കോഴിക്കോട്: കോഴിക്കോട്ട് കാല്പ്പന്തുകളിയുടെ പൂരത്തിന് തുടക്കമായി. നാഗ്ജി കപ്പ് ഇന്റര്നാഷണല് ക്ലബ്ബ് ഫുട്ബോള് ടൂര്ണ്ണമെന്റിന്റെ രണ്ടാംവരവിന്റെ ഒന്നാം ദിനം കോഴിക്കോട്ടുകാര് ഉത്സവമാക്കിമാറ്റി. ആട്ടും പാട്ടും കൊട്ടുമെല്ലാമായി അവര് വീണ്ടും സ്റ്റേഡിയത്തിലേക്ക് ഒഴുകിയെത്തി. അവിടെ എല്ലാവരും വീണ്ടും ഒന്നായി, ഫുട്ബോളിനെ സ്നേഹിക്കുന്നവര് മാത്രമായി. കളി തുടങ്ങും മുമ്പ് തന്നെ സ്റ്റേഡിയവും പരിസരവും കാണികളെകൊണ്ട് നിറഞ്ഞിരുന്നു.
ജില്ലക്കകത്തും പുറത്തു നിന്നും പതിനായിരങ്ങളാണ് കളി കാണാനായി കോഴിക്കോട് കോര്പ്പറേഷന് സ്റ്റേഡിയത്തിലേക്ക് എത്തിയത്. കളി തുടങ്ങുന്നതിന് മുമ്പ് തന്നെ സ്റ്റേഡിയത്തിന് പരിസരത്തെ റോഡുകള് കാണികളെ കൊണ്ട് നിറഞ്ഞിരുന്നു. ഉദ്ഘാടന ചടങ്ങ് മനോഹരമാക്കാന് വെടിക്കെട്ടും നരേഷ് അയ്യരുടെ മ്യൂസിക് ഷോയും ഉണ്ടായിരുന്നു. കളിയുടെ ഇടവേളയില് പാട്ടുമായെത്തിയ നരേഷ് അയ്യര്ക്കൊപ്പം പാട്ടും നൃത്തവുമായി കാണികളും കൂടുകയായിരുന്നു.
ലുലു ഗ്രൂപ്പ് ചെയര്മാന് എം.എ. യൂസഫലിയാണ് ടൂര്ണ്ണമെന്റ് ഉദ്ഘാടനം ചെയ്തത്. എം.കെ. രാഘവന് എംപി, എ. പ്രദീപ്കുമാര് എംഎല്എ, മേയര് വി.കെ.സി. മമ്മദ്കോയ, നടന് മാമുക്കോയ, ബിജെപി ജില്ലാപ്രസിഡന്റ് ടി.പി. ജയചന്ദ്രന്മാസ്റ്റര്, പി.വി. ഗംഗാധരന്, കെഎഫ്എ പ്രസിഡന്റ് കെ.എം.ഐ. മേത്തര്, സംഘാടകസമിതി ചെയര്മാനും കെഡിഎഫ്എ ജില്ലാ പ്രസിഡന്റായ സിദ്ദിഖ് അഹമ്മദ്, സെക്രട്ടറി പി. ഹരിദാസ്, പി.കെ. അഹമ്മദ്, പി.കെ. ഷാനവാസ് തുടങ്ങിയവര് ചടങ്ങില് പങ്കെടുത്തു.
ആദ്യമത്സരത്തില് ബ്രസീലിയന് ക്ലബായ അത്ലറ്റികോ പരാനസ് ഏകപക്ഷീയമായ രണ്ട് ഗോളുകള്ക്ക് ഇംഗ്ലണ്ടില് നിന്നുള്ള വാട്ട്ഫോര്ഡ് എഫ്സിയെ പരാജയപ്പെടുത്തി. ഇന്ന് രാത്രി ഏഴിന് നടക്കുന്ന മത്സരത്തില് അര്ജന്റീനയില് നിന്നുള്ള അണ്ടര് 23 ടീം ജര്മ്മനിയില് നിന്നുള്ള ടിഎസ്വി 1860 മ്യൂണിക്കുമായി ഏറ്റുമുട്ടും.
