തുറവൂര്: അരൂര് നിയോജക മണ്ഡലത്തിലെ ഭൂരിഭാഗം റോഡുകളും തകര്ന്ന് ഗതാഗതയോഗ്യമാല്ലാതായിട്ടും അധികൃതര് തിരിഞ്ഞുനോക്കുന്നില്ല. തുറവൂര്-കുമ്പളങ്ങി, ചാവടി-പള്ളിത്തോട്, എഴുപുന്ന-എരമല്ലൂര്, എഴുപുന്ന-ചെല്ലാനം, തുറവൂര്-തൈക്കാട്ടുശേരി, തൈക്കാട്ടുശേരി-മാക്കേക്കടവ് റോഡുകള് ഏതാണ്ട് പൂര്ണമായി തകര്ന്നു കുണ്ടും കുഴിയുമായി സഞ്ചാരയോഗ്യമല്ലാതായിരിക്കുകയാണ്.
ഇടതു-വലതു മുന്നണികള് പരസ്പരം ആരോപണ പ്രത്യാരോപണങ്ങള് നടത്തുന്നതല്ലാതെ നടപടികള് ഒന്നും സ്വീകരിക്കുന്നില്ല. തുറവൂര്-കുമ്പളങ്ങി റോഡില് അഗാധ ഗര്ത്തങ്ങളാണുള്ളത്. കഴിഞ്ഞദിവസം ഈ റോഡിലെ കുഴിയടയ്ക്കല് നടത്തിയെങ്കിലും ഇതിനു മണിക്കൂറുകളുടെ ആയുസേ ഉണ്ടായിരുന്നുള്ളൂ. രണ്ടുമാസങ്ങള് മുമ്പ് ഇത്തരത്തില് ഈ റോഡ് കുഴിയടച്ചിരുന്നെങ്കിലും രണ്ടുദിവസത്തെ ആയുസു മാത്രമേ ഉണ്ടായിരുന്നുള്ളൂ.
പള്ളിത്തോട്-പമ്പ പാതയുടെ ഭാഗമായ പള്ളിത്തോടുമുതല് മാക്കേക്കടവുവരെയുള്ള റോഡ് പുതുക്കി നിര്മ്മിക്കാന് ലക്ഷങ്ങള് അനുവദിച്ചെന്നു പറയുന്നതല്ലാതെ ഒരു നടപടിയും ഉണ്ടാകുന്നില്ല. വളമംഗലം മേഖലയിലെ റോഡുകള് തോടായി മാറിയിരിക്കുകയാണ്.
