ആലപ്പുഴ: കമ്മ്യൂണിസ്റ്റ് പ്രത്യയശാസ്ത്ര തടവറകള്‍ തകര്‍ത്ത്, അഴിമതിയുടെ പര്യായങ്ങളായ കപട ഗാന്ധിയന്‍മാരുടെ പൊള്ളത്തരം തുറന്നു കാട്ടി വിമോചനയാത്ര മുന്നോട്ട്. ബിജെപി സംസ്ഥാന അദ്ധ്യക്ഷന്‍ കുമ്മനം രാജശേഖരന്‍ നയിക്കുന്ന യാത്രയെ വരവേല്‍ക്കാന്‍ ഒരോ സ്വീകരണ കേന്ദ്രങ്ങളിലും ആയിരങ്ങളാണ് ഒഴുകിയെത്തിയത്. നാട്യങ്ങളില്ലാതെ ജനഹൃദയങ്ങള്‍ കീഴടക്കുകയാണ് യാത്രാ നായകന്‍ കുമ്മനം രാജശേഖരന്‍. ജില്ലയുടെ അടിസ്ഥാന പ്രശ്‌നങ്ങള്‍ ചൂണ്ടിക്കാട്ടിയുള്ള, മുന്നണികളുടെ ഒത്തുകളി രാഷ്‌ട്രീയം തുറന്നുകാട്ടി, ആരെയും അപമാനിക്കാതെ, ഭീഷണിപ്പെടുത്താതെ നടത്തുന്ന കാര്യമാത്ര പ്രസക്തമായ പ്രസംഗം ഏവരെയും ആകര്‍ഷിക്കുന്നതായിരുന്നു. പണക്കൊഴുപ്പിന്റെ ധാരാളിത്തമില്ലാതെ, ജനപങ്കാളിത്തത്താല്‍ സമ്പന്നമായിരുന്നു സ്വീകരണ പരിപാടികള്‍.ജില്ലയുടെ നട്ടെല്ലായ പരമ്പരാഗത വ്യവസായങ്ങള്‍ തകര്‍ന്നടിഞ്ഞു. പണിയില്ലാത്തതിനാല്‍ കയര്‍ത്തൊഴിലാളികള്‍ കെട്ടിടനിര്‍മ്മാണമേഖയിലേക്കും മറ്റും ചേക്കേറുകയാണ്. ചെറുകിട കയര്‍ഫാക്ടറികള്‍ ബഹുഭൂരിപക്ഷവും അടച്ചുപൂട്ടല്‍ ഭീഷണിയാലാണ്. ഉത്പന്നങ്ങള്‍ ഓര്‍ഡര്‍ ലഭിക്കാത്തതാണ് പ്രധാന പ്രശ്‌നം. അതിനാല്‍തന്നെ ചെറുകിടക്കാര്‍ സമര രംഗത്താണ്. ചെറുകിട സഹകരണസംഘങ്ങള്‍ക്ക് സംസ്ഥാന സര്‍ക്കാര്‍ സാമ്പത്തിക സഹായം നല്‍കുന്നില്ല. കയര്‍മേളകള്‍ നടത്തി കോടികള്‍ ചെലവഴിക്കുമ്പോഴും സാധാരണ തൊഴിലാളികളുടെ കൂടുംബങ്ങള്‍ പട്ടിണിയെ നേരിടുകയാണെന്ന് കുമ്മനം പറഞ്ഞു.
1840 കോടിയുടെ കുട്ടനാട് പാക്കേജ് ഇടതുവലതു സര്‍ക്കാരുകളുടെ കൊടുകാര്യസ്ഥതയും അലംഭാവവും മൂലം പരാജയപ്പെട്ടു. 2008ല്‍ തുടങ്ങിയ പാക്കേജിന്റെ ഭാഗമായി വെറും മുന്നൂറ് കോടി മാത്രമാണ് ചെലവഴിക്കാന്‍ കഴിഞ്ഞത്. ചെലവിട്ട് തുകയില്‍ തന്നെ വന്‍ അഴിമതി നടന്നതായി ആക്ഷേപമുള്ളതിനാല്‍ സിബിഐ അന്വേഷിക്കണം
സിപിഎം നിയന്ത്രണത്തിലുള്ള കുട്ടമംഗലം സഹകരണബാങ്ക് 240 ഓളം കര്‍ഷകരെ കബളിപ്പിച്ച് തട്ടിയെടുത്ത 150 ഏക്കറോളം കൃഷിഭൂമി കര്‍ഷകര്‍ക്ക് മടക്കി നല്‍കുമെന്ന് കഴിഞ്ഞ നിയമസഭാ തെരഞ്ഞെടുപ്പ് വേളയില്‍ ഉമ്മന്‍ചാണ്ടി പ്രഖ്യാപിച്ചതാണ്. എന്നാല്‍ ഇതുവരെ നടപ്പായില്ല. സഹകരണബാങ്കിനെതിരെയുള്ള വിജിലന്‍സ് അന്വേഷണവും ഇരുമുന്നണികളും ഒത്തുകളിച്ച് അട്ടിമറിച്ചു.
ജില്ലയിലെ പൊതുമേഖലാസ്ഥാപനങ്ങളും തകര്‍ച്ചയിലാണ്. പൊതുമേഖലയിലെ ഏക മരുന്ന് നിര്‍മ്മാണ ശാലയായ പാതിരപ്പള്ളിയിലെ കെഎസ്ഡിപിക്ക് സംസ്ഥാന സര്‍ക്കാര്‍ ഓര്‍ഡര്‍ നല്‍കാത്തതിനാല്‍ പ്രതിസന്ധിയിലാണ്. അന്യസംസ്ഥാനങ്ങളുടെ ഓര്‍ഡര്‍ ലഭിക്കുന്നതിനാലാണ് സ്ഥാാപനം നിലനില്‍ക്കുന്നത്. സ്വകാര്യ കുത്തകകളെ സഹായിക്കാനാണ് സംസ്ഥാന സര്‍ക്കാര്‍ ഓര്‍ഡര്‍ നല്‍കാത്തത്. കോമളപുരം സ്പിന്നേഴ്‌സ്, കലവൂര്‍ എക്‌സല്‍ഗ്‌ളാസ് ഫാക്ടറി എന്നിവയും വര്‍ഷങ്ങളായി അടഞ്ഞു കിടക്കുന്നു.
സര്‍ക്കാര്‍ ഉടമസ്ഥതയിലുള്ള വണ്ടാനം മെഡിക്കല്‍ കോളേജ് ആശുപത്രിയുടെ പ്രവര്‍ത്തനം ഡോക്ടര്‍മാരുടെയും ജിവനക്കാരുടെയും അപര്യാപ്തത മൂലം പ്രതിസന്ധി നേരിടുമ്പോള്‍ 20 കിലോമീറ്റര്‍ അകലെ ഹരിപ്പാട് സ്വകാര്യ മേഖലയില്‍ മെഡിക്കല്‍ കോളേജ് നിര്‍മ്മാക്കാന്‍ സര്‍ക്കാര്‍ തിടുക്കം കാട്ടുന്നതില്‍ ദുരൂഹതയുണ്ട്.
തീരദേശവും കായല്‍ത്തീരങ്ങളും ടൂറിസം മാഫിയകള്‍ കയ്യടക്കുകയാണ്. അതിരൂക്ഷമായ മലിനീകരണം മൂലം കുട്ടനാട്ടില്‍ ക്യാന്‍സര്‍ രോഗികളുടെ ഏണ്ണം ക്രമാതീതമായി വര്‍ദ്ധിച്ചതായും വിവിധ സ്വീകരണ യോഗങ്ങളില്‍ കുമ്മനം ചൂണ്ടിക്കാട്ടി.
