ചേര്‍ത്തല: സിപിഎമ്മിന് പിന്നാലെ സിപിഐയിലും വിഭാഗീയത രൂക്ഷം, മുഹമ്മയില്‍ നേതാക്കളടക്കം ഒരുവിഭാഗം പ്രവര്‍ത്തകര്‍ രാജിക്ക്്. ലോക്കല്‍ സെക്രട്ടറിയെ കൈയേറ്റം ചെയ്യാന്‍ ശ്രമിച്ചവരെ ജില്ലാ നേതൃതൃത്വം സംരക്ഷിക്കുന്നെന്നാരോപിച്ചാണ് പ്രവര്‍ത്തകര്‍ പരസ്യമായി രംഗത്തെത്തിയത്.
നൂറോളം പാര്‍ട്ടി പവര്‍ത്തകരും യുവജന വിഭാഗം അംഗങ്ങളും പ്രതിഷേധ സൂചകമായി രാജിക്കൊരുങ്ങുന്നതായാണ് വിവരം. പ്രധാന നേതാക്കള്‍ മണ്ഡലം സെക്രട്ടറിക്കും ബ്രാഞ്ച് സെക്രട്ടറിമാരും പാര്‍ട്ടി അംഗങ്ങളും പ്രാദേശിക നേതൃത്വത്തിനും രാജി കൈമാറാനാണ് ധാരണയായിട്ടുള്ളത്. പ്രദേശത്ത് ദീര്‍ഘനാളായി വിഭാഗിയ പ്രവര്‍ത്തനങ്ങള്‍ക്ക് നേതൃത്വം നല്‍കുന്നവരെ ജില്ലാ നേതൃത്വം സംരക്ഷിക്കുന്നതായാണ് ഇവര്‍ ഉന്നയിക്കുന്ന വിമര്‍ശനം.
ത്രിതല പഞ്ചായത്ത് തെരഞ്ഞെടുപ്പില്‍ സിറ്റിങ് സീറ്റില്‍ പാര്‍ട്ടി സ്ഥാനാര്‍ഥിയെ തോല്‍പ്പിക്കുന്നതിനായി പ്രവര്‍ത്തകരെ നിര്‍വീര്യമാക്കുകയും എതിര്‍ സ്ഥാനാര്‍ഥിക്കായി പരസ്യമായി പ്രവര്‍ത്തിക്കുകയും ചെയ്ത ലോക്കല്‍ കമ്മിറ്റി അംഗത്തിനെതിരെ നടപടി സ്വീകരിക്കുമെന്ന് നേതാക്കള്‍ പ്രഖ്യാപിച്ചെങ്കിലും ഇതുസംബന്ധിച്ച് തീരുമാനമുണ്ടായിട്ടില്ലെന്നാണ് ഒരുവിഭാഗം ഉന്നയിക്കുന്ന വിമര്‍ശനം.
ഇതിനെ ചോദ്യം ചെയ്ത മുതിര്‍ന്ന അംഗത്തെ അസഭ്യം പറഞ്ഞതും പ്രവര്‍ത്തകര്‍ക്കിടയില്‍ ഭിന്നതയ്‌ക്ക് കാരണമായി. പാര്‍ട്ടി ശക്തി കേന്ദ്രത്തിലെ വിഭാഗീയ നീക്കം നേതൃത്വത്തെയും വെട്ടിലാക്കി. സിപിഐയ്‌ക്ക് ഏറെ വേരോട്ടമുള്ളതാണ് മുഹമ്മ, കഞ്ഞിക്കുഴി, മാരാരിക്കുളം അടക്കമുള്ള പ്രദേശങ്ങള്‍. പലഘട്ടങ്ങളിലും സിപിഎമ്മിനോടു പോലും പൊരുതിയാണ് പാര്‍ട്ടിയുടെ മേഖലയിലെ പ്രവര്‍ത്തനം.
മുഹമ്മയിലെ പടലപ്പിണക്കത്തെ തുടര്‍ന്ന് പാര്‍ട്ടിയില്‍ നിന്നുള്ള കൊഴിഞ്ഞുപോക്ക് മറ്റ് പ്രദേശങ്ങളിലേക്ക് വ്യാപിക്കുമെന്ന ആശങ്കയും നേതാക്കള്‍ക്കിടയില്‍ ഉയര്‍ന്നിട്ടുണ്ട്. പാര്‍ട്ടിയില്‍ അഭിപ്രായ ഭിന്നതയും തര്‍ക്കങ്ങളുമില്ലെന്നും ഇത്തരം പ്രചരണങ്ങള്‍ വാസ്തവ വിരുദ്ധമാണെന്നും ചേര്‍ത്തല തെക്ക് മണ്ഡലം സെക്രട്ടറി എസ്. പ്രകാശന്‍ പറഞ്ഞു.
