കുകയായിരുന്നു അദ്ദേഹം. ഡോ.നസിമുദ്ദീന് സ്വാഗതം പറഞ്ഞു. ഡോ. രാംദാസ് പിഷാരടി സെമിനാര് ഉദ്ഘാടനം ചെയ്തു. വൃക്കരോഗങ്ങള്ക്കായുള്ള വിവിധ ചികിത്സാരീതികളെ കുറിച്ച് നെഫ്രോളജി വിഭാഗം മേധാവി ഡോ.ശ്രീദാസ് ഗോപാലകൃഷ്ണനും, മരണാനന്തര ദാനത്തിനായി വൃക്ക നീക്കംചെയ്യുന്ന ശസ്ത്രക്രിയയെക്കുറിച്ച് തിരുവനന്തപുരം ഗവ. മെഡിക്കല് കോളേജ് യൂറോളജി വിഭാഗം മേധാവി പ്രൊഫ.ഡോ.വേണുഗോപാലും പ്രബന്ധം അവതരിപ്പിച്ചു. മസ്തിഷ്കമരണം തിരിച്ചറിയുന്നതിനുള്ള മാര്ഗങ്ങള്, സ്ഥിരീകരണം, മരണാനന്തര വൃക്കദാനം എന്നിവയെക്കുറിച്ച് മെഡിസിറ്റി ചീഫ് ഇന്റന്സിവിസ്റ്റ് ഡോ.തെജു പി. തോമസ്, ലൈവ് ഡോണര് നെഫ്രോട്ടമിയില് സീനിയര് യൂറോളജിസ്റ്റ് ഡോ. ബേബി മാത്യു എന്നിവര് ക്ലാസെടുത്തു. ട്രാവന്കൂര് ഹാര്ട്ട് ഇന്സ്റ്റിറ്റിയൂട്ട് ഡയറക്ടര് ഡോ.വൈ.എ.നാസര് അധ്യക്ഷത വഹിച്ച സെമിനാറില് ഐഎംഎ ജില്ലാ പ്രസിഡന്റ് ഡോ.ശ്രീകുമാര്, സീനിയര് സര്ജന് ഡോ. ജോസഫ് ഫ്രാന്സിസ്, ന്യൂറോ സര്ജന് ഡോ. നൗഷാദ് മിഗ്ദാദ്, സീനിയര് ഫിസിഷ്യന് ഡോ.ഇബ്രാഹിം റാവുത്തര്, ഡോ.പ്രവീണ് നമ്പൂതിരി എന്നിവരും പങ്കെടുത്തു. മെഡിസിറ്റി ചെയര്മാന് എ.എ. സലാം, സെക്രട്ടറി അബ്ദുള് സലാം എന്നിവര് സംസാരിച്ചു. വൃക്കദിനത്തോടനുബന്ധിച്ച് സ്കൂള് വിദ്യാര്ത്ഥികള്ക്കായി മെഡിസിറ്റി ഇന്നലെ സംഘടിപ്പിച്ച പോസ്റ്റര് രചനാ മത്സരത്തില് എണ്ണൂറോളം കുട്ടികള് പങ്കെടുത്തു.
