കൊല്ലം: ചാണകവെള്ള പ്രയോഗത്തിലൂടെ കോണ്ഗ്രസുകാര് പിന്നോക്ക ജനവിഭാഗങ്ങളെ ആക്ഷേപിക്കുകയായിരുന്നുവെന്ന് ബിജെപി ജില്ലാ പ്രസിഡന്റ് എം.സുനില് പറഞ്ഞു.
പിന്നോക്കക്കാരനായ ആര്.ശങ്കറിന്റെ പ്രതിമാ അനാച്ഛാദനം ചെയ്തത് പിന്നോക്കകാരനായ പ്രധാനമന്ത്രിയായതുകൊണ്ടാണ് കോണ്ഗ്രസുകാര് പ്രതിമക്ക് നേരെ ചാണകവെള്ളം തളിച്ചതെന്നും ഇത് പിന്നോക്കജന വിഭാഗത്തോട് കാണിച്ച നിന്ദയാണെന്നും എം.സുനില് കൂട്ടിച്ചേര്ത്തു. എസ്എന് കോളേജിന് മുന്നില് സ്ഥാപിച്ച ആര്.ശങ്കര് പ്രതിമക്ക് നേരെ കഴിഞ്ഞ ദിവസം കെ.എസ്,യു-യൂത്ത് കോണ്ഗ്രസ് പ്രവര്ത്തകര് നടത്തിയ ചാണകവെള്ള പ്രയോഗത്തിലും പ്രതിമ നശിപ്പിക്കാന് ശ്രമിച്ചതിലും പ്രതിഷേധിച്ച് യുവമോര്ച്ച ജില്ലാ കമ്മിറ്റി സംഘടിപ്പിച്ച പ്രതിഷേധ പ്രകടനം ഉദ്ഘാടനം ചെയ്യുകയായിരുന്നു അദ്ദേഹം.
ആനന്ദവല്ലിശ്വരത്ത് നിന്നാരംഭിച്ച പ്രകടനം നഗരം ചുറ്റി റസ്റ്റ് ഹൗസിനുമുന്നിലൂള്ള ആര്.ശങ്കര് പ്രതിമക്ക് മുന്നില് സമാപിച്ചു. യുവമോര്ച്ച ജില്ലാ പ്രസിഡന്റ് ആഡ്വ.ആര്.എസ്.പ്രശാന്ത് അദ്ധ്യക്ഷത വഹിച്ച യോഗത്തില് ബിജെപി ജില്ലാ ജനറല് സെക്രട്ടറി മാലുമേല് സുരേഷ്, മണ്ഡലം പ്രസിഡന്റ് അഡ്വ.വി.വിനോദ്, മണ്ഡലം ജനറല് സെക്രട്ടറി കരുവാ അനില്, സെക്രട്ടറി ജയപ്രകാശ്, രതീഷ് പേരയം എന്നിവര് സംസാരിച്ചു. ആനന്ദവല്ലിശ്വരത്ത് നിന്നാരംഭിച്ച പ്രകടനത്തിന് വിശാഖ് ചാത്തിനാംകുളം, പട്ടത്താനം വിഷ്ണു, ബിനു ആലാട്ടുകാവ്, നിശാന്ത് ചവറ, രാജേഷ് പുത്തന്നട, അബ്ദുള് മസി എന്നിവര് നേതൃത്വം നല്കി.
