കാസര്കോട്: കേന്ദ്ര തൊഴില്-ഉദ്യോഗ മന്ത്രാലയവും കാസര്കോട് വിവേകാനന്ദ എഡുക്കേഷണല് ആന്റ് ചാരിറ്റബിള് ട്രസ്റ്റ്, യുവകിരണ് എന്നിവയുടെ സംയുക്താഭിമുഖ്യത്തില് 28ന് വിദ്യാനഗര് ചിന്മയ വിദ്യാലയത്തില് നടക്കുന്ന മെഗാ തൊഴില്മേളയുടെ സംഘാടക സമിതി രൂപീകരണ യോഗം ഇന്ന് ഉച്ചയ്ക്ക് 3ന് കാസര്കോട് മുനിസിപ്പല് കോണ്ഫ്രറന്സ് ഹാളില് ചേരും.
വിവിധ വിദ്യാഭ്യാസ യോഗ്യതകളും ജോലി പരിചയം ഉള്ളവരും ഇല്ലാത്തവരുമായ പതിനായിരത്തോളം തൊഴില് രഹിതര് പ്രസ്തുത മേളയില് പങ്കെടുക്കും. തൊഴില്മേളയില് പങ്കെടുക്കുന്ന ഉദ്യോഗാര്ത്ഥികള്ക്കും തൊഴില്ദാതാക്കളായ കമ്പനികള്ക്കും യാതൊരുവിധ ഫീസും ഉണ്ടായിരിക്കില്ല. ഉദ്യോഗാര്ത്ഥികളെ തെരഞ്ഞെടുക്കാന് താല്പര്യമുള്ള സ്വകാര്യ വാണിജ്യ-വ്യവസായ സ്ഥാപനങ്ങള്ക്ക് തൊഴില്മേളയില് പങ്കെടുക്കാം. വിവിധ സര്ക്കാര് വകുപ്പുകള് നല്കുന്ന തൊഴില് സംബന്ധമായ സേവന പ്രവര്ത്തനങ്ങളെ കുറിച്ചുള്ള വിവരങ്ങളും മേളയില് ലഭിക്കും.
