മണ്ണഞ്ചേരി: അപകടങ്ങളെ തുടര്‍ന്ന് പോലിസ് കസ്റ്റഡിയില്‍ എടുക്കുന്ന വാഹനങ്ങള്‍ റോഡരികില്‍ സൂക്ഷിക്കുന്നത് അപകടം ക്ഷണിച്ചു വരുത്തുന്നു. മണ്ണഞ്ചേരി പോലിസ് സ്റ്റേഷനു മുമ്പിലെ റോഡിലാണ് അപകടത്തില്‍പെട്ട വാഹനങ്ങള്‍ പാര്‍ക്ക് ചെയ്യുന്നത്.
ദേശീയ പാതയിലടക്കം നിരന്തരമുണ്ടാകുന്ന അപകടങ്ങളില്‍ പെടുന്ന വാഹനങ്ങളാണ് റോഡ് കയ്യേറുന്നത്. ഏക്കര്‍കണക്കിന് ഭൂമി മണ്ണഞ്ചേരി പോലിസ് സ്റ്റേഷന് സ്വന്തമായി ഉണ്ടെങ്കിലും സ്റ്റേഷന് പരിസരത്ത് വാഹനങ്ങള്‍ പാര്‍ക്ക് ചെയ്യുന്നതിനുള്ള സൗകര്യങ്ങള്‍ ഇല്ല.
ഇതാണ് വാഹനങ്ങള്‍ റോഡില്‍ പാര്‍ക്ക് ചെയ്യാന്‍ അധികൃതര്‍ നിര്‍ബ്ബന്ധമാകുന്നത്. സ്റ്റേഷന് പരിസരത്ത് വാഹനങ്ങള്‍ കയറ്റിയാല്‍ മണ്ണില്‍ പുതയും. പിന്നീട് ഇവ ഉയര്‍ത്താന്‍ ക്രൈയിനും മറ്റും എത്തിക്കണം. സ്റ്റേഷന് പരിസരത്ത് പാര്‍ക്ക് ചെയ്ത വാഹനങ്ങള്‍ പലതും ഇത്തരത്തിലാണ് ഉയര്‍ത്തി മാറ്റിയത്. അതുകൊണ്ടാണ് അപകടമാണെന്നറിഞ്ഞിട്ടും വാഹനങ്ങള്‍ റോഡില്‍ തന്നെ സൂക്ഷിക്കുന്നത്.
വീതി കുറഞ്ഞ റോഡില്‍ ഇത്തരം വാഹനങ്ങള്‍ ഇടുന്നതോടെ റോഡിന്റെ ഭൂരിഭാഗവും ഈ വാഹനങ്ങള്‍ കവരും. ഇതോടെ മറ്റു വാഹനങ്ങള്‍ക്ക് കടന്നു പോകാനും കഴിയുന്നില്ല. ഇതാണ് അപകടങ്ങള്‍ക്ക് കാരണമാകുന്നത്. വാഹനങ്ങള്‍ ഇടാന്‍ തക്ക വണ്ണം സ്റ്റേഷന് പരിസരം ശരിയാക്കണമെന്നാണ് നാട്ടുകാരുടെ ആവശ്യം. സ്റ്റേഷന് പരിസരത്ത് ഇപ്പോള്‍ തന്നെ ടിപ്പര്‍ ലോറിയും നൂറു കണക്കിനു ഇരുചക്ര വാഹനങ്ങള്‍ സൂക്ഷിച്ചിട്ടുണ്ട്.
