ആലപ്പുഴ: സര്‍വ്വീസ് മുടക്കി കെഎസ്ആര്‍ടിസിയിലെ ഒരുവിഭാഗം ജീവനക്കാര്‍ നടത്തുന്ന സമരം യാത്രക്കാരെ വലയ്ക്കുന്നു. സിഐടിയുവിന്റെ നേതൃത്വത്തിലുള്ള കെഎസ്ആര്‍ടിസി എംപ്ലോയീസ് അസോസിയേഷന്‍ ജീവനക്കാരാണ് കൂട്ട അവധിയെടുത്ത് സര്‍വ്വീസുകള്‍ മുടക്കി പൊതു ജനങ്ങളെയും യാത്രക്കാരെയും ബുദ്ധിമുട്ടിക്കുന്നത്.
ജീവനക്കാരുടെ കൂട്ട അവധിയെ തുടര്‍ന്ന് ജില്ലയിലെ വിവിധ ഡിപ്പോകളില്‍ നിരവധി സര്‍വ്വീസുകളാണ് മുടങ്ങിയത്. ആലപ്പുഴയില്‍ 73, ചേര്‍ത്തല 78, കായംകുളം 46, ചെങ്ങന്നൂര്‍ 43, മാവേലിക്കര, 32, എടത്വാ 23, ഹരിപ്പാട് 35 എന്നിങ്ങനെയാണ് സര്‍വ്വീസുകള്‍ മുടങ്ങിയിരിക്കുന്നത്. എടത്വാ സ്റ്റേഷന്‍ മാസ്റ്റര്‍ ബി. രമേശ് കുമാറിനെ സ്ഥലം മാറ്റിയതില്‍ പ്രതിഷേധിച്ചാണ് ഒരു വിഭാഗം ജീവനക്കാര്‍ സമരം നടത്തുന്നത്. എടത്വാ- തകഴി -അമ്പലപ്പുഴ റൂട്ടില്‍ സര്‍വ്വീസ് നടത്തുന്ന ജീവനക്കാര്‍ക്ക് അന്യായമായ രീതിയില്‍ സര്‍വ്വീസ് കാന്‍സല്‍ ചെയ്തു നല്‍കുകയും എന്നാല്‍ റിക്കാര്‍ഡില്‍ ജീവനക്കാര്‍ക്ക് വേതനം നല്‍കിയതായും രേഖപ്പെടുത്തി സംഘടനാ ഭാരവാഹികള്‍ക്ക് വഴിവിട്ട സഹായം നല്‍കിയത് വിജിലന്‍സിന്റെ പരിശോധനയില്‍ കണ്ടെത്തിയതിനെത്തുടര്‍ന്നാണ് ഇയാളെ സ്ഥലം മാറ്റിയത്.
1,500 കിലോമീറ്ററോളം സര്‍വ്വീസുകളാണ് ഇത്തരത്തില്‍ കാന്‍സല്‍ ചെയ്ത് കെഎസ്ആര്‍ടിസിക്ക് നഷ്ടം വരുത്തിയത്. തുടര്‍ന്നാണ് എടത്വാ സ്റ്റേഷന്‍ മാസ്റ്ററെ സ്ഥലം മാറ്റിയത്. ഇതില്‍ പ്രതിഷേധിച്ചാണ്. ഒരു വിഭാഗം ജീവനക്കാര്‍ യാത്രക്കാരെ ബുദ്ധിമുട്ടിച്ച് സമരം നടത്തുന്നത്.
