കണ്ണൂര്‍: പാപ്പിനിശ്ശേരി അരോളിയില്‍ ആര്‍എസ്എസ് പ്രവര്‍ത്തകനായിരുന്ന സുജിത്തിനെ കൊലപ്പെടുത്തിയ സംഭവത്തില്‍ അന്വേഷണം ഊര്‍ജ്ജിതമാക്കി. കണ്ണൂര്‍ ജില്ലാ പോലീസ് സൂപ്രണ്ട് ഹരിശങ്കറിന്റെ നേതൃത്വത്തിലുളള പത്തംഗ സംഘമാണ് അന്വേഷണം നടത്തുന്നത്. മുഴുവന്‍ പ്രതികളേയും പോലീസ് തിരിച്ചറിഞ്ഞിട്ടുണ്ട്. അതേ സമയം കൊലപാതകം നടന്നയുടന്‍ പോലീസ് കസ്റ്റഡിയിലെടുത്ത ആറു സിപിഎം പ്രര്‍ത്തകരെ ഇന്നലെ രാത്രി വൈകി വളപട്ടണം പോലീസ് അറസ്റ്റ് ചെയ്തു. അരോളി സ്വദേശികളായ ശ്രീജയന്‍ (34), ജോയി ജോസഫ് (31), പ്രഭേഷ് ഭാര്‍ഗവന്‍ (31), ടി. ലിബിന്‍ (28), എം.പ്രശാന്ത് (34), കീച്ചേരി സ്വദേശിയായ ടി.വി.ആകാശ് (22) എന്നീ സിപിഎം പ്രവര്‍ത്തകരാണ് അറസ്റ്റിലായത്. ഇവരെ ചോദ്യം ചെയ്തതില്‍ നിന്നും സുജിത്തിനെ കൊലപ്പെടുത്തിയത് സിപിഎം ഉന്നത നേതൃത്വത്തിന്റെ അറിവോടെയാണെന്ന് പോലീസ് കണ്ടെത്തിയതായി സൂചനയുണ്ട്.
പാപ്പിനിശ്ശേരി, കീച്ചേരി, അറോളി മേഖലയിലെ സാധാരണക്കാരായ ജനങ്ങള്‍ക്കിടയിലടക്കം ആര്‍എസ്എസ് പ്രവര്‍ത്തകന്‍ എന്ന നിലയില്‍ വളരെ വലിയ സ്വാധീനമുഉണ്ടായിരുന്ന സുജിത്തിനെ കൊലപ്പെടുത്താന്‍ ആഴ്ചകള്‍ക്കു മുമ്പേ ആസൂത്രണം നടന്നിരുന്നതായി തിരിച്ചറിഞ്ഞിട്ടുണ്ട്. പാപ്പിനിശ്ശേരി മേഖലയിലെ പോലീസ് ബന്തവസ്സ് തുടരുകയാണ്. ഇന്നലെ ബോംബ് സ്‌ക്വാഡും ഡോഗ് സ്‌ക്വാഡും ആന്റി നക്‌സല്‍ സേനയില്‍ ഉള്‍പ്പെട്ട പോലീസ് സേനയും മേഖലയില്‍ പരിശോധന നടത്തി. കൊലപാതകം നടന്നയുടന്‍ പോലീസ് കസ്റ്റഡിയിലെടുത്ത എട്ട് സിപിഎം പ്രവര്‍ത്തകരെ സിഐ ശ്രീജിത്തിന്റെ നേതൃത്വത്തിലുളള പോലീസ് സംഘത്തിന്റെ ചോദ്യം ചെയ്യല്‍ ഇന്നലെ വൈകുന്നേരം വരെ തുടര്‍ന്നു. സംഭവത്തില്‍ 20 പ്രതികളാണുള്ളത്. കസ്റ്റഡിയിലുളളവരില്‍ 5 പേര്‍ നേരിട്ട് കൃത്യത്തില്‍ പങ്കുളളവരാണെന്ന് ചോദ്യം ചെയ്യലില്‍ തിരിച്ചറിഞ്ഞിട്ടുണ്ട്. സംഭവവുമായി ബന്ധപ്പെട്ട് മുഴുവന്‍ പ്രതികളെയും ഉടന്‍ അറസ്റ്റുചെയ്യുമെന്ന് പോലീസ് അറിയിച്ചു. മറ്റു പ്രതികള്‍ക്കായി വ്യാപകമായ തെരച്ചില്‍ ആരംഭിച്ചിട്ടുണ്ട്. സംഭവത്തില്‍ മുഴുവന്‍ പ്രതികളെയും തിരിച്ചറിഞ്ഞതായി ജില്ലാ പോലീസ് മേധാവി പി.ഹരിശങ്കര്‍ പറഞ്ഞു. സംഘര്‍ഷ സാധ്യത കണക്കിലെടുത്ത് കല്ല്യാശേരി, പാപ്പിനിശേരി പ്രദേശങ്ങളില്‍ 144-ാം വകുപ്പ് പ്രകാരം നിരോധാജ്ഞ ഏര്‍പ്പെടുത്തിയതായും ജില്ലാ പൊലീസ് മേധാവി അറിയിച്ചു. കനത്ത പൊലീസ് സന്നാഹമാണ് പ്രദേശത്ത് ഏര്‍പ്പെടുത്തിയത്. അനിഷ്ട സംഭവങ്ങള്‍ ഉണ്ടാകാതിരിക്കാന്‍ പോലീസ് ജാഗ്രത പുലര്‍ത്തിവരികയാണ്.
