പത്തനംതിട്ട: ഇരുമുടിക്കെട്ടുമായി ശബരിമല സന്നിധാനത്ത് ദര്‍ശനത്തിനെത്തിയ പതിനേഴ്കാരനായ അയ്യപ്പനെ പോലീസ് ക്രൂരമായി മര്‍ദ്ദിച്ചതായി പരാതി. നിലയ്‌ക്കല്‍ നാറാണംതോട് തുലാപ്പിള്ളി തുണ്ടത്തില്‍ വീട്ടില്‍ സന്തോഷിന്റെ മകന്‍ വിഷ്ണു (17) നെയാണ് പോലീസ് സംഘം തല്ലിച്ചതച്ചത്. ഞായറാഴ്ച രാത്രി 9.30 ഓടെ സന്നിധാനം വലിയ നടപ്പന്തലിലായിരുന്നു സംഭവം. ദേഹമാസകലം വടികൊണ്ടുള്ള അടിയേറ്റ നിലയില്‍ വിഷ്ണു പത്തനംതിട്ട ജനറല്‍ ആശൂപത്രിയില്‍ചികിത്സയിലാണ്.
പടിചവുട്ടുന്നതിനായി നടപ്പന്തലില്‍ ക്യൂ നില്‍ക്കുന്നതിനിടെ തീര്‍ത്ഥാടകരെ വടികളുമായെത്തിയ പോലീസുകാര്‍ അകാരണമായി മര്‍ദ്ദിക്കുന്നത് മൊബൈല്‍ഫോണില്‍ പകര്‍ത്താന്‍ ശ്രമിച്ചതാണ് വിഷ്ണുവിന് നേരെ പോലീസ് തിരിയാന്‍ ഇടയാക്കിയത്. കൊച്ചുകുട്ടികളുമായി ദര്‍ശനത്തിന് ക്യൂ നിന്ന പ്രായമായ മാളികപ്പുറത്തെ പോലീസ് പിടിച്ചുതെള്ളി താഴെ വീഴ്‌ത്തിയത് ചോദ്യം ചെയ്തതോടെ പോലീസുകാര്‍ വിഷ്ണുവിനെ ക്യൂവില്‍ നിന്നും പുറത്തേക്ക് വലിച്ചിട്ടു. ഇരുമുടിക്കെട്ട് പിടിച്ചുവാങ്ങി വലിച്ചെറിഞ്ഞശേഷം പോലീസ് സംഘം ചേര്‍ന്ന് മര്‍ദ്ദിക്കുകയായിരുന്നു. വലിയനടപ്പന്തലിലെ എടിഎം കൗണ്ടറിന് സമീപത്തേക്ക് വലിച്ചിഴയ്‌ക്കുകയും കൂടുതല്‍ പോലീസുകാര്‍ ചേര്‍ന്ന് വിഷ്ണുവിനെ മര്‍ദ്ദിക്കുകയും നിലത്തിട്ട് ചവിട്ടുകയുംചെയ്തു. മൊബൈല്‍ഫോണ്‍ പോലീസ് പിടിച്ചുപറിയ്‌ക്കുകയും ചെയ്തു. മര്‍ദ്ദനമേറ്റ് തളര്‍ന്ന് വീണ വിഷ്ണുവിന് മെമ്മറികാര്‍ഡ് നശിപ്പിച്ച ശേഷം ഫോണ്‍ തിരികെ നല്‍കിയെങ്കിലും സന്നിധാനത്തേക്ക് ദര്‍ശനത്തിന് പോകാന്‍ ശ്രമിച്ചാല്‍ വീണ്ടും മര്‍ദ്ദിക്കുമെന്ന് പോലീസ് ഭീഷണിപ്പെടുത്തുകയും ചെയ്തു. പോലീസ് നടപടി ഭയന്ന് വിഷ്ണു നടപ്പന്തലില്‍ നിന്നും പിന്‍വാങ്ങുകയും യു ടേണിന് സമീപം രാത്രി കഴിച്ചുകൂട്ടുകയും ചെയ്തു. ഇരുമുടിക്കെട്ടില്ലാതെ പടിചവിട്ടാന്‍ കഴിയാത്ത ദുഖത്തില്‍ ഇന്നലെ രാവിലെ വീട്ടില്‍ തിരികെയെത്തിയപ്പോഴാണ് മര്‍ദ്ദനമേറ്റ വിവരം വീട്ടുകാര്‍ അറിയുന്നത്. ക്രൂരമര്‍ദ്ദനമേറ്റ് നടക്കുവാന്‍ പോലും ബുദ്ധിമുട്ട് അനുഭവപ്പെട്ട സാഹചര്യത്തില്‍ വീട്ടുകാര്‍ വിഷ്ണുവിനെ പത്തനംതിട്ട ജനറല്‍ ആശുപത്രിയില്‍ പ്രവേശിപ്പിക്കുകയായിരുന്നു. തന്നെ മര്‍ദ്ദിച്ച പോലീസുകാര്‍ നെയിംപ്ലേറ്റ് ധരിച്ചിരുന്നില്ലെന്നും നല്ല തിരക്കുണ്ടായിരുന്ന അവസരത്തില്‍ പോലീസ് വ്യാപകമായി അയ്യപ്പന്മാരെ കയ്യേറ്റം ചെയ്യുന്നുണ്ടായിരുന്നെന്നും വിഷ്ണു പറഞ്ഞു. സംഭവം സംബന്ധിച്ച് വിഷ്ണുവിന്റെ രക്ഷിതാക്കള്‍ ജില്ലാ പോലീസ് ചീഫിന് പരാതി നല്‍കി. തുലാപ്പിള്ളി കിസുമം ഗവ.ഹയര്‍സെക്കന്ററി സ്‌കൂളിലെ പ്ലസ് ടു വിദ്യാര്‍ത്ഥിയായ വിഷ്ണു ആര്‍എസ്എസ് നിലയ്‌ക്കല്‍ ശാഖാ മുഖ്യശിക്ഷകാണ്.
