റോം: ഇന്റര്മിലാന് ഇറ്റാലിയന് കപ്പിന്റെ ക്വാര്ട്ടര് ഫൈനലില് പ്രവേശിച്ചു. പ്രീക്വാര്ട്ടറില് കാഗ്ലിയാരിയെ മറുപടിയില്ലാത്ത മൂന്ന് ഗോളുകള്ക്ക് കീഴടക്കിയാണ് സീസണില് ഉജ്ജ്വല ഫോമില് കളിക്കുന്ന ഇന്ററിന്റെ മുന്നേറ്റം. കളിയില് പൂര്ണ്ണ ആധിപത്യം പുലര്ത്തിയ ഇന്ററിനായി 24-ാം മിനിറ്റില് പലാസിയോ, 71-ാം മിനിറ്റില് മാഴ്സെലോ ബ്രൊസോവിച്ച്, 81-ാം മിനിറ്റില് ഇവാന് പെരിസിച്ച് എന്നിവര് ഗോളുകള് നേടി. നാപ്പോളി-ഹെല്ലാസ് വെറോണ മത്സര വിജയികളെ ഇന്റര് ക്വാര്ട്ടറില് നേരിടും.
അധികസമയത്തേക്ക് നീണ്ട മറ്റൊരു മത്സരത്തില് ഗനോവയെ ഒന്നിനെതിരെ രണ്ട് ഗോളുകള്ക്ക് പരാജയപ്പെടുത്തി അലസ്സാന്ഡ്രിയ ക്വാര്ട്ടറിലെത്തി. 46-ാം മിനിറ്റില് മാനുവല് മരാസിലൂടെ അലസ്സാന്ഡ്രിയ ലീഡ് നേടിയെങ്കിലും ഇഞ്ചുറിസമയത്ത് ലിയനാര്ഡോ പവോലെറ്റി ഗനോവയുടെ സമനില ഗോള് നേടി. ഇതോടെയാണ് കളി അധികസമയത്തേക്ക് നീണ്ടത്. പിന്നീട് 114-ാം മിനിറ്റില് റിക്കാര്ഡോ ബൊലാക്കോന് അലസ്സാന്ഡ്രിയയുടെ വിജയഗോള് നേടുകയും ചെയ്തു.
