കൊല്ലം: മാര്ച്ച് ഒന്പതു മുതല് 28 വരെ നടക്കുന്ന എസ്എസ്എല്സി പരീക്ഷ കൊല്ലം ജില്ലയില് എഴുതുത് 34358 വിദ്യാര്ഥികള്. ഇതില് 17462 പേര് ആണ്കുട്ടികളും 16896 പേര് പെണ്കുട്ടികളുമാണ്. 33707 പേര് റഗുലര് വിദ്യാര്ഥികളാണ്. പട്ടികജാതി വിഭാഗത്തിലെ 4067 പേരും പട്ടികവര്ഗ വിഭാഗത്തിലെ 593 പേരും പരീക്ഷ എഴുതുന്നു. ഏറ്റവും കൂടുതല് വിദ്യാര്ഥികള് പട്ടത്താനം വിമല ഹൃദയ സ്കൂളിലും (961) ഏറ്റവും കുറവ് കുമ്പളം സെന്റ് മൈക്കിള്സ് ഹൈസ്ക്കൂളിലുമാണ് (ആറ്). ഉച്ചക്ക് 1.45 മുതലാണ് പരീക്ഷ.
പരീക്ഷയുടെ സുഗമമായ നടത്തിപ്പിനായി ജില്ലാകളക്ടര് ചെയര്മാനായി ജില്ലാതല മോണിറ്ററിംഗ് കമ്മിറ്റി രൂപീകരിച്ചിട്ടുണ്ട്. ജില്ലയില് ആകെ 232 പരീക്ഷാകേന്ദ്രങ്ങളാണുള്ളത്. കൊല്ലം-112, കൊട്ടാരക്കര-67, പുനലൂര്-53 എന്നിങ്ങനെയാണ് വിദ്യാഭ്യാസജില്ല തിരിച്ചുള്ള പരീക്ഷാകേന്ദ്രങ്ങളുടെ എണ്ണം.
ജില്ലയില് 231 ചീഫ് സൂപ്രണ്ടുമാരെയും 237 ഡെപ്യൂട്ടി ചീഫ് സൂപ്രണ്ടുമാരെയും 2563 ഇന്വിജിലേറ്റര്മാരെയും നിയോഗിച്ചിട്ടുണ്ട്. ചീഫ് സൂപ്രണ്ടുമാര്ക്കും ഡെപ്യൂട്ടി സൂപ്രണ്ടുമാര്ക്കുമുള്ള പരിശീലന പരിപാടി പൂര്ത്തിയായി. വിദ്യാഭ്യാസ ഓഫീസര്മാരടങ്ങുന്ന ആറു പരീക്ഷാപരിശോധന സ്ക്വാഡുകളും രൂപീകരിച്ചിട്ടുണ്ട്.
ചോദ്യപേപ്പറുകളുടെ സുഗമമായ വിതരണത്തിനായി പരീക്ഷാ കേന്ദ്രങ്ങളെ 34 ക്ലസ്റ്ററുകളായി തിരിച്ച് 10 ട്രഷറികളിലും 10 ദേശസാല്കൃത ബാങ്കുകളിലുമായാണ് ചോദ്യപേപ്പര് ബാഗുകള് സൂക്ഷിച്ചിരിക്കുന്നത്. പരീക്ഷാ ദിവസങ്ങളില് രാവിലെ ഒന്പത് മുതല് ചോദ്യപേപ്പറുകള് വിതരണം ചെയ്യുന്നതിനായി ഓരോ ക്ലസ്റ്ററുകളിലും ഡെലിവറി ഓഫീസര്മാര്, ഡിസ്ട്രിബ്യൂഷന് ഓഫീസര്മാര്, ഡിസ്ട്രിബ്യൂഷന് അസിസ്റ്റന്റുമാര് എന്നിവരെ നിയോഗിച്ചിട്ടുണ്ട്. അതത് ജില്ലാ വിദ്യാഭ്യാസ ഓഫീസര്മാരുടെ മേല്നോട്ടത്തിലായിരിക്കും ചോദ്യപേപ്പര് വിതരണം. സായുധ പോലീസിന്റെ അകമ്പടിയോടെ കവചിത വാഹനത്തിലാണ് ചോദ്യപേപ്പറുകള് വിതരണത്തിന് കൊണ്ടുപോകുക. ഓരോ ദിവസത്തെ പരീക്ഷക്ക് ശേഷം ഉത്തര കടലാസുകള്പരീക്ഷാ കേന്ദ്രങ്ങളില് നിന്നും ചീഫ് സൂപ്രണ്ടുമാര് കേന്ദ്രീകൃത മൂല്യനിര്ണയ ക്യാമ്പുകളിലേക്ക് അയക്കും.
