ആലപ്പുഴ: കയറ്റുപായയും തടുക്കും ചവിട്ടിയും മാത്രമല്ല. ഓവര്‍കോട്ട്, കുട, ആഭരണങ്ങളും വരെ കയറില്‍ നിര്‍മിച്ച് ഉല്പാദകര്‍ രംഗത്ത്. ചൂട് ചെറുക്കാന്‍ മേല്‍ക്കൂരയില്‍ ഉപയോഗിക്കാവുന്ന കയര്‍ കവചവും എത്തിയിട്ടുണ്ട്. വൈവിധ്യവല്‍ക്കരണത്തിന്റെ അനന്ത സാധ്യതകളിലേക്ക് വെളിച്ചം വീശുന്ന നൂതനമായ ഒട്ടേറെ ലൈഫ് സ്റ്റൈല്‍ ഉല്‍പന്നങ്ങളാണ് കയര്‍ കേരളയിലെ ശ്രദ്ധാകേന്ദ്രമായി മാറിയിരിക്കുന്നത്.
കയര്‍കൊണ്ടുള്ള പ്രത്യേക ഓവര്‍കോട്ട് ആണ് ഏറ്റവും ശ്രദ്ധേയം. കയര്‍ നാരുകളുടെ പരുപരുപ്പ് ഒഴിവാക്കി കോട്ടണ്‍ സംയോജിപ്പിച്ച തണുപ്പിനെ പ്രതിരോധിക്കാന്‍ ഇവ ഏറ്റവും അനുയോജ്യമാണ്. വാണിജ്യാടിസ്ഥാനത്തില്‍ ഇവ പുറത്തിറങ്ങാനിരിക്കുന്നതേയുള്ളു. കയറും കോട്ടണും സംയോജിപ്പിച്ച കുടകളും മേളയിലുണ്ട്. മഴക്കാലത്ത് ഉപയോഗിക്കാനാകുന്നില്ലെങ്കിലും ഇവയും തണുപ്പു നിലനിര്‍ത്തുന്നവയാണ്.
ഈര്‍പ്പം തങ്ങിനില്‍ക്കുന്ന തരത്തില്‍ കയര്‍ കൊണ്ടുള്ള കവചം മേല്‍ക്കൂരകളില്‍ പതിപ്പിച്ച് തണുപ്പ് നിലനിര്‍ത്തുന്ന സാങ്കേതിക വിദ്യയായ റൂഫ് സര്‍ഫസ് കൂളിംഗ് സംവിധാനം കയര്‍ബോര്‍ഡ് മേളയിലെത്തിച്ചിട്ടുണ്ട്.
മെത്തകള്‍, ചവട്ടി, തടുക്ക് തുടങ്ങിയവയുടെ വിപുലമായ ശേഖരമാണ് കയര്‍ഫെഡിന്റെ സ്റ്റാളിലേത്്. അതിമനോഹരങ്ങളായ കയര്‍, ചണം ചവിട്ടികളും തടുക്കുകളുമാണ് ഫോംമാറ്റിംഗ്‌സ് ഇന്ത്യ ലിമിറ്റഡിന്റെ സ്റ്റാളില്‍ അണിനിരത്തിയിരിക്കുന്നത്. കര്‍ട്ടനുകളും ബാഗുകളും മുതല്‍ വസ്ത്രങ്ങള്‍ക്കുവരെ സുവര്‍ണനാരുകളെ പര്യാപ്തമാക്കിയെടുക്കുകയാണ് ലക്ഷ്യം. ഇവയിലേറെയും തുടക്കത്തില്‍ കയറ്റുമതിയാണ് ലക്ഷ്യമിടുന്നതെങ്കിലും വൈകാതെ അവ ആഭ്യന്തരവിപണയിലും സജീവമാകുമെന്ന സൂചനകളാണ് ഉല്‍പന്നങ്ങള്‍ക്കായി വിവിധ മേഖലകളില്‍ നിന്നുണ്ടാകുന്ന അന്വേഷണങ്ങള്‍ നല്‍കുന്നത്.
കയറില്‍ നിര്‍മ്മിച്ച വാനിറ്റി ബാഗുകള്‍ മുതല്‍ ലാപ്‌ടോപ്പും മറ്റും സുഗമമായി വഹിക്കാനുതകുന്ന ബാക്പാക് വരെ വിപണിയിലെത്തിച്ചുകഴിഞ്ഞു.
