പാനൂര്: മനുഷ്യ മനസുകളെ വിമലീകരിക്കുന്ന പുസ്തക വായനക്ക് പ്രാധാന്യം നല്കാന് യുവതലമുറ തയ്യാറാവണമെന്ന് ആര്എസ്എസ് പ്രാന്തീയ കാര്യകാരി സദസ്യന് വത്സന് തില്ലങ്കേരി പറഞ്ഞു. പത്തായക്കുന്ന് ഗുരുദേവവിലാസം വായനശാല & ഗ്രന്ഥാലയം സംഘടിപ്പിച്ച ലൈബ്രറി കൗണ്സില് 70-ാം വാര്ഷികാഘോഷ പരിപാടിയില് വിജ്ഞാന സദസില് പ്രഭാഷണം നടത്തുകയായിരുന്നു അദ്ദേഹം. വായനാശീലം പ്രപഞ്ച സത്യത്തിലേക്ക് നമ്മെ കൊണ്ടെത്തിക്കും. നിര്മ്മലമായ, സത്യമായ സാമൂഹ്യാന്തരീക്ഷത്തിന് പുസ്തകവായന അനുഗുണമാണ്. മഹാമനീഷികള് തപം ചെയ്തെടുത്ത അമൂല്യ സംഭാവനകളാണ് എഴുത്തുകള്.അതിനെ വീടിനുളളിലെ സൗന്ദര്യ വസ്തുവായി പ്രദര്ശിപ്പിക്കാതെ വായിക്കാനായി സമൂഹത്തിനു നല്കണം. വായന നമ്മളില് ഭ്രാന്തമായ ആസക്തിയുണ്ടാക്കണം. അങ്ങിനെ വന്നാല് നവീനമാധ്യമങ്ങളില് നിന്നും മനസുകളെ ഒരു പരിധിവരെ മോചിപ്പിക്കാന് നമുക്കു സാധിക്കും. ചിന്തയിലും പ്രവൃത്തിയിലും നാം കുറിയവരായി മാറുകയാണ്. ഇതിനു കാരണം വായനയില് നിന്നും നാം പിറകോട്ടു പോയതാണെന്നും വായനയെ പ്രോത്സാഹിപ്പിക്കാന് എല്ലാവരും ഒരോരുത്തരാല് കഴിയുന്ന പ്രവര്ത്തനം നടത്തണമെന്നും അദ്ദേഹം തുടര്ന്നു പറഞ്ഞു. വിപി.ഷാജി മാസ്റ്റര് അദ്ധ്യക്ഷത വഹിച്ചു. പ്രമുഖ സാഹിത്യകാരന് പ്രേമാനന്ദ് ചമ്പാട് പുസ്തക സമര്പ്പണം ഉദ്ഘാടനം ചെയ്തു. കെ.സുരേന്ദ്രന് മാസ്റ്റര്, കെപി.രാജു മാസ്റ്റര്, കെകെ.ശശീന്ദ്രന് മാസ്റ്റര്, ടിഎ.വത്സരാജ്, ടിസി.സുധാകരന് മാസ്റ്റര്, കെ.സുധാകരന് മാസ്റ്റര് എന്നിവര് സംസാരിച്ചു. വിഎ.സജീവന് സ്വാഗതവും അജയന് മമ്പളളി നന്ദിയും പറഞ്ഞു.
മനുഷ്യ മനസുകളെ വിമലീകരിക്കുന്ന പുസ്തക വായനക്ക് പ്രാധാന്യം നല്കാന് യുവതലമുറ തയ്യാറാവണം: വല്സന് തില്ലങ്കേരി
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.