തുറവൂര്: വിദ്യാലയങ്ങളുടെ സമീപ പ്രദേശങ്ങളും ബസ് സ്റ്റോപ്പുകളും വിജനമായ റോഡുകളും കേന്ദ്രീകരിച്ച് പൂവാല- സാമൂഹിക വിരുദ്ധ ശല്യം രൂക്ഷമാകുന്നു.
തുറവൂര്-വളമംഗലം നെടുങ്ങാത്ര സ്ക്കൂള് പരിസരം, ബസ്സ് സ്റ്റോപ്പുകള്, തൈക്കാട്ടുശ്ശരി പാലം, പഴമ്പള്ളിക്കാവ്, തുറവൂര് റെയില്വേ സ്റ്റേഷന് പരിസരം, ചാവടി, ടിഡി സ്ക്കൂള് പരിസരം, എസ്എന്ജിഎം കോളജ് പരിസരം, പാട്ടുകുളങ്ങര, കുത്തിയതോട് വിവിഎച്ച്എസ്എസ്, കരുമാഞ്ചരി, എഴുപുന്ന, സെന്റ് റാഫേല്സ് എച്ച്.എസ്എസ്, ചമ്മനാട് ഇസിഇകെ യൂണിയന് ഹൈസ്ക്കൂള്, പള്ളിത്തോട് സെന്റ് സെബാസ്റ്റ്യന്സ് ഹൈസ്ക്കൂള്, ചന്തിരൂര് ഗവ:ഹൈസ്ക്കൂള്, അരൂര് ഗവ:ഹൈസ്ക്കൂള്, അന്ധകാരനഴി കടല്ത്തീരം, വെട്ടയ്ക്കല് കരിനിലങ്ങള്, പട്ടണക്കാട് ഗവ:ഹൈസ്ക്കൂള്, ഒളതല, കാവില് ഹൈസ്ക്കൂള് തുടങ്ങിയ സ്ഥലങ്ങളിലാണ് സാമൂഹിക വിരുദ്ധ സംഘളുടെ വിളയാട്ടം.
വിലകൂടിയ ബൈക്കുകളിലും മറ്റും കറങ്ങി നടന്നാണ് പൂവാല സംഘങ്ങള് കുട്ടികളെ വലയിലാക്കുന്നത്. രാവിലെയും വിദ്യാലയങ്ങളിലെ ക്ലാസുകള് അവസാനിക്കുന്ന സമയങ്ങളിലുമാണ് ഇക്കൂട്ടര് എത്തുന്നത്. കഞ്ചാവു-മയക്കു മരുന്ന് സംഘങ്ങളില് കണ്ണികളായ യുവാക്കളുംഇത്തരത്തില് കുട്ടികളെ വലയിലാക്കാന് ശ്രമിക്കുന്നതായും പറയപ്പെടുന്നു.
ആരോഗ്യവകുപ്പും പോലീസും മറ്റു സന്നദ്ധ സംഘടനകളും ഇത്തരം റാക്കറ്റുകള്ക്കെതിരെ ബോധവല്ക്കരണപരിപാടികളും മറ്റും സംഘടിപ്പിക്കുന്നുണ്ടെങ്കിലും ഇതൊന്നും ഫലവത്താകുന്നില്ല.
