വഴിയാത്രക്കാരനായ വയോധികന് പരിക്ക്
രണ്ട് ഒട്ടോറിക്ഷകള് തകര്ന്നു
തൊടുപുഴ: നഗരത്തില് നിയന്ത്രണംവിട്ട് പിക്-അപ് വാന് പാഞ്ഞുകയറി രണ്ട് ഒട്ടോറിക്ഷകള് തകര്ന്നു, വഴിയാത്രക്കാരനായ വയോധികന് പരിക്ക്. തൊടുപുഴ സ്വദേശിയായ 62 കാരനാണ് നിസാര പരിക്കേറ്റത്. തൊടുപുഴ-മൂവാറ്റുപുഴ റോഡില് ആനക്കൂടും പടിക്ക് സമീപമാണ് അപകടം. കുമളി സ്വദേശിയുടെ പിക്-അപ് ആണ് ഇന്നലെ ഉച്ചക്ക് 2 മണിയോടെ ഇടിച്ച് കയറിയത്. അപകടത്തില് വഴിയോരത്ത് പാര്ക്ക് ചെയ്തിരുന്ന രണ്ട് ഓട്ടോറികള്ക്ക് കേടുപാടുകള് സംഭവിച്ചു. മണക്കാട് ശാരദവിലാസത്തില് രാജുവിന്റ ഓട്ടോറിക്ഷകളാണ് തകര്ന്നത്. അപകടം നടന്നതിന് സമീപത്തായി തന്നെ സെഞ്ച്വറി ഓട്ടോസ് എന്ന് സ്ഥാപനം നടത്തി വരുകയാണ് രാജു. മൂവാറ്റുപുഴ ഭാഗത്ത് നിന്നും വരികയായിരുന്ന പിക്-അപ് ഇടതുവശം ചേര്ന്ന് പാര്ക്ക് ചെയ്തിരുന്ന ഓട്ടോയില് ഇടിക്കുകയായിരുന്നു. ഇടിയുടെ ആഘാതത്തില് ഓട്ടോ സമീപത്തെ ഓടയില് വീഴുകയും തൊട്ടുമുന്നില് പാര്ക്ക് ചെയ്തിരുന്ന മറ്റൊരു വണ്ടിയില് ഇടിക്കുകയുമായിരുന്നു. വഴിയരികിലൂടെ നടന്നു പോകുകയായിരുന്ന വയോധികനാണ് പരിക്കേറ്റത്. ഇയാളെ തൊടുപുഴയിലെ സ്വകാര്യ ആശുപത്രിയില് പ്രവേശിപ്പിച്ച് പ്രാഥമിക ചികിത്സയ്ക്ക് ശേഷം വിട്ടയച്ചു. കുമളിയില് നിന്നം പെരുമ്പാവൂരിന് തടിയുമായി പോയ ശേഷം മടങ്ങിവരവെയാണ് പിക്-അപ് അപകടത്തില് പെടുന്നത്. ഓട്ടോറിക്ഷകള്ക്ക് ഏകദേശം 30000 രൂപയുടെ പണിയുള്ളതായി ഉടമ പറഞ്ഞു. ഡ്രൈവര് ഉറങ്ങിപോയതാണ് അപകടകാരണമെന്നാണ് പ്രഥമിക നിഗമനം.
