കട്ടപ്പന നഗരസഭയുടെ ഓഫീസ് മന്ദിരനിര്‍മ്മാണം അവസാന ഘട്ടത്തില്‍

കട്ടപ്പന: നഗരസഭയുടെ പുതിയ ഓഫീസ് കം ഷോപ്പിംഗ് കോംപ്ലക്‌സിന്റെ നിര്‍മ്മാണം അവസാന ഘട്ടത്തിലെത്തി. നാലു നിലകളിലായി 30,000 സ്‌ക്വയര്‍ ഫീറ്റ് വരുന്ന മന്ദിരത്തിന്റെ നിര്‍മ്മാണം 20132014 പദ്ധതികാലയളവിലാണ് ആരംഭിച്ചത്. നഗരസഭയുടെ പുതിയ ആസ്ഥാന മന്ദിരത്തില്‍ പൊതുജനങ്ങള്‍ക്കുള്ള വിശാലമായ ഫ്രണ്ട് ഓഫീസ് സൗകര്യം ജനറല്‍ അഡ്മിനിസ്‌ട്രേഷന്‍ എഞ്ചിനീയറിംഗ് വിഭാഗം, ആരോഗ്യ വിഭാഗം, കുടുംബശ്രീ എന്നിവയ്‌ക്കായി പ്രത്യേകം ഓഫീസുകളും ചെയര്‍മാന്‍, സ്റ്റാന്‍ഡിംഗ് കമ്മിറ്റികള്‍, കൗണ്‍സിലര്‍മാര്‍ എന്നിവര്‍ക്ക് പ്രത്യേക ഓഫീ സുകളും ഏര്‍പ്പെടുത്തിയിട്ടുണ്ട്.കേരള നഗരഗ്രാമവികസന കോര്‍പ്പറേഷന്റെ ധനസഹായത്തോടെ നിര്‍മ്മാണം പൂര്‍ത്തിയാകുന്ന പദ്ധതിയുടെ അടങ്കല്‍ തുക അഞ്ച് കോടി 50 ലക്ഷം രൂപയാണ്. ഇതില്‍ 3,83,50000 രൂപ കെ.യു.ആര്‍.ഡി.എഫ്.സിയില്‍ നിന്ന് വായ്‌പയായി എടുത്തിട്ടുള്ളതാണ്. നഗരസഭയുടെ നിര്‍മ്മാണപുരോഗതി കേരളത്തിലെ മറ്റ് തദ്ദേശ സ്വയംഭരണ സ്ഥാപനങ്ങള്‍ക്കും മാത്യകയാകും വിധമാണ് പൂര്‍ത്തീകരിക്കുന്നത്. ഫര്‍ണിഷിംഗ് ജോലികളും ഇലക്ട്രിഫിക്കേഷന്‍ ജോലികളും പൂര്‍ത്തികരിച്ച് ജനുവരിയോടെ പുതിയ ഓഫീസ് മന്ദിരത്തിലേക്ക് മാറാന്‍ കഴിയുമെന്ന വിശ്വാസത്തിലാണ് നഗരസഭാ നേതൃത്വം.സമ്പൂര്‍ണ്ണ ഗുണമേന്‍മാ സംവിധാനം ഗ്രാമപഞ്ചായത്ത് സംവിധാനത്തില്‍ നടപ്പിലാക്കിയതിലൂടെ ഐ.എസ്.ഒ 9001 2008 സര്‍ട്ടിഫിക്കേഷന്‍ ഇതിനോകം നേടിക്കഴിഞ്ഞു. പുതിയ ഓഫീസ് മന്ദിരത്തിലേക്ക് മാറുന്നതോടൊപ്പം ഐ.എസ്.ഒ സര്‍ട്ടിഫിക്കേഷന്‍ സ്റ്റാന്‍ഡേര്‍ഡില്‍ ഏറ്റവും പുതിയ മാനദണ്ഡമായ ഐ.എസ്.ഒ 90012015 സര്‍ട്ടിഫിക്കേഷന്‍ നേടുന്നതിനുളള പരിശ്രമത്തിലാണ് നഗരസഭ.