കോഴിക്കോട്: മനോഹരമായ ഭൂപ്രകൃതിയും സുന്ദരമായ കാലാവസ്ഥയും ഒത്തിണങ്ങിയ കേരളത്തിലേക്ക് വിദേശ രാജ്യങ്ങളില്‍ നിന്നും ഉത്തരേന്ത്യയില്‍ നിന്നുമുള്‍പ്പെടെയുള്ള വിനോദസഞ്ചാരികളെ ആകര്‍ഷിക്കാന്‍ പദ്ധതികളാവിഷ്‌ക്കരിക്കണമെന്ന് ഗവര്‍ണര്‍ ജസ്റ്റിസ് പി സദാശിവം അഭിപ്രായപ്പെട്ടു.
ഇരിങ്ങല്‍ സര്‍ഗാലയ ക്രാഫ്റ്റ് വില്ലേജില്‍ ഗ്രാന്റ് കേരള ഷോപ്പിംഗ് ഫെസ്റ്റിവലിനോടനുബന്ധിച്ച് നടത്തുന്ന അന്താരാഷ്‌ട്ര കരകൗശല മേളയുടെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. ഉത്തരേന്ത്യന്‍ സംസ്ഥാനങ്ങള്‍ തണുത്തുവിറയ്‌ക്കുന്ന ഡിസംബര്‍, ജനുവരി മാസങ്ങളില്‍ പ്രത്യേകിച്ച് അവിടെ നിന്നുള്ളവരെ കേരളത്തിലേക്കാകര്‍ഷിക്കാന്‍ സാധിക്കും. ദേശീയ, അന്താരാഷ്‌ട്ര മേളകളില്‍ കേരളത്തിന്റേതുള്‍പ്പെടെയുള്ള കരകൗശല ഉല്‍പ്പന്നങ്ങള്‍ പ്രദര്‍ശിപ്പിക്കാന്‍ അവസരങ്ങള്‍ സൃഷ്ടിക്കണമെന്നും അദ്ദേഹം ആവശ്യപ്പെട്ടു.
കേരളത്തിന്റെ ധന്യമായ സാംസ്‌കാരികത്തനിമയുമായി അഭേദ്യമായി ബന്ധപ്പെട്ടുകിടക്കുന്ന കലയും കരകൗശല വസ്തുക്കളും ടൂറിസ്റ്റുകളെ ആകര്‍ഷിക്കുന്നതില്‍ പ്രധാനപങ്കുവഹിക്കുന്ന ഘടകങ്ങളാണ്.
ഇരിങ്ങല്‍ ക്രാഫ്റ്റ് വില്ലേജില്‍ നടക്കുന്ന മേള കരകൗശല വസ്തുക്കളുടെ വില്‍പ്പനയും പ്രദര്‍ശനവും മാത്രമല്ല രാജ്യത്തെ കരകൗശലമേഖലയുടെ സമഗ്രവികസനം കൂടി ലക്ഷ്യമിടുന്നതാണെന്നറിയുന്നതില്‍ സന്തോഷമുണ്ട്. കരകൗശലരംഗം നേരിടുന്ന വെല്ലുവിളികളെക്കുറിച്ചും ഈ രംഗത്ത് പ്രവര്‍ത്തിക്കുന്നവരുടെ പ്രശ്‌നങ്ങളെക്കുറിച്ചുമുള്ള സെമിനാറുകളും ചര്‍ച്ചകളും മേളയുടെ ഭാഗമായത് അതുകൊണ്ടാണ്. രാജ്യത്തിന്റെ സമ്പദ്ഘടനയില്‍ ചെറുതല്ലാത്ത സ്ഥാനമാണ് കരകൗശലമേഖലയ്‌ക്കുള്ളതെന്നും ഗവര്‍ണര്‍ അഭിപ്രായപ്പെട്ടു.
ചടങ്ങില്‍ പട്ടികജാതി-ടൂറിസം വകുപ്പ് മന്ത്രി എ.പി അനില്‍കുമാര്‍ അദ്ധ്യക്ഷനായിരുന്നു. കെ.ദാസന്‍ എം.എല്‍.എ, ജി.കെ.എസ്.എഫ് ഡയറക്ടര്‍ കെ.എം.മുഹമ്മദ് അനില്‍, പയ്യോളി മുനിസിപ്പാലിറ്റി ചെയര്‍പേഴ്‌സണ്‍ അഡ്വ. പി.കുല്‍സു, ഊരാളുങ്കല്‍ ലേബര്‍ കോണ്‍ട്രാക്റ്റിംഗ് സൊസൈറ്റി പ്രസിഡന്റ് രമേശന്‍ പാലേരി, ജി.കെ.എസ്.എഫ് സ്റ്റേറ്റ് കോര്‍ഡിനേറ്റര്‍ വി വിജയന്‍, സംസ്ഥാന കരകൗശല വികസന കോര്‍പറേഷന്‍ ചെയര്‍മാന്‍ എം.സി കമറുദ്ദീന്‍, മുനിസിപ്പല്‍ കൗണ്‍സിലര്‍ ഉഷ വളപ്പില്‍, സര്‍ഗാലയ സി.ഇ.ഒ പി.പി ഭാസ്‌കരന്‍ തുടങ്ങിയവര്‍ സംസാരിച്ചു. വിവിധ സംസ്ഥാനങ്ങളില്‍ നിന്നെത്തിയ കലാകാരന്‍മാരുടെ നൃത്ത-സംഗീത പരിപാടികളും ചടങ്ങില്‍ അരങ്ങേറി.
ജനുവരി അഞ്ചു വരെ നീണ്ടുനില്‍ക്കുന്ന മേളയില്‍ 22 സംസ്ഥാനങ്ങളില്‍ നിന്നുള്ള കരകൗശല ഉല്‍പ്പന്നങ്ങളുള്‍പ്പെടെ 250ഓളം സ്റ്റാളുകള്‍ ഒരുക്കിയിട്ടുണ്ട്.
